ރަސްމީ ދަތުރުފުޅެއްގައި ރައީސުލްޖުމްހޫރިއްޔާގެ ދެކަނބަލުން ބުރާސްފަތި މޮރިޝަސްއަށް ފުރައިވަޑައިގަންނަވާނެކަމަށް ރައީސް އޮފީހުން ބުނެފި އެވެ.
ރައީސް އޮފީހުން ބުނީ މޮރިޝަސްގައި މި މަހު އޮންނަ އިންޑިއަން އޯޝަން އައިލޭންޑް ގޭމްސް ހުޅުވުމުގެ ރަސްމިއްޔާތުގައި ބައިވެރިވެޑައިގަތުމަށް ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހާއި އަނބިކަނބަލުން ބުރާސްފަތި ދުވަހު މޮރިޝަސްއަށް ފުރައިވަޑައިގަންނަވާނެ ކަމަށެވެ. އަދި ރައީސުލްޖުމްހޫރިއްޔާ އާއި އަނބިކަނބަލުން މޮރިޝަސް އަށް ފުރައިވަޑައިގަންނަވަނީ މޮރިޝަސް ސަރުކާރުގެ ދައުވަތަކަށްކަމަށް ރައީސް އޮފީހުން ބުންޏެވެ.
ރައީސްގެ މި ދަތުރުފުޅުގައި އެމަނިކުފާނު ދިވެހި އެތްލީޓުންއާއި ބައްދަލު ކުރައްވާނެއެވެ. މީގެ އިތުރުން ރައީސް ދިވެހި އެތްލީޓުން ވާދަ ކުރައްވާ ބައެއް ކުޅިވަރު ހަރަކާތްތައް ބައްލަވާލައްވާނެކަމަށް ރައީސް އޮފީހުން ބުންޏެވެ.
ދަތުރުފުޅު ނިންމަވާލެއްވުމަށްފަހު ރައީސުލްޖުމްހޫރިއްޔާގެ ދެކަނބަލުން ރާއްޖެ ވަޑައިގަތުމަށް ހަމަޖެހިފައިވަނީ ޖުލައި މަހުގެ 23 ވަނަ ދުވަހުއެވެ. މިއީ ރައީސުލްޖުމްހޫރިއްޔާ ހުވާކުރެއްވުމަށްފަހު މޮރިޝަސް އަށް ކުރައްވާ ފުރަތަމަ ދަތުރުފުޅެވެ.
