ބަންގްލަދޭޝްގެ ކުރީގެ ބޮޑު ވަޒީރު ޚާލިދާ ޒިޔާގެ ޞިއްޙީ ޙާލު ގޯސްވެ، ސީރިއަސް ވެފައިވާ ކަމަށް ހާމަ ކޮށްފި އެވެ.

އުމުރުފުޅުން 80 އަހަރުގެ ޒިޔާ ހޮސްޕިޓަލްގައި އެޑްމިޓް ކޮށްފައި ވަނީ މި ހިނގާ ނޮވެމްބަރު މަހުގެ 23 ވަނަ ދުވަހު އެވެ. އެއީ ފުއްޕާމޭގެ އިންފެކްޝަނެއްގެ އަލާމާތްތަކާ އެކު އެވެ. ޒިޔާ ނިސްބަތްވެ ވަޑައިގަންނަވާ ބަންގްލަދޭޝް ނެޝަނަލިސްޓް ޕާޓީ (ބީއެންޕީ) އިން ބުނެފައި ވަނީ އެކަމަނާ އަށް ފަރުވާ ދެމުން އަންނަނީ އިންޓެންސިވް ކެއާ ޔުނިޓުގައި ކަމަށެވެ.

ބީއެންޕީގެ މިރްޒާ ފަޚްރުލް އަލަމްގީރު ހުކުރު ދުވަހުގެ ރޭ ނޫސްވެރިންނާ ވާހަކަ ދައްކަވަމުން ވިދާޅުވެފައި ވަނީ، ޒިޔާގެ ޙާލު އިތުރަށް ސީރިއަސް ވެފައިވާ ކަމަށް ހޮސްޕިޓަލްގެ ޑޮކްޓަރުން ބުނެފައިވާ ކަމަށެވެ. އެހެންކަމުން އެކަމަނާގެ ޙާލުކޮޅު ރަނގަޅުވުމަށް އެދި ވީހާ ވެސް ގިނަ ބަޔަކު ދުއާ ކޮށްދިނުމަށް ވެސް ވަނީ އެދިފަ އެވެ.

އެކަމާ ގުޅިގެން ބީއެންޕީގެ ބައެއް އިސް ލީޑަރުންނާއި، އެ ޕާޓީ އަދި ޒިޔާ އަށް ސަޕޯޓު ކުރާ ބައެއް މެމްބަރުން ވަނީ ހޮނިހިރު ދުވަހު ހޮސްޕިޓަލް އަށް ޒިޔާރާތްކޮށް، ޒިޔާގެ ޞިއްޙީ ޙާލަތާ ގުޅޭ އެންމެ ފަހުގެ މައުލޫމާތު ސާފު ކުރައްވައިފަ އެވެ.

އިނގިރޭސި ބަހުން ނެރެމުން އަންނަ ނޫހެއް ކަމަށް ދަ ޑެއިލީ ސްޓާ އިން ބުނެފައި ވަނީ، ޒިޔާ އަށް ހިތުގެ މައްސަލަ ތަކާއި، ފުއްޕާމޭގެ މައްސަލަ ތަކާއި، ކިޑްނީގެ މައްސަލަ ތަކާއި، ހަކުރު ބަލީގެ މައްސަލަ އަދި ލޮލުގެ ބައްޔެއް ވެސް ދިމާވެފައިވާ ކަމަށެވެ. އެގޮތުން ޒިޔާގެ ހިތުގައި ދާއިމީ ޕޭސް މޭކަރެއް ހަރުކޮށްފައިވާއިރި، ކުރިން ހިތުގެ ސްޓެންޓިން ޕްރޮސީޖާ ވެސް ހައްދަވާފައިވާ ކަމަށް އެ ނޫހުގައި ވަނީ ރިޕޯޓު ކޮށްފަ އެވެ.

ޒިޔާގެ ޞިއްޙީ ޙާލު ސީރިއަސްވުމާ ގުޅިގެން، 2008 ވަނަ އަހަރުން ފެށިގެން އިނގިރޭސިވިލާތުގެ ލަންޑަންގައި ދިރިއުޅެމުން އަންނަ އޭނާގެ ދަރިފުޅު ޠާރިޤު ރަޙުމާން ހޮނިހިރު ދުވަހު ސޯޝަލް މީޑިއާގައި ކުރެއްވި ޕޯސްޓެއްގައި ބަންގްލަދޭޝްގެ ރައްޔިތުންނަށް ގޮވާލާފައި ވަނީ، އޭނާގެ މަންމަ އަށް އަވަސް ޝިފާ އަކަށް އެދި ދުއާ ކޮށްދިނުމަށެވެ.

އުމުރުން މިހާރު 60 އަހަރުވެފައިވާ ރަޙުމާތް އިތުރަށް ވިދާޅުވީ، ބަންގްލަދޭޝް ރައްޔިތުންގެ ފަރާތުން މިހާރު ވެސް ޒިޔާ އަށް ލިބެމުން އަންނަ އިޙުތިރާމާއި، ލޯތްބާއި އަދި ހެޔޮ ބަސް ތަކަށް ހިތުގެ ފުންމިނުން ޝުކުރު އަދާ ކުރަން ބޭނުންވާ ކަމަށެވެ.

