ޕީއެންސީގެ ޕީޖީ ލީޑަރ ފަލާހަށް

ކޮންމެހެން ގަތަގަތާފައި ސަލާމުގެ ޖިޒީތަކާއި މާބޮނޑިތައް ފޮނުވާން ޖެހޭނެ ތަނެއް އޮތްހެނެއް ހީއެއް ނުވެއެވެ. އަމުދަކުން އަހަރެމެންމީ ލޯބިވެތި ބަސްތަކުން ހިތްދަމައިގަންނަ ކަހަލަ ފަތިވަރު ތަކަކުން ބުނާން ޖެހޭވަރުގެ ލޯބިވެރިންނެއް ނޫންވިއްޔާއެވެ.

ފަލާހުއެވެ. މަށަކީ ފަލާހުގެ އުފަން ދާއިރާގެ ފަލާހު ކުރިން ނިސްބަތްވި ޕާޓީގެ ފަލާހުއާ އެކުއެކީގައި އުޅުނު މީހަކީމެވެ. މިއަދު ކިތަންމެ ނޭނގޭކަމަށް ހެދިއަސް އަދި ތިޔަހުރި ހިސާބުން މަށަށް އިސްއުފުލާ ނުލިއަސް މަށަކީ ފަލާހުގެ އާޖުފާޖު ދަންނަ މީހަކީމެވެ. މުޅި ވަންހަ ކޮޅާއި ގާތްތިމާގެ އައުލާދު އެއްކޮށް ހިތުދަސް މީހަކީމެވެ. ތިޔަ ހިސާބަށް އާދެވުނު ގޮތާ، ތިޔަކަމުގައި ކުރި ކަންކަމާ ގަންގަނޑުތައް އަދި ނެގިހާ ޝޯޓް ކަޓަތަކާއި މިހިރަ މިހިރަ ކަންކަމަކީ މަށަކަށް އާ ކަންކަމެއް ނޫނެވެ. އިއްޔެ މެންދުރުގެ ކަންކަންހެން މަގޭ ހަނދާނުގައި ވަރަށް ރަނގަޅަށް އެކަންކަން ހަރުލާފައި އެބަހުއްޓެވެ.

މަށަކީ ފަލާހުއަށް ނަސޭހަތްތެރިވެ ފަލާހުއަށް ހެޔޮގޮތް ބުނެދޭން ޖެހޭވަރުގެ ލާއިގް އަދި އެފަދަ ކަމެއް ކުރާން ޖެހޭވަރުގެ އެހެން މުހުތާދެއްވެސް އޮތް މީހެއް ނޫނެވެ. އެކަމަކުވެސް މިހިރަ ކަންކަން ވެގެންދާ ގޮތާ ތިޔަ ކިޔޭ އެއްޗިއްސާ، ތިޔަހުރި ބާރުވެރިކަމުގައި ތިމާއަށް ތިމާ ފެންނަވަރުވީމާ ދެން އެއްޗެކޭ ބުނެލާ ހިތްވީއެވެ.

ފަލާހުއެވެ. ރުކެއްގެވެސް އެރޭނީ އެންމެ ކުރިއަށެވެ. ދެން ޖެހޭނީ ފައިބާށެވެ. ނުފައިބާން އިހާ ތަކުގައި ބަގުޑި ބައްދަބައްދާ އޮއްވާ ދެން ފެންނާނީ ރުއްބުޑަށް ގުޅައަކަށް ޖެހިފައި އޮތްތަނެވެ. ހަމަ އެބީދައިން ބާރާއި އާރަކީވެސް ވަރަށް ފަސޭހައިން ގެއްލިދާއެއްޗެކެވެ. އެކަމަށް ނަގަނީ ވަރަށް ކުޑަ ހިނދުކޮޅެކެވެ. އަނިޔާވެރި ޖައްބާރު ވެރިކަންތައްވެސް ތާއަބަދަކު ދެމިއެއް ނުބޭއްވެއެވެ. މަތިންގަޑި ޖެހުނީމާ އެހުރިހާ ކަމެއްވެ ނިމިދެއެވެ. އެއަކަށް ދެއްކޭނެ ބާރެއް ކުރެވޭނެ ކަމެއް ނޯވެއެވެ. އެނަޒަރިއްޔާތުން ބަލާއިރު ތިޔަހުރި ޝާއްބަކަން ކެނޑި މީހާ ބަދަލުވާކަށް މާގިނަ ވަގުތެއް ނުނަގާނެކަމީ އިލާހީ ޤާނޫނެވެ.

