ބަންގްލަދޭޝް ގެ މައި އެއަރޕޯޓުގެ ކާގޯ ޓަރމިނަލްގައި ހިނގި ބޮޑު އަލިފާނުގެ ހާދިސާއަކާ ގުޅިގެން އެއަރޕޯޓު ހުއްޓުމަކަށް އަތުވެއްޖެއެވެ.

ހާދިސާ އާ ގުޅިގެން ބަންގްލަދޭޝްގެ މައި އެއަރޕޯޓުން ފުރާ ފްލައިޓްތައް ހޮނިހިރު ދުވަހު ލަސް ކުރަން ޖެހި އަދި އެހެން ތަންތަނަށް ފްލައިޓްތައް ބަދަލުކޮށްފައިވާ ކަމަށް އޮފިޝަލުން ބުނެފައިވެއެވެ.

ފަޔަރ ސަރވިސް އެންޑް ސިވިލް ޑިފެންސް މީޑިއާ ސެލްގެ އޮފިސަރެއް ކަމުގައިވާ ތަލްހާ ބިން ޒަސިމް ރޮއިޓާރސް އަށް ބުނެފައިވާ ގޮތުގައި 36 ފަޔަރފައިޓިންގ ޔުނިޓުން އަލިފާން ނިއްވުމުގެ މަސައްކަތުގައި ހަރަކާތްތެރިވެފައި ވެއެވެ.

ޑާކާގެ ހަޒްރަތް ޝާހްޖަލާލް އިންޓަނޭޝަނަލް އެއަރޕޯޓުގެ އޮޕަރޭޝަންތައް ހުއްޓާލެވިފައިވާ ކަމަށް އެއަރޕޯޓުގެ އޮފިޝަލް މަސޫދުލް ހަސަން ނޫސްވެރިންނަށް ބުނެފައިވެއެވެ.

އަލިފާން ރޯވި ސަބަބާ ބެހޭ ގޮތުން އެއްވެސް މަޢުލޫމާތެއް އަދި ހާމަ ކޮށްފައެއް ނުވެއެވެ.

އެތެރޭގެ އަދި ބޭރުގެ ފްލައިޓްތަކަށް މީގެ އަސަރު ކޮށްފައިވެއެވެ.

އަލިފާން ކޮންޓްރޯލް ކުރުމުގެ މަސައްކަތުގައި އަސްކަރިއްޔާ، ކަނޑު އަސްކަރިއްޔާ އަދި ވައިގެ އަސްކަރިއްޔާ ފަޔަރ ސަރވިސްއާ އެކު ބައިވެރިވެފައިވެއެވެ.

މިއީ މި ހަފްތާގައި ބަންގްލަދޭޝްގައި ރިޕޯޓުކުރެވުނު ތިންވަނަ ބޮޑު އަލިފާނުގެ ހާދިސާއެވެ. އަންގާރަ ދުވަހު ބަންގްލަދޭޝްގެ އަންނައުނު ފެކްޓަރީއެއްގަ އާއި އެތަނާ އިންވެގެން ހުރި ކެމިކަލް ގުދަނެއްގައި ހިނގި އަލިފާނުގެ ހާދިސާއެއްގައި މަދުވެގެން 16 މީހުން މަރުވެ އަދި އިތުރު ބަޔަކަށް އަނިޔާވިއެވެ. ބުރާސްފަތި ދުވަހު އަނެއްކާ ވެސް އަލިފާނުގެ ހާދިސާއެއް ހިނގައި، ޗިޓަގޮންގގެ އެކްސްޕޯޓް ޕްރޮސެސިންގ ޒޯނެއްގައި ހުރި އަންނައުނު ފެކްޓަރީ އިމާރާތެއް އަނދައި ހުލިވެގެން ދިޔައެވެ.