ދެ އަހަރުގެ މެދުކެނޑުމަކަށް ފަހު މިއަހަރުގެ މިނިވަންދުވަހާ ގުޅިގެން "ފުޅަނދުބުރު" ބޭއްވުމަށް ހަމަޖެހިފައިވާ ކަމަށް މިނިސްޓްރީ އޮފް ހޯމް އެފެއާޒުން ބުނެފިއެވެ.

މިނިވަން ދުވަހާ ގުޅިގެން ގިނަ ހަރަކާތްތަކެއް ރާވާފައިވާއިރު، ހޯމް މިނިސްޓްރީން ބުނީ މިމަހުގެ 27 ވާ ހޮނިހިރު ދުވަހުގެ ރޭ މާލޭގެ ބޮޑެތި މަގުތަކުގައި ފުޅަނދުބުރުގެ ހަރަކާތްތައް އޮންނާނެ ކަމަށާއި، އޭގެތެރޭގައި މަޖީދީމަގު، ސޯސަންމަގު، އަމީރުއަހުމަދު މަގު، އަދި ބޮޑުތަކުރުފާނުމަގު ހިމެނޭ ކަމަށެވެ. އެގޮތުން ފުޅަނދުބުރުގައި ބޭނުންކުރާ ފުޅަނދުތައް ޖުލައި 28 ވާ އާދިއްތަ ދުވަހުގެ ހަވީރާއި ރޭގަނޑު އާއްމުންނަށް ފެންނާނެހެން އިންޑަސްޓްރިއަލް ޒޯން ޞަރަހައްދުގައި ހުންނާނެ ކަމަށާއި، ފުޅަނދުގައި ކުރިއަށްގެންދާ ކުޅިވަރުތައް އެތަނުގައި އޮންނާނެ ކަމަށް ހޯމް މިނިސްޓްރީން ބުނެއެވެ.

މިއަހަރުގެ ފުޅަނދުތައް ތައްޔާރުކުރަނީ ސަރުކާރުގެ ކުންފުނިތަކުން ކަމަށްވެސް ހޯމް މިނިސްޓްރީން ބުނެފައިވެއެވެ. އެގޮތުން މިފަހަރުގެ ފުޅަނދުތައްވެސް ކުޑަކުދިން ޝައުޤުވެރިވާގޮތަށް އަދި ދިވެހި ސަޤާފަތް ދައްކުވައިދޭ ގޮތަށް ގެނެސްދޭނެ ކަމަށް ބުނެފައިވެއެވެ. ނަމަވެސް ބައިވެރިވާ މުއައްސަސާތަކުގެ ތަފްސީލެއް ހޯމް މިނިސްޓްރީން ހާމަކޮށްފައެއް ނުވެއެވެ.

އޭގެ އިތުރުން، މިނިވަންދުވަހާއި ގުޅިގެން ބާއްވާ ޕެރޭޑާއި ރޫޓްމާޗް އަންނަ ހޮނިހިރު ދުވަހު ހަވީރު މާލޭގެ ބޮޑެތި މަގުތަކުގައި އޮންނާނެ ކަމަށާއި، މިރޫޓް މާޗްގައި އެމްއެންޑީއެފްގެ ޕެރޭޑާއި، ސްކޫލްތަކުން ބައިވެރިވާނެ ކަމަށް ހޯމް މިނިސްޓްރީން ބުނެފައިވެއެވެ. އެކަމާ ގުޅޭގޮތުން އެމްއެންޑީއެފުން ބުނީ، ޖުލައި 27 ވާ ހޮނިހިރު ދުވަހުގެ ހަވީރު 16:30 ގައި ސިފައިންގެ މައި މަރުކަޒު ކައިރިން އެމްއެންޑީއެފްގެ ޝަރަފުގެ ހިނގާލުން ފެށޭނެ ކަމަށާއި، ފަސް ސަރަހައްދަކަށް ހިނގާލުން ހުއްޓާ ގޮތަށް ހަމަޖެހިފައިވާ ކަމަށެވެ.

ޝަރަފުގެ ހިނގާލުން ހުއްޓާލުމަށް ހަމަޖެހިފައިވާ ސަރަހައްދުތައް:

އޭގެއިތުރުން، މިނިވަން ދުވަހާއި ގުޅިގެން ހެވިކަމުގެ ކުޅިވަރުތަކެއްވެސް ރާވާފައިވާއިރު، ހެވިކަމާ ކުޅިވަރު އޮންނާނީ ޖުލައި 26 ވަނަ ދުވަހުގެރޭ ރަސްމީ ސްޓޭޑިއަމްގައި ކަމަށް ހޯމް މިނިސްޓްރީން ބުނެއެވެ. އެގޮތުން އެކުޅިވަރުތަކުގައި ވިލިމާލެއާއި، ހުޅުމާލެ ހިމެނޭގޮތަށް މާލޭގެ 6 ސްކޫލަކުންނާއި އެމްއެންޑީއެފް ބައިވެރިވާނެ ކަމަށާއި، އެކަމުގެ ތައްޔާރީތައް ކުރިއަށްދާ ކަމަށް ހޯމް މިނިސްޓްރީން ބުނެފައިވެއެވެ.

މިނިވަން ދުވަހުގެ ހަރަކާތްތަކަށް ބޮޑެތި ތައްޔާރީތަކެއް ވަމުންދާއިރު، މިނިވަން ދުވަސް ފާހަގަ ކުރުމުގެ ގޮތުން އެންމެ ފަހުން ފުޅަނދު ބުރު ބާއްވާފައިވަނީ 2015 ވަނަ އަހަރުއެވެ. އެގޮތުން ސަރުކާރުގެ 24 މުއައްސަސާއަކުން ބައިވެރިވި އެ ފުޅަނދުބުރުގައި 34 ފުޅަނދު އެފަހަރު ވަނީ ދައްކާލާފައެވެ.