މިނިވަން މީޑިއާ ނެތިކޮށްލުމަށް ސަރުކާރުން ފަހަތުގައި އޮވެގެން ރައްޔިތުންގެ މަޖިލީހަށް ހުށަހަޅާފައިވާ ބިލާ ގުޅިގެން ޚާއްސަ ކަވަރޭޖެއް ހޮނިހިރު ދުވަހު ހަވީރު 4:15 ގައި ފަށަން ހަމަޖެހިއްޖެއެވެ.

މި ކަވަރޭޖް، ހޮނިހިރު ދުވަހުގެ 4:15 ގައި ފަށަން ހަމަޖެހިފައިވާއިރު ރާއްޖެޓީވީގެ އިތުރުން އެހެން ޓީވީ ޗެނަލް ތަކުންވެސް ވަގުތުން ގެނެސްދޭނެ އެވެ. "މީޑިއާ ކޮންޓްރޯލް ބިލު ބޭރުކުރޭ" ނަމުގައި ޚާއްސަ ކަވަރޭޖެއް ރާއްޖެޓީވީން ފަށަން ނިންމީ، މި ބިލަކީ ދިވެހިރާއްޖޭގެ ޤާނޫނުއަސާސީގެ 27 ވަނަ މާއްދާއިން ކަށަވަރުކޮށްދީފައިވާ ޚިޔާލުފާޅުކުރުމުގެ މިނިވަންކަމާއި، 28 ވަނަ މާއްދާއިން ކަށަވަރުކޮށްދީފައިވާ ނޫސްވެރިކަމުގެ މިނިވަންކަމާ ޚިލާފު ބިލަކަށް ވާތީ އެވެ.

އަދި މި ބިލު ފާސްވެއްޖެނަމަ މޯލްޑިވްސް މީޑިއާ އެންޑް ބްރޯޑްކާސްޓިންގ ކޮމިޝަނަށް މީޑިއާ ދާއިރާގެ މައްޗަށް ބޮޑެތި ބާރުތަކެއް ލިބިގެންދާނެއެވެ. މީގެ ތެރޭގައި މީޑިއާ އައުޓްލެޓްތައް ހުއްޓުވުމާއި، ނޫސްތަކުގެ ވެބްސައިޓްތައް ބްލޮކްކުރުމާއި، ބްރޯޑްކާސްޓް ހުއްޓުވުމުގެ ބާރު ލިބިގެން ދިއުން ހިމެނެ އެވެ.

މީގެ އިތުރުން ބިލުގައި ހިމެނޭ ޖޫރިމަނާތަކުގެ ތެރޭގައި އަމިއްލަ ނޫސްވެރިންނަށް 5,000 އިން 25,000 ރުފިޔާއާ ހަމައަށް، އަދި މީޑިއާ އައުޓްލެޓްތަކަށް 100,000 ރުފިޔާއާ ހަމައަށް ޖޫރިމަނާ ކުރެވޭނެ ކަމަށް ބަޔާންކޮށްފައިވާކަން މި ސިޓީގައި ފާހަގަކޮށްފައިވެ އެވެ.

ހޮނިހިރު ދުވަހު ފަށާ މި ކަވަރޭޖުގައި ރާއްޖޭގެ އެކި މީޑިއާތަކުގައި މަސައްކަތް ކުރައްވާ ނޫސްވެރިންނާއި، އަދި މި ދާއިރާގެ ފުންނާބު އުސް، ސީނިއާރ ގިނަ ނޫސްވެރިން ބައިވެރިވާނެއެވެ. އަދި މި ކަވަރޭޖުގައި މި ބިލުގެ ނުރައްކާތެރިކަމާއި ބެހޭގޮތުން ގިނަ މައުލޫމާތުތަކެއް ހިއްސާ ކުރެވިގެން ދާނެއެވެ.