ދިވެހިރާއްޖޭ ގެ އެކި ކަންކޮޅުތަކުގައި ބިނާ ކުރަމުންދާ 15 ވަރަކަށް މިސްކިތު ގެ މަސައްކަތް ރަމަޟާން މަހުގެ ކުރިން ނިންމާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެ އެވެ.

އެމަނިކުފާނު މިހެން ވިދާޅުވީ، އިސްލާމީ ކުތުބުޚާނާއަކާއި ކީރިތި ޤުރުއާނާ ބެހޭ ގައުމީ މަރުކަޒުގެ ގޮތްޕަކާއެކު، ހއ. ދިއްދޫގައި ތަރައްގީކުރި އިސްލާމީ މަރުކަޒު، ހުކުރު ދުވަހު ހުޅުވުމުގެ މުނާސަބަތުގައި، އެ ރަށު ރައްޔިތުންނަށް ތަހުނިޔާ ވިދާޅުވެ އެކްސްގައި ކުރެއްވި ޕޯސްޓެއްގަ އެވެ.

މަޝްރޫއުތައް ނިންމެވުމަށް ސަރުކާރުން އަހުމިއްޔަތުކަން ދެއްވާކަން ފާހަގަކުރައްވައި، ރަމަޟާން މަހުގެ ކުރިން ގިނަ މަސައްކަތްތަކެއް ނިންމެވުމަށް އަމާޒު ހިއްޕަވާފައިވާކަން އެމަނިކުފާނު ހާމަކުރެއްވި އެވެ.

ރަމަޟާން މަހުގެ ކުރިއަށް ނިންމެވުމަށް މަސައްކަތް ކުރައްވަމުން ގެންދަވާ މިސްކިތްތަކުގެ ތެރޭގައި ހުޅުމާލޭ ދެވަނަ ފިޔަވަހީގެ މިސްކިތެއް ވެސް ހިމެނޭ ކަމަށް އެމަނިކުފާނު ވިދާޅުވިއެވެ. އަދި ހުޅުމާލެ ދެވަނަ ފިޔަވަހީ ގައި ދާއިމީ މިސްކިތް މަދުކަމުން ކުރިމަތިވަމުންދާ ދަތިކަން ހައްލުކޮށް ދެއްވުމުގެ މަގުސަދުގައި، އެ ސަރަހައްދުގައި އިތުރު މިސްކިތެއް ބިނާކުރެއްވުމުގެ އަމަލީ މަސައްކަތް، ޑިސެންބަރު މަހު ފައްޓަވާނޭކަން ވެސް މި ޕޯސްޓުގައި އެމަނިކުފާނު ވަނީ ހާމަކުރައްވާފަ އެވެ.

މީގެ އިތުރުން ސަރުކާރުން، ރާއްޖޭގެ އެކި ކަންކޮޅުތަކުގައި މިސްކިތްތަކާއި އިސްލާމީ މަރުކަޒުތައް ބިނާކުރެއްވުމުގެ މަގުސަދަކީ، ރާއްޖޭގައި އިސްލާމީ އެއްބައިވަންތަކަށް ގާއިމުކުރައްވައި، އިސްލާމީ ސަގާފަތާއި ނޫރު ފެތުރުއްވުން ކަމުގައި އެމަނިކުފާނު ވިދާޅުވި އެވެ.

ނަމަވެސް މި ސަރުކާރުން މިހާރު ހުޅުވަމުންދާ މިސްކިތްތަތަކީ ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި ހަވާލު ކޮށްފައިވާ މިސްކިތްތަކެވެ. މިދިޔަ ހުކުރު ދުވަހު ހުޅުވި ހއ. ދިއްދޫގައި ތަރައްގީ ކުރި އިސްލާމީ މަރުކަޒަކީ ވެސް ކުރީ ސަރުކާރުން ކުރިއަށް ގެންދިޔަ މަޝްރޫއެކެވެ.

މި ސަރުކާރުގެ އައު މަޝްރޫއެއްގެ އަމަލީ މަސައްކަތް ފެށިފައިނުވާއިރު، ހުޅުމާލެ ފޭސް-2 ގައި މިސްކިތްތައް މަދުވެ، ހަދަން ފަށާފައިވާ މިސްކިތްތަކުގެ ސްޕީޑް ވަރަށް ލަސްކަން ފާހަގަކުރެވެ އެވެ. މި މިސްކިތްތަކުގެ އަމަލީ މަސައްކަތް ކުރިއަށް ނުދާތީ މިދިޔަ އަހަރުގެ ރަމަޟާން މަހު ވެސް ހުޅުމާލޭ ފޭސް-2 ގައި ދިރިއުޅޭ ރައްޔިތުންގެ ކަންބޮޑުވުން ފާޅު ކޮށްފައިވެ އެވެ.