ފަލާހުއެވެ. މަޝްހޫރު ނައިފަރު ދޮހޮއްކޮގެ ލަވައެއްގައި ބުނެއެވެ. "އެދޭނަމަ ލޯބިވާންވީވެސް ހިތަށް ކުޅަދާނަ މިންވަރަކަށެވެ. އަދާވާތްތެރި ވިއަސް ވާންވީ ހިތަށް ކުޅަދާނަ މިންވަރަކަށެވެ." އެއ ިވަރަށް ބޮޑު ތެދެކެވެ. މީހަކު ދެކެ ލޯބި ވެވިގެން ވިއަސް ނުވަތަ މިހަކަށްޓަކައި ހުޝާމިދުކޮށް އަޅުދާސްތުވިއަސް އޭނާ ބުނާގޮތެއް ހަދާނަމޭ ހިތައި މިއުޅޭ ނޫސްވެރިންނާ ތިޔ ަޖައްސާލީ މާ ވަރަކަށެވެ. ކިޔާން ނުވާވަރުގެ އެއްޗެހި ކިޔައި ބުނާން ނުވާޒާތުގެ އެއްޗެހި ތިޔަ ކިޔަނީ އެއްވެސް ބަލާލުމެއްނެތިއެވެ.

ފަލާހޫއެވެ. ނިކަން ވިސްނާލަ ބަލާށެވެ. ފަލާހުއޭ ކިޔައިގެން އެރިހާ އަޑުތައް އެވެރިންގެ ގަލަންތަކުން ލިޔުނު ހެއްޔެވެ. ނުދައްކާ ތިޔަ ދޫކޮށްލި ވާހަކަތައް އެވެރިން ލިޔެ ހެދިހެއްޔެވެ. ތިޔަ ރަށު މީހުންނާ ފަލާހު އެނގޭހާ އެންމެނަށް އެނގޭ ބޮޑު ސިއްރުތައް އެމީހުން ގަނޑަށް ތިރިކޮށް އެވާހަކަތައް ނެރުނުހެއްޔެވެ. ނޫނެކެވެ. އެހެނެއް ނުހަދައެވެ. އަމުދުން ފަލާހަކީ ތިޔަބުނާ ޒާތުގެ މީހެކޭވެސް އެވެރިންނެއް ނުބުނެއެވެ. މަށަށް ތިޔަ ވާހަކަތައް ފަލާހު ދެއްކީމާ އައީކީ އަމަށަކު ހިންޏެއް ނޫނެވެ. އެބުނާ ގިރިއެއްގެ ވާހަކަތަކުގެ ވާހަކަތައް ދެއްކިއިރޔުވެސް ނޫސްވެރިން ފަލާހުގެ ނަމެއް ނުކިޔައެވެ. ދެން ކޮންމެހެން ރުޅިއައިސް ރަތްވެފައި ހުރެގެން އޭގައި ޖެހުމަކީ ކުރެވުނު ވަރަށް ދެރަކަމެކެވެ.

ފަލާހޫއެވެ. މަ ބުނީތީ އެންމެ މިސާލަކަށް ބަލާލަބަލާށެވެ. އޭރުން ކަން މިހިނގާ ގޮތާއި ނޫސްވެރިންނަކީވެސް ކޮންބައެއްކަން ފަހުމް ވާނެއެވެ. ނިކަން ހަމަ ޖެހިލާފައި މިބުނާ މިސާލަށް ބަލާލާށެވެ.

ފަލާހޫއެވެ. ފަލާހު ތިޔަ ދެއްކި ވާހަކަތަކާއެކު ސޯޝަލް މީޑިޔާގެ ޕްލެޓް ފޯމްތަކުގައި ހީވީ ފަލާހު ނޮޅާ ކާލަފާނެ ހެންނެވެ. ނުކިޔާކަ އެއްޗެއް ނެތެވެ. މައިންދަރިންނާއެކު ބަލާނުލެވޭވަރުގެ ހަޑި ވާހަކަތައްވެސް އޭގައި އެހުރީ މުޅި ދުނިޔެއަށް ފެންނާށެވެ. އެކަމަކު އެއިން ޒައްރެއްގެ މިންވަރުވެސް ނޫސްވެރިން ލިޔުނު ހެއްޔެވެ. ނުލިޔާނެއެވެ. އެއީކީ އަދި ތިޔަ ހީކުރާ ޒާތުގެ މީހުންނެއް ނޫނެވެ.

ފަލާހޫއެވެ. ފަލާހު ނުބުންޏަކަސް ފަލާހުމެނަށް ވެގެން ދަންޏާ މިހާރުވެސް އެތައް ނޫސްވެރިއަކު މިހާރު އޮންނާނީ އުލު ބައިނދާފައެވެ. ތިޔަ ހަދަން އުޅޭ ގާނޫނެއް ހެދިއަސް ނުހެދިއަސް އެމީހުން ނުގޮތަކަށް ކަސިޔާރުވެ ހަމައިން ބޭރުން އެއްޗެއް ލިޔެފިއްޔާ އެމީހުންނަށް ފިޔަވަޅު އަޅައި ލައިފާ އޮންނާނީ ޖަލުގައިކަން އެއީ ކަށަވަރުކަމެކެވެ. ފަލާހުމެން ހިތުހުރި ގޮތަކަށް ހުކުމް ޖަހައިދޭން ކޯޓުތައް އަނބުރާލާފައިވާއިރު އެއީ ފެންބޮއެފާ ވައެއް ލުންފަދަ ކަމެކެވެ. ވެރިކަމާ ދެކޮޅު ފެނަކަފަދަ ކުންފުނިތަކުގެ ނިކަމެތި މުވައްޒަފުންނަށް ކުށެއްނެތި ފަލާހުމެން ތިޔަ ހަދާގޮތުން އެއީކީ ނުކޮށް ދޫކޮށްލާނެ ކަމެއް ނޫނެވެ.

ފަލާހުއެވެ. މަދެން މާދިގު ހާސަރުތަކެއް ދަމާކަށް ނެތީމެވެ. ގަދަ ކަނޑަކަށް ދަތުރަށް އަރަން ޖެހޭނީ ގަދަ ކޮޅިގަނޑުގައިވެސް ޖެހޭނެކަން އެނގިހުރެއެވެ. އާދައިގެ މީހަކަށްވުރެ މަތިފަޑީގައި ތިބޭ މީހުންނަށް އަމާޒުވާ ލޯތައްވެސް އިތުރުވާނެއެވެ. އެކަންކަމަށް ފައިނަގަންވާނީ އެވަރުގެ ހިތްވަރެއް ހުރެގެންނެވެ. އެކަމަކު ބޮލިރޮދި ކެނޑިގެން އެހެން މީހުން އުޅޭ ޒާތަކަށް ތިޔަފަދަ މީހުން އުޅުމަކީ ހުތުރު ކަމެކެވެ.

ނިންމާލަމުން ނަސޭހަތަކަށްވެސް ބުނެލާނަމެވެ. ނޫސްވެރިން އަދިވެސް ތިބޭނީ ހަމައިގައެވެ. ކަނޑައެޅިފައިވާ ތަރަހައިގެ ތެރޭގައެވެ. އެކަމަކު ހަނދާން ކުރައްޗެވެ. ނޫސްވެރިކަމާ ސޯޝަލް މީޑިޔާގައި ގޮވާހާ އެއްޗަކާ އެއީ މުޅިން ދޭއްޗެކެވެ. މިފަހަރު ތިޔަ ކުޅެވުނީ އާދައިގެ ބަޔަކާ ނޫނެވެ. ބަދަލު ހިފަން އެމީހުން ކަމެއް ނުކުރިއަސް ތިޔަ ކުޅެވުނީ ކުދި މީދަލުގެ ސަތޭކަ މީދަލާއެވެ. އެއީ ސޯޝަލް މީޑިޔާއާއެވެ. އެވެރިންނަށް ތިޔަ ދޫކޮށްލީ ނަގަނަގާފައި ދައްކާނެ އެތައް ވާހަކައެކެވެ. އެއަށް ކެތް ނުވަންޏާ ރަނގަޅުވާނީ އަވަހަށް ތިޔަކަމުން އެއްކައިރި ވެލިއްޔާއެވެ. އެކަމަކާ ނޫސްވެރިންނަކާ ވާކަމެއް ނޫނެވެ. ވަރަސް ސަލާމެވެ.