މޯލްޑިވްސް ޕޮލިސް ސާރވިސް އިން ކުރިއަށް ގެންދިޔަ ތަމްރީނު ހަރަކާތެއްގައި ބައިވެރިވި އުމުރުން 19 އަހަރުގެ ފުލުހަކު ނިޔާވެއްޖެއެވެ.

ބުރާސްފަތި ދުވަހު ދ.ވާނީގައި ހިނގި މި ހާދިސާއާ ގުޅޭގޮތުން ފުލުހުންގެ މީޑިއާ އޮފިޝަލު ވިދާޅުވީ، ހާދިސާ ހިނގާފައިވަނީ ދ.ވާނީގައި ކުރިއަށް ގެންދިޔަ 31 ވަނަ "ޕޮލިސް ރެކްރޫޓް ޓްރެއިނިންގ ކޯސް" ގެ ފެތުމުގެ ސެޝަނެއްގެ ތެރެއިން ކަމަށެވެ.

ފުލުހުން ބުނީ، މި ހާދިސާ ހިނގަން މެދުވެރިވި ސަބަބު ދެނެގަތުމަށްޓަކައި ފުލުހުންގެ ޕްރޮފެޝަނަލް ސްޓޭންޑަރޑްސް ކޮމާންޑުގެ ޚާއްސަ ޓީމަކުން ބަލަން ފަށާފައިވާ ކަމަށެވެ.

ފުލުހުންގެ ރެކްރޫޓްމަންޓް ޓްރެއިނިންގްތައް ދ.ވާނީގައި ކުރިއަށްގެންދާއިރު، އެ ޓްރެއިނިންގތަކުގެ ތެރެއިން ދުވުމާއި، ފެތުމާއި ތަފާތު އެކި ގޮތްގޮތުން ގުޅުންހުރި ތަމްރީނުތައް ދެވިގެންދާއިރު، އެކަމުގައި ފުލުހުންގެ ތަޖުރިބާކާރު އޮފިޝަލުން ވެސް ހަރަކާތްތެރިވެއެވެ.