އެކަން ފާހަގަ ކުރައްވައި ރަޙުމާން ވިދާޅުވެފައި ވަނީ އޭނާގެ އަމިއްލަ ކޮންޓްރޯލްގައި ނެތް ޙާލަތްތަކެއްގެ ސަބަބުން މިވަގުތު ބަންގްލަދޭޝް އަަށް ވަޑައިގެންނެވެން ނެތް ކަމަށެވެ. އެހެން ނަމަވެސް، ކުއްލި ޙާލަތް ތަކުގައި މަންމައެއްގެ ލޯބި ލިބުމަށް ކޮންމެ ދަރިއެއްގެ ކިބައިގައި ހުންނަ ވިސްނުން އޭނާގެ ވެސް ހުންނަ ކަމަށް ރަޙުމާން ވިދާޅުވެފައިވެ އެވެ.

ޒިޔާ ވަނީ ތިން ދައުރު ބަންގްލަދޭޝްގެ ބޮޑު ވަޒީރުކަން ކުރައްވައިފަ އެވެ. ނަމަވެސް، 2018 ވަނަ އަހަރު ކުރީގެ ބޮޑު ވަޒީރު ޝައިޚް ހަސީނާގެ ސަރުކާރުން ވަނީ ޒިޔާގެ މައްޗަށް ކޮރަޕްޝަންގެ ދައުވާ އުފުލައި، އޭނާ ޖަލަށް ލައިފަ އެވެ. އޭގެ ފަހުން ބަލި ޙާލަތު ހުރި ގޮތުން ޤައުމުން ބޭރުން ފަރުވާ ހޯއްދެވުމުގެ ފުރުސަތު ފަހި ކޮށްދިނުމަށް ޒިޔާގެ ފަރާތުން އެދުނު ނަމަވެސް، ހަސީނާގެ ސަރުކާރުން އޭނާ އަށް އެ ފުރުސަތު ދީފައި ނުވެ އެވެ.

ނަމަވެސް، ބަންގްލަދޭޝްގެ ބޮޑު ވަޒީރު ކަމުގެ މަގާމުން ހަސީނާ އިސްތިއުފާ ދެއްވި ފަހުން ޒިޔާ ވަނީ މިނިވަން ކޮށްފަ އެވެ. ހަސީނާގެ ސަރުކާާރާ ދެކޮޅަށް ބަންގްލަދޭޝްގައި ކުރިއަށް ގެންދިޔަ ވަރުގަދަ މުޒާހަރާތަކާ ގުޅިގެން، 2024 ވަނަ އަހަރުގެ އޯގަސްޓު މަހުގެ ތެރޭގައި އޭނާ ވަނީ ޤައުމު ދޫކުރައްވައި ވަޑައިގެންފަ އެވެ.

ޒިޔާގެ ޙާލު ސީރިއަސްވުމާ ގުޅިގެން ބަންގްލަދޭޝްގެ ވަގުތީ ލީޑަރު މުޙައްމަދު ޔޫނުސް ހުކުރު ދުވަހުގެ ރޭ ނެރުއްވި ބަޔާނެއްގައި ވިދާޅުވެފައި ވަނީ، ޑިމޮކްރަސީ އަށް ބަދަލު އައިސްފައިވާ މި ދައުރުގައި ޚާލިދާ ޒިޔާ އަކީ ޤައުމަށް ވަރަށް ގިނަ ޚިދުމަތް ތަކެއް ކުރައްވާފައިވާ ބޭފުޅެއް ކަމަށެވެ. އަދި ޚާލިދާ ޒިޔާގެ ޙާލު ކޮޅު ރަނގަޅުވެ، އޭނާ ގަދަވެ ސަލާމަތުން ހުރުމަކީ ޤައުމަށް ވެސް ވަރަށް މުހިންމު ކަމެއް ކަމަށް ޔޫނުސް ވިދާޅުވެފައިވެ އެވެ.

ޒިޔާގެ ޞިއްޙީ ޙާލަތު ގޯސްވި ނަމަވެސް، 2026 ވަނަ އަހަރުގެ ފެބްރުވަރީ މަހު ބާއްވަން މަސައްކަތް ކުރަމުން އަންނަ އިންތިޚާބަށް ކެމްޕެއިން ކުރައްވާނެ ކަމަށް އެކަމަނާ ވަނީ އިއުލާން ކުރައްވައިފަ އެވެ. އެ އިންތިޚާބުގައި ޒިޔާގެ ބީއެންޕީ އިން ކުރި ހޯދާނެ ކަމަށް ލަފާ ކުރެވޭ ކަމަށް ސިޔާސީ މަސްރަހު ދިރާސާ ކުރާ ފަރާތްތަކުން ބުނެ އެވެ.