ރައީސުލްޖުމްހޫރިއްޔާގެ ނައިބު ޙުސެއިން މުޙައްމަދު ލަޠީފް (ސެމްބެ) އިންސްްޓަގްރާމް އެކައުންޓުން ތަފާތު ސްޓޯރީއެއް ޕޯސްޓު ކުރައްވައިފި އެވެ.

ނައިބު ރައީސް ކަމުގެ މަޤާމަށް ވަޑައިގެންނެވުމުގެ ކުރިން ސެމްބެ ގެންގުޅުއްވީ އިންސްޓަގްރާމް އެންމެ އެކައުންޓެކެވެ. ނަމަވެސް، ނައިބު ރައީސް ކަމަށް ވަޑައިގެންނެވި ފަހުން ވަނީ އިތުރު އިންސްޓަގްރާމް އެކައުންޓެއް ހައްދަވައިފަ އެވެ. އެގޮތުން "ވީޕީހުސެންސެމްބެ" ގެ ނަމުގައި ވަނީ އެކައުންޓެއް ހައްދަވައިފަ އެވެ.

އެންމެ ކުރިން ވެސް ނައިބު ރައީސް ގެންގުޅުއްވަމުން އައީ "ހުސެންސެމްބެ"ގެ ނަމުގައި ