Advertisement
ކ. މާލެ
|
30 ނޮވެންބަރ 2025 | އާދީއްތަ 12:57
ރާއްޖެޓީވީގެ ފަލަސުރުހީ ޕްރޮގްރާމްގައި މާލީ ދާއިރާގެ ތަޖުރިބާކާރު ބޭފުޅެއް ކަމުގައިވާ އިސްމާއިލް ޒަރިޔަންދު ވާހަކަ ދައްކަވަނީ
ރާއްޖެޓީވީގެ ފަލަސުރުހީ ޕްރޮގްރާމްގައި މާލީ ދާއިރާގެ ތަޖުރިބާކާރު ބޭފުޅެއް ކަމުގައިވާ އިސްމާއިލް ޒަރިޔަންދު ވާހަކަ ދައްކަވަނީ
ރާއްޖެއެމްވީ
ގާނޫނު އިސްލާހު ކުރުން
ގާނޫނީ ސަރުކާރެއް ކަމަށް ދެއްކުމަށް ދަނީ ގާނޫނުތައް ބަދަލު ކުރަމުން، މިކަން ތަކުރާރު ކުރަމުންދާ ނަމަ މި ދައުލަތް ނޯންނާނެ: ޒަރިޔަންދު
ގާނޫނު ބަދަލު ކުރަނީ އަމިއްލަ ފައިދާ ނުވަތަ ކޮރަޕްޝަނުން އެހެން ބަޔަކަށް މަންފާ ހޯދައިދިނުމަށް
ރައީސް މުއިއްޒު ބޭނުންފުޅުވާ ކަންކަން ކުރެއްވުމަށް ގާނޫނުތައް ބަދަލު ކުރޭ
ހެޓިލަރު އަނިޔާވެރިވުމަށް ވެސް ގާނޫނުތައް ބަދަލުކޮށް އެ ފުރުސަތު ހޯދި

ރައީސް ޑރ.މުހައްމަދު މުއިއްޒު ގެ ސަރުކާރަކީ ގާނޫނު ސަރުކާރެއް ކަމަށް ދެއްކުމުގެ ގޮތުން ގާނޫނުތައް ބަދަލު ކުރަމުންދާ ކަމަށާއި، މިކަން ތަކުރާރު ކުރަމުންދާނަމަ މި ދައުލަތް ނޯންނާނެ ކަމަށް މާލީ ދާއިރާގެ ތަޖުރިބާކާރު ބޭފުޅެއް ކަމުގައިވާ އިސްމާއިލް ޒަރިޔަންދު ވިދާޅުވެއްޖެ އެވެ.

ރާއްޖެޓީވީގެ ފަލަސުރުހީ ޕްރޮގްރާމްގައި ޒަރިޔަންދު ވިދާޅުވީ މި ސަރުކާރު އައި ފަހުން އެކި މަރުހަލާތަކުގައި ރައީސް މުއިއްޒު ބޭނުންފުޅުވާ ކަންކަން ކުރެއްވުމަށް ގާނޫނުތައް ބަދަލު ކުރަމުންދާ ކަމަށާއި، އެއީ ގާނޫނީ ސަރުކާރެއް ކަމަށް ރައްޔިތުންނަށް ދެއްކުމުގެ ގޮތުން ކުރަމުންދާ ކަމެއް ކަމަށެވެ. އަދި ގާނޫނުތައް ބަދަލު ކުރަމުން ދަނީ އަމިއްލަ ފައިދާ ނުވަތަ ކޮރަޕްޝަނުން އެހެން ބަޔަކަށް މަންފާ ހޯދައިދިނުމުގެ ނިޔަތުގައި ކަމަށް އޭނާ ވިދާޅުވި އެވެ.

ޒަރިޔަންދު ވިދާޅުވީ މިގޮތަށް ގާނޫނާ ގަވާއިދުތަކަށް ބަދަލު ގެނައުން ތަކުރާރުކޮށް ކުރާ ކަމަށްވާނަމަ މި ދައުލަތް ނޯންނާނެ ކަމަށެވެ.

މީގެ އިތުރުން ޒަރިޔަންދު ވަނީ ހެޓިލަރު ކަންތައް ކުރި ގޮތާއި މިހާރު ރާއްޖޭގެ ހާލަތާ ގުޅޭ ގޮތުން ވެސް ވާހަކަ ދައްކަވާފަ އެވެ. އަދި ވިދާޅުވީ އެ ޒަމާނުގައި ވެސް ހެޓިލަރު އަނިޔާވެރިވުމަށް ގާނޫނުތައް ބަދަލު ކޮށް އެ ފުރުސަތު ހޯދި ކަމަށެވެ.

ދެވަނަ ބޮޑު ހަނގުރާމާގައި ހަމަލާދޭން ފަށަވަން ވެގެން އަޅުގަނޑު ކުޑަކޮށް ފޮތް އެއްޗެހި ބަލާލަން. އަޅުގަނޑު ހިތަށް އެރި ހާދަ ނުލަފާ މީހެކޭ. މީނަ ގޮސްފައި ހަމަ ގާނޫނީ ހަމައެއް ނެތި ރަށްރަށަށް އަރާ ތަޅާ ތިރި ކުރަނީއޭ. ބެލިއިރުގައި މީނާ ކޮންމެ ތަނެއްގައި ރަށެއްގައި ހިފަން ވެގެން މިހަދާ ގޮތަކީ އެމީހުން ހަމަ ބަރާބަރަށް ފާސްކޮށްގެން އެންމެ ފުރަތަމަ ނެގީ އެތަނުގެ މަޖިލިސް. މަޖިލިސް އޭނާގެ ބާރުގެ ދަށަށް ގެނައީ. އޭނާގެ ހުރިހާ ކަމެއް ކޮށްގެން އެކަން ކުރީ. މިއީ އެ ޒަމާނެއް ނޫން. މިއީ ވަރަށް ތަހުޒީބީ ޒަމާނެއް. މިޒަމާނުގައި ދިވެހިރާއްޖޭގައި ތިބީ ވެސް މިހާރު އެކަހަލަ ނުލަފާ ކަންތައްތައް ކުރެވޭ ކަހަލަ ވެރިންނަށް އެފުރުސަތު ދޭ ކަހަލަ ޒުވާނުންނެއް ނޫން. އެހެންވީމަ މީގައި އާހިރުގެ ނަތީޖާ ހަގީގަތް އަރާ ހަމަ ކުރާނެ.

މާލީ ދާއިރާގެ ތަޖުރިބާކާރު، އިސްމާއިލް ޒަރިޔަންދު

ސަރުކާރުގެ އޮފީސްތަކާއި ކުންފުނިތަކަށް އިޝާރާތް ކުރައްވައި ޒަރިޔަންދު ވިދާޅުވީ އެތަންތަން އިދާރީ ގޮތުން ހަމައިން ނައްޓައިގެންދާއިރު، މާލީ ގޮތުން ވެސް ނެއްޓިގެންދާ ކަމަށެވެ. ސަރުކާރުން މިހާރު މަސައްކަތް ކުރަނީ ކުންފުނިތަކުގެ މެންޑިޑޭޓުން ބޭރުން މަސައްކަތްތައް ހަވާލުކޮށް، އަމިއްލަ ވިޔަފާރިތައް އެ ކުންފުނިތަކުގެ ދަށަށް ގެނެސް، އަޅުވެތި ރާއްޖެ އެއް ބިނާ ކުރުމަށް ކަމަށް އޭނާ ވިދާޅުވި އެވެ.

އެގޮތުން ހައްޖު ކޯޕްރޭޝަނުން ހައްޖުގެ މަސައްކަތްތަކުގެ އިތުރުން ގެސްޓްހައުސް ވިޔަފާރި ކުރުމަށް މަސައްކަތް ކުރަމުންދާ ކަމަށާއި މޯލްޑިވްސް ޓޫރިޒަމް ޑިވެލޮޕްމަންޓް ކޯޕަރޭޝަން (އެމްޓީޑީސީ) އަށް ގިނަ ރަށްތަކެއް ދިނުމަށްފަހު، މި ވިޔަފާރީގައި އުޅޭ ކުދި ވިޔަފާރިތައް ބާރުގެ ދަށަށް ގެނައުމަށް މަސައްކަތް ކުރާ ކަމަށް ޒަރިޔަންދު ވިދާޅުވި އެވެ.

ޒަރިޔަންދު ވިދާޅުވީ ދައުލަތުން ދައުލަތުގެ ކުންފުނިތައް އުފައްދާފައި ވަނީ ރައްޔިތުންނަށް ދޭން ޖެހޭ ވަކިވަކި ބައެއް ޚިދުމަތްތައް ދިނުމަށް ކަމަށާއި، މި އުސޫލު މި ސަރުކާރު ހަލާކު ކޮށްލާފައިވާ ކަމަށެވެ.

- ކޮމެންޓް