އަށް މަސް ދުވަހަށްފަހު، ކުޑަކުދިންގެ މަލްޓިމީޑިއާ ލައިބްރަރީ އަލުން ހުޅުވައިފިއެވެ.

ލައިބްރަރީ ހުޅުއްވާދެއްވާފައިވަނީ ހުކުރު ދުވަހު އެކަމަށް ބޭއްވި ހާއްސަ ރަސްމިއްޔާތެއްގައި އާރޓްސް ކަލްޗަރ އެންޑް ހެރިޓެޖް މިނިސްޓަރު ޔުމްނާ މައުމޫން އެވެ.

ލައިބްރަރީ އަލުން ހުޅުވާފައިވާއިރު އެތަނުގައި އެންމެ ތުއްތު ކުދިންނަށްވެސް ފޮތް ކިޔުމާއި ކުޅުން ފަދަ ހަރަކާތްތަކުގައި ބައިވެރިވެވޭނެގޮތަށް ވަނީ "ކިޑްސް ކޯރނާ" ކިޔާ ކޯރނާއެއް ހުޅުވާފައެވެ. 2000 އަށްވުރެ ގިނަ ފޮތާއެކު އަލުން ހުޅުވިގެންދިޔަ މި ލައިބްރަރީގައި ތިބެ ފޮތް ކިޔާލެވެނެ ފަދަ ސްޓަޑީ އޭރިއާއެއްގެ އިތުރުން ދިވެހި ލިޔުންތަކަށް ހާއްސަ ކޮށްގެން "ދިވެހި ކަލެކްޝަން" ގެ ނަމުގައި ވަކި ބައެއް ވަނީ ގާއިމު ކޮށްފައެވެ.

އާރޓްސް ކަލްޗަރ އެންޑް ހެރިޓެޖް މިނިސްޓްރީގެ ޑެޕިއުޓީ މިނިސްޓަރު އަހުމަދު މުހުސިން ރާއްޖެ.އެމްވީއަށް މައުލޫމާތުދެއްވަމުން ވިދާޅުވީ މި ލައިބްރަރީގެ އެކި ހިދުމަތްތައް މެދުކެނޑެމުން، ބަންދުކުރަމުން ދާތާ ތިން އަހަރު ވެފައިވާ ކަމަށެވެ.

މުހުސިން ވިދާޅުވީ އެގޮތަށް ދިމާވީ އެތަނުގައި ކަރަންޓުގެ މައްސަލަތަކާއި އިތުރު އެހެނިހެން މައްސަލަތައް ހުރުމުން ކަމަށެވެ. އަދި އަލުން ލައިބްރަރީ ހުޅުވާފައިވަނީ އެ ފަދަ ކަންކަން ރަނގަޅުކޮށް ބޮޑެތި ބަދަލުތަކާއެކު ކަމަށް އޭނާ ވިދާޅުވި އެވެ.

މީގެ އިތުރުން ކުދިންގެ މެދުގައި ފޮތްތެރިކަން އިތުރު ކުރުމަށް މަސައްކަތް ކުރައްވާނެ ކަމަށް މުހުސިން ވިދާޅުވިއެވެ. އެގޮތުން، ކުރިއަށް އޮތް ތަނުގައި ކުދިންނަށް ހާއްސަކޮށްގެން ބައެއް މުބާރާތްތަކާއި ހަރަކާތްތައް ހިންގާނެ ކަމަށް މުހުސިން ވިދާޅުވިއެވެ.

ލައިބްރަރީ ހުޅުވިފައި ހުންނާނީ ކޮންމެ ހަފްތާއެއްގެ ހޮނިހިރު ދުވަހުން ބުރާސްފަތި ދުވަހުގެ ނިޔަލަށް، ހެނދުނު 10:00 ން ހަވީރު 4:00 އަށެވެ.

ލައިބްރަރީގެ ހިދުމަތް ހޯދޭނީ 13 އަހަރުން ދަށުގެ ކުޑަ ކުދިންނަށެވެ.