މާލެ ސިޓީގައި ދިރިއުޅޭ މީހުން ހަފްތާ ބަންދުގައި އާއިލާއާ އެކު ދަތުރު ދިއުމަށް އެނބޫދޫ ފަޅުން ރަށެއް ހަމަޖެއްސުމަށް ސަރުކާރުން ނިންމައިފިއެވެ.
ތައިލެންޑުގެ ސިންހާ އެސްޓޭޓް ކުންފުނިން، އެނބޫދޫ ފަޅު ހިއްކައިގެން ހަދާ ރަށްތަކުގެ ތެރެއިން، ސަރަހައްދެއް ދަތުރު ދިއުމަށް ހާއްސަ ކުރިކަން އިއުލާން ކުރީ އަންގާރަ ދުވަހުގެ ހަވީރު އާޓްގެލެރީގައި ބޭއްވި ރަސްމިއްޔާތެއްގައެވެ. ރައީސުލްޖުމްހޫރިއްޔާ އިބްރާހިމް މުހައްމަދު ސޯލިހު ބައިވެރިވެވަޑައިގެންނެވި އެ ރަސްމިއްޔާތުގައި އެނބޫދޫ ފަޅުން ދަތުރު ދިއުމަށް ހާއްސަ ކުރި ތަނުގެ މައުލޫމާތު ޕްރެޒެންޓޭޝަނެއްގެ ގޮތުގައި ވަނީ ހުށަހަޅާފައެވެ.
ދަތުރުދިއުމަށް އެނބޫދޫފަޅުން ހާއްސަ ކުރި ސަރަހައްދަށް މާލެއިން ފުރައިގެން 15 މިނެޓުން ދެވޭނެއެވެ. އެނބޫދޫފަޅުގެ ހުޅަނގުން ހިއްކާފައިވާ އެ ސަރަހައްދުގެ ބޮޑު މިނަކީ 3.3 ހެކްޓަރެވެ. އެތަނުގައި މޫދު ކުޅިވަރާއި ބާބަކިއު ހެދޭނެ ތަންތަނާއި ކުޑަކުދިންނަށް ހާއްސަ ކުޅިވަރު ކުޅޭނެ ތަންތަނާއި އާއިލީއެކު ތިބެވޭނެ ކޮޓަރިތަކާއި އަވަސް ފަރުވާ ދޭ ރޫމެއް ވެސް ހެދުމަށް ވަނީ ނިންމާފައެވެ.
މާލެ ސިޓީގެ ރައްޔިތުން ހަފްތާ ބަންދުގައި އާއިލާއާ އެކު ދަތުރު ދިއުމަށް މާލެއާ ގާތުން ރަށެއް ހާއްސަ ކުރުމަކީ ރައީސް ސޯލިހުގެ 100 ދުވަހުގެ ވައުދެކެވެ. ޕިކްނިކް ދާނެ ސަރަހައްދެއް ނެތް ރަށްރަށުގައި ރައްޔިތުން ޕިކްނިކް ދިއުމަށް ސައްހައްދެއް ނުވަތަ ރަށެއް ކަނޑައެޅުމަކީ ވެސް 100 ދުވަހުގެ ވައުދެކެވެ.