މަސްވެރިން ނިކަމެތިވާ ކޮންމެ ފަހަރަކު އެމްޑީޕީން އެހީތެރިވެދޭ ކަމަށް ހެންވޭރު ދެކުނު ދާއިރާގެ މެންބަރު ހުސައިން ޝަހީމް ވިދާޅުވެއްޖެއެވެ.

ރާއްޖެޓީވީގެ ފަލަ ސުރުހީ ޕްރޮގްރާމުގައި ވާހަކަ ދައްކަވަމުން ޝަހީމް ވިދާޅުވީ ރާއްޖޭގައި ތިބި ހުރިހާ މަސްވެރިންނަކީވެސް އެމްޑީޕީ މީހުން ކަމަށާ އެމީހުންނަށް ނިކަމެތި ކަމެއް ދިމާވާ ކޮންމެ ފަހަރަކު އެޕާޓީން އެމީހުން ނަގާ ކޮޅަށް ޖަހާދޭ ކަމަށެވެ.

ޝަހީމް ވިދާޅުވީ، ގިނަ އަދަދެއްގެ މަސްވެރިން އެމްޑީޕީއަށް ސޮއިކޮށްފައި ވަނީ އެމްޑީޕީން އެމީހުންގެ ހައްގުގައި އަބަދު ވެސް ތެދުވާތީ ކަމަށެވެ.

މީގެ އިތުރުން، ރާއްޖޭގައި މަސްވެރިކަން ކުރިނާރާ އޮތީ ކުރީގެ ސަރުކާރުތަކުން އެކަމަށް ބޭނުންވާ ކަންކަން ރަނގަޅަށް ކޮށްދީފައި ނުވާތީ ކަމަށް ޝަހީމް ވިދާޅުވިއެވެ. އެގޮތުން، ބޭންކް ތަކުން ވެސް ފައިނޭންސް ކޮށް އުޅުނީ ޓޫރިޒަމަށް ކަމަށް އޭނާ ވިދާޅުވިއެވެ.

އަދި ޓޫރިޒަމް އިން ރާއްޖެއަށް ފައިދާއެއް ލިބެންދެން ރާއްޖެ ހިފަހައްޓާލީ މަސްވެރިންގެ މަސައްކަތުން ކަމުގައިވެސް ޝަހީމްގެ ވާހަކައިގައި ފާހަގަކުރެއްވިއެވެ.

މަސްވެރިންނަށް ބޭނުންވާ ޓެކްނިކަލް އެކްސްޕާޓައިސްއާ އެކީ، އެމީހުން ހޭލުންތެރި ކުރުވައިގެން އެކަމަށް ތައްޔާރު ކުރުމުން ރާއްޖޭގައި މަސްވެރިކަން ކުރިއަރާނެ ކަމަށާ ރާއްޖޭގެ މަސްވެރިކަން އެހެން ހަރުފަތަކަށް ދިއުމަށް ސަރުކާރުން ބޮޑު ދައުރެއް އަދާ ކުރަން ޖެހޭ ކަމަށް ޝަހީމް ވިދާޅުވިއެވެ.