Advertisement
ކ. މާލެ
|
28 އޯގަސްޓް 2025 | ބުރާސްފަތި 16:12
ދިޔަމިގިލި ސްކޫލުގެ ބެލެނިވެރިން މުޒާހަރާ ކުރަނީ
ދިޔަމިގިލި ސްކޫލުގެ ބެލެނިވެރިން މުޒާހަރާ ކުރަނީ
ރާއްޖެއެމްވީ
ތ. ދިޔަމިގިލި ސްކޫލް
ދިޔަމިގިލި ސްކޫލުގައި އޭލަވަލްއަށް ކިޔަވައިދިނުމުގެ ހުއްދަ ދިނުން ލަސްވުމާ ގުޅިގެން ބެލެނިވެރިން މުޒާހަރާއަށް
އިމްތިހާން ހެދި 14 ދަރިވަރުންގެ ތެރެއިން 12 ދަރިވަރަކަށް 11ގައި ކިޔެވުމަށް ޝަރުތު ފުރިހަމަވޭ
މި އަހަރު އޭލަވަލްއަށް ކިޔަވައިދިނުމުގެ ހުއްދަދޭނެ ކަމަށް މިނިސްޓްރީން ބުނި ނަމަވެސް މިއަދާ ހަމައަށް ޖަވާބެއް ދީފައިނުވޭ
ބެލެނިވެރިން މުޒާހަރާ ކުރަމުންދަނީ އޭލަވަލްއަށް ކިޔަވައިދިނުމުގެ ހުއްދަ ދިނުމާ ގުޅޭގޮތުން ވާނުވާ ނޭނގޭތީ

ތ.ދިޔަމިގިލި ސްކޫލުގައި އޭލަވަލްއަށް ކިޔަވައިދިނުމުގެ ހުއްދަ ދިނުން ލަސްވުމާ ގުޅިގެން އެރަށު ސްކޫލުގެ ބެލެނިވެރިން މުޒާހަރާއަށް ނުކުމެ، ސްކޫލު ގޭޓުގައި ތަޅު އަޅުވައިފި އެވެ.

މި މުޒާހަރާ ފަށާފައިވަނީ ބުރާސްފަތި ދުވަހުގެ މެންދުރުފަހު 1:00 ގައެވެ.

މި މިމުޒާހަރާއާ ގުޅިގެން އެރަށު ކައުންސިލުގެ ރައީސް އަހުމަދު މޫސާ ވިދާޅުވީ އެރަށުގެ ސްކޫލުގައި 11، 12 އުފެއްދުމަށް މިދިޔަ 6 އަހަރު ވަރަށް ގިނަ މަސައްކަތްތައް ކޮށްފައިވާ ކަމަށާއި، މިދިޔަ އަހަރު ވެސް އޭލަވަލްއަށް ކިޔެވުމުގެ ހުއްދަދޭނެ ކަމަށް މިސަރުކާރުން ބުނެފައިވާ ކަމަށެވެ. ނަމަވެސް އެ ހުއްދަ ލިބިފައިނުވާ ކަމަށް އޭނާ ވިދާޅުވި އެވެ.

އަބަދުވެސް އެރަށުގެ ސްކޫލުންގެ ދަރިވަރުން ރަނގަޅު ނަތީޖާ ހޯދާކަން ފާހަގަކުރައްވައި އަހުމަދު މޫސާ ވިދާޅުވީ ނޭޝަނަލް ޓޮޕްޓެންގައި ވެސް ދަރިވަރުން ހިމެނޭ ކަމަށާއި، މިދިޔަ އަހަރުގެ އޯލަވަލްގެ ނަތީޖާ ވެސް ވަރަށް ރަނގަޅު ކަމަށެވެ. އަދި މިދިޔަ އަހަރުގެ އޯލަވަލްގެ ނަތީޖާ ލިބިފައިވާއިރު، އިމްތިހާން ހެދި 14 ދަރިވަރުންގެ ތެރެއިން 12 ދަރިވަރަކަށް 11ގައި ކިޔެވުމަށް ޝަރުތު ފުރިހަމަ ވެފައިވާ ކަމަށެވެ. ނަމަވެސް އެދަރިވަރުންނަށް ރަށުގައި ތިބެގެން ކިޔެވޭނެ ގޮތެއް ނެތުމަކީ ބެލެނިވެރިންގެ ވަރަށް ބޮޑު ކަންބޮޑުވުމެއް ކަމަށް އޭނާ ވިދާޅުވި އެވެ.

ދިޔަމިގިލި ސްކޫލަކީ އެ އަތޮޅުން އެންމެ ރަނގަޅު ނާތީޖާ ހޯދާ ސްކޫލުކަން އޭނާ ފާހަގަކުރެއްވި އެވެ.

އަހުމަދު މޫސާ ވިދާޅުވީ މިއަހަރު ވެސް އޭލަވަލްއަށް ކިޔަވައިދިނުމުގެ ހުއްދައަށް އެދި ސްކޫލުގެ ފަރާތުންނާއި، ކައުންސިލްގެ ފަރާތުން ސަރުކާރުގައި އެދިފައިވާ ކަމަށާއި، އެޑިޔުކޭޝަން މިނިސްޓްރީއަށް ސިޓީ ފޮނުވާފައިވާ ކަމަށެވެ. އަދި މި އަހަރު އޭލަވަލްއަށް ކިޔަވައިދިނުމުގެ ހުއްދަދޭނެ ކަމަށް މިނިސްޓްރީން ބުނި ނަމަވެސް މިއަދާ ހަމައަށް ޖަވާބެއް ދީފައިނުވާ ކަމަށް އަހުމަދު މޫސާ ވިދާޅުވި އެވެ.

މީގެ އިތުރުން އަހުމަދު މޫސާ ވިދާޅުވީ ބެލެނިވެރިން މުޒާހަރާ ކުރަމުންދަނީ އޭލަވަލްއަށް ކިޔަވައިދިނުމުގެ ހުއްދަ ދިނުމާ ގުޅޭގޮތުން ވާނުވާ ނޭނގޭތީ ކަމަށާއި، މިމައްސަލައާ ގުޅިގެން ޖަވާބެއް ނުލިބޭތީ ކަމަށެވެ.

މިއީ ކައުންސިލުން ވެސް ކަންބޮޑުވާ މައްސަލައެއްކަން ފާހަގަކުރައްވައި އަހުމަދު މޫސާ ވިދާޅުވީ މިކަމަށް އަވަސް ހަލެއް ބޭނުންވާ ކަމަށާއި، މިކަމުގައި ބެލެނިވެރިންނާއި، ދަރިވަރުން ތިބީ ވަރަށް ބޮޑު ކަންބޮޑުވުމެއްގެ ތެރޭގައި ކަމަށެވެ. އަދި ސްކޫލުގެ ގޭޓްގައި ތަޅުއަޅުވާފައިވާ ކަމަށް އޭނާ ވިދާޅުވި އެވެ.

- ކޮމެންޓް