ރައީސް ޑރ.މުހައްމަދު މުއިއްޒު ގެންދަވަނީ، އެމަނިކުފާނު ބޭނުންފުޅުވީމަ ކޮންމެ މީހެއްގެ ވެސް ބޯ ތޫނު ކަނޑިއަކުން ބުރި ކޮށްލެވޭ ގޮތަށް ގާނޫނުތައް ފާސްކޮށް، ތަސްދީގު ކުރައްވަމުން ކަމަށް ކެންދޫ ދާއިރާގެ މެންބަރު މައުރޫފް ޒާކިރު ވިދާޅުވެއްޖެ އެވެ.

ރާއްޖެޓީވީގެ ޓީވީޓޯކް ޕްރޮގްރާމް ގައި މެންބަރު މައުރޫފް ވިދާޅުވީ، ރައީސް މުއިއްޒުގެ މި ސަރުކާރުގައި ސިޔާސަތުތަކާއި ގާނޫނުތަކަށް ގެންނަ ބަދަލު ރަނގަޅު ނޫން ކަމަށާއި، އެކަމާ ދެކޮޅަށް ރައްޔިތުން ނުކުންނަން ޖެހޭ ކަމަށެވެ. އަދި މިހާރަށް ވުރެ ބޮޑަށް ރައްޔިތުން ސިޔާސީ ވާން ޖެހޭ ކަމަށް އޭނާ ވިދާޅުވި އެވެ.

މިނިވަން މީޑިއާ އާއި ހިޔާލުގައި ތަޅު އެޅުވި ބިލަށް އިޝާރާތް ކުރައްވައި މެންބަރު މައުރޫފް ވިދާޅުވީ އެ ބިލު ރައީސް މުއިއްޒު ތަސްދީގު ކުރެއްވީ ބަސް ބުނުމުގެ ހައްގު ނިގުޅައި ގަތުމުގެ މަގުސަދު ގައި ކަމަށެވެ. މިހާރު އެ ގާނޫނު ފާސް ކޮށްފައި އެއޮތީ އެމަނިކުފާނު ބޭނުންފުޅުވުމުން ބޭނުންފުޅުވާ މީހެއްގެ ބޯ ކަނޑިއަކުން ޖަހާ ބުރި ކޮށްލެވޭ ގޮތަށް ކަމަށް އޭނާ ވިދާޅުވި އެވެ. އަދި ވިދާޅުވީ ގާނޫނުތައް ފާސްކޮށް އިސްލާހުތައް ގެންނަމުންދަނީ ރައީސް މުއިއްޒު ބޭނުންފުޅުވީމަ ވަކި ކަންތައްތަކެއް ހާސިލް ކުރުމަށް ކަމަށެވެ.

މީގެ އިތުރުން މެންބަރު މައުރޫފް ވަނީ މިހާރުގެ ރައްޔިތުންގެ މަޖިލީހަށް ވެސް ވަރަށް ބޮޑަށް ފާޑު ވިދާޅުވެފަ އެވެ. އަދި ވިދާޅުވީ އެއީ ރައްޔިތުންގެ މަޖިލީހެއް ނަމަވެސް ރައްޔިތުން ތަމްސީލް ކުރާ ތަނެއް ނޫން ކަމަށެވެ.

މެންބަރު މައުރޫފް ވިދާޅުވީ އެމްޑީޕީން ގައުމަށް ގެނެސްފައިވާ ރަނގަޅު ސިޔާސަތުތަކާއި ރައްޔިތުންނަށް ދީފައިވާ ހައްގުތަކަކީ މި ސަރުކާރުން ގަބޫލު ކުރާ ކަންކަމެއް ނޫން ކަމަށެވެ. އަދި ރައީސް މުއިއްޒަކީ ވެސް ރާއްޖެ ދެކެ ލޯބިވާ ބޭފުޅެއް ނޫން ކަަމަށާއި، ދިވެހިވަންތަ ބޭފުޅެއް ނޫން ކަމަށެވެ. އެކަން މި ސަރުކާރުގެ ދެ އަހަރުގެ ތެރޭގައި ރައްޔިތުންނަށް ފެނި، ތަޖުރިބާ ކޮށްފައިވާ ކަމަށާއި، މިހާރު ވެސް ތަޖުރިބާ ކުރަމުންދާ ކަމަށް އޭނާ ވިދާޅުވި އެވެ.