ގެދޮރު އިމާރަތްކުރުމަށް އިންޓްރެސްޓް ކުޑަ ލޯނު ދޫކުރުމުގެ މަސައްކަތްތައް ނިމި، އަންނަ އޮގަސްޓް މަހުގައި ލޯނަށް އިއުލާންކުރެވޭނެކަމަށް މިނިސްޓާރ އޮފް ހައުސިންގ އެންޑް އާރބަން ޑިވެލޮޕްމެންޓް އާމިނަތު އާތިފާ ޝުކޫރު ވިދާޅުވެއްޖެއެވެ.

މިނިސްޓަރ އާތިފާ އެގޮތަށް ވިދާޅުވީ ރައްޔިތުންގެ މަޖިލީހުގައި ދުވާފަރު ދާއިރާގެ މެމްބަރު އިސްމާއިލް އަހުމަދު ކުރެއްވި ސުވާލަށް ޖަވާބުދެއްވަމުންނެވެ. މެމްބަރު ކުރެއްވި ސުވާލަކީ މި އަހަރުގެ ދުވާފަރުގައި ގެދޮރު އިމާރަތްކުރުމަށް ބަޖެޓު ކުރެވިފައިވުމުން އިންޓްރެސްޓް ކުޑަ ލުއި ލޯނެއް ދޫކުރުމުގެ ވިސްނުމެއް ގެންގުޅުއްވަންތޯ އެވެ.

މެމްބަރުގެ ސުވާލަށް ޖަވާބު ދެއްވަމުން މިނިސްޓަރ ވިދާޅުވީ ފާއިތުވެ ދިޔަ 6 މަސް ދުވަހުގެ ތެރޭގައި މަރުކަޒީ ބޭންކް، އެމްއެމްއޭ އާއި، ދައުލަތުގެ މާލީ އިދާރާތަކާއެކު ލޯނު ދުކުރުމަށްޓަކައި މަޝްވަރާތައްކޮށް މަސައްކަތްތައް ކުރެވިފައިވާކަމަށެވެ. އަދި މިހާރު ކުރެވެމުންދަނީ ލުއި ލޯނު ދޫކުރުމަށްޓަކާ އޭގެ އެންމެ ފަހު ޑްރާފްޓް އެކުލަވާލުމުގެ މަސައްކަތް ކަމަށް މިނިސްޓަރ ވިދާޅުވި އެވެ.

މިނިސްޓަރު އާތިފާ ވިދާޅުވީ ގެދޮރު ބިނާ ކުރުމަށްޓަކާ 5 އިންސައްތަ އާއި 6 އިންސައްތައިގެ އިންޓްރެސްޓާއިއެކު ލޯނު ދިނުމަކީ ސަރުކާރުގެ ވައުދެއްކަމަށާއި އޮގަސްޓް މަހު ލުއި ލޯނު ދިނުމަށްޓަކާ އިއުލާން ކުރެވިގެންދާނެ ކަމަށް އުއްމީދު ކުރައްވާ ކަމަށެވެ.

ބޯހިޔާވެހިކަމުގެ މައްސަލަ ހައްލުކުރުމަށް ސަރުކާރުގެ ވައުދުތަކުގެ ތެރޭގައި ލޯނުގެ އިންޓްރެސްޓް ދަށްކުރުން ހިމެނެ އެވެ. އެގޮތުން ރައީސް އިބްރާހިމް މުހައްމަދު ސޯލިހް ވައުދުވެވަޑައިގެންފައިވަނީ އިންޓްރެސް ރޭޓް 6 އިންސައްތައަށް ކުޑަކުރުމަށެވެ.