އަސާސީ ޕެންޝަން ފަސްހާސް (5000) ރުފިޔާއިން ދިހަ ހާސް (10000) ރުފިޔާއަށް ބޮޑު ކުރަން ހުށަހެޅި އިސްލާހު މަޖިލީހުން ބޭރުކޮށްލައިފިއެވެ.

މިއިސްލާހު ބޭރުކޮށްލާފައިވަނީ 58 ވޯޓުންނެވެ. އަސާސީ ޕެންޝަން ބޮޑު ކުރަން ޕެންޝަނާއި ބެހޭ ގާނޫނަށް އިސްލާހު ގެންނަން ހުށަހެޅުއްވީ ކާށިދޫ ދާއިރާގެ މެމްބަރު އަބްދުﷲ ޖާބިރުއެވެ.

އުމުރުން ދުވަސްވީ މީހުންނަކީ ގަދަރުވެރިކަމާއެކު އުޅެވޭނެ މީހުންނަށް ހެދުމަށްޓަކާ ދައުލަތުން މިހާރު ފޯރު ކޮށްދެމުން އަންނަ ފައިސާގެ އަދަދު ބޮޑު ކުރަން ޖެހޭ ކަމަށް އަސާސީ ޕެންޝަން ބޮޑު ކުރަން ޕެންޝަނާއި ބެހޭ ގާނޫނަށް އިސްލާހު ހުށަހަޅުއްވަމުން މެމްބަރު ޖާބިރުވަނީ ވިދާޅުވެފައެވެ. ޖާބިރު ވިދާޅުވީ 5000 ރުފިޔާ އަކީ އަސާސީ ބޭނުންތައް ފުއްދަން މަދު އަދަދެއް ކަމަށެވެ.

އިސްލާހުގެ ބަހުސް މަރްހަލާގައިވެސް މެމްބަރުން ވަނީ އިސްލާހަށް ވަރަށް ބޮޑަށް ފާޑުވިދާޅުވެފައެވެ. އެގޮތުން ޕެންޝަނާއި ބެހޭ ގާނޫނަށް ހުށަހެޅި އިސްލާހަކީ އެއްވެސް ދިރާސާ ކުރުމެއްނެތި ހުށަހަޅާފައިވާ އިސްލާހެއްކަން މެމްބަރުން ވަނީ ފާހަގަކުރައްވާފައެވެ. ސަރުކާރުން ބަޖެޓް ހަދާ ނިންމާފައިވަނިކޮށް، ބަޖެޓަށް ބުރަ ބޮޑުވާ ގޮތަށް ސަރުކާރާއި އެއްވެސް މަޝްވަރާ ކުރުމެއްނެތި އިސްލާހު ހުށަހެޅުއްވާތީވެސް މެމްބަރުން ވަނީ ފާޑުވިދާޅުވެފައެވެ.