ރައްޔިތުންނަށް ފުރިހަމަ ޚިދުމަތްތަކެއް ފޯރުކޮށްދެވޭނީ އެޤައުމެއްގެ އަމިއްލަ ފަރާތްތަކުން ސަރުކާރާއި ގުޅިގެން މަސައްކަތް ކޮށްގެން ކަމުގައި ރައީސުލްޖުމްހޫރިއްޔާގެ ނައިބު ފައިޞަލް ނަސީމް ވިދާޅުވެއްޖެއެވެ.
ހުޅުމާލޭގައި ޤާއިމުކުރި ޑޮކްޓަރ ޑީޑީ ޑެންޓަލް އެންޑް މެޑިކަލް ސެންޓަރ ހުޅުއްވައިދެއްވުމަށް ބުދަ ދުވަހު ބޭއްވި ރަސްމިއްޔާތުގައި ވާހަކަފުޅު ދައްކަވަމުން ނައިބު ރައީސް ވިދާޅުވީ ޑރ. ޑީޑީއަކީ ޞިއްޙީ ދާއިރާއިން ރާއްޖޭގައި ވަރަށް ގިނަ ގުނަ ޚިދުމަތްތަކެއް ދިވެހި ރައްޔިތުންނަށް ފޯރުކޮށްދެއްވަމުން ގެންދަވާ ބޭފުޅެއްކަމަށެވެ. އަދި އެމަނިކުފާނު ވިދާޅުވީ ޚިދުމަތް ފޯރުކޮށްދޭ ޢިމާރާތް ކިތަންމެ ކުޑަ ނަމަވެސް ތަނުންދޭ ޚިދުމަތް ރަނގަޅުނަމަ، އެތަނަކީ ފެންވަރު ރަނގަޅު ތަނެއްގެ ގޮތުގައި ރައްޔިތުން ބަލައިގަންނާނެ ކަމުގައެވެ.
މި ރަސްމިއްޔާތުގައި ރައީސުލްޖުމްހޫރިއްޔާގެ ނައިބު ވަނީ ޞިއްޙީ ޚިދުމަތަކީ ރާއްޖޭގެ ކޮންމެ ރައްޔިތަކަށް ވެސް އެންމެ މުހިންމު އެއް ޚިދުމަތްކަން ފާހަގަކުރައްވައި، ސަރުކާރުން ރާއްޖޭގެ ޞިއްޙީ ޚިދުމަތުގެ ފެންވަރު ރަނގަޅު ކުރުމަށް ގިނަ ގުނަ މަސައްކަތްތަކެއް ކުރައްވަމުން ގެންދަވާކަން ފާހަގަކުރައްވާފައެވެ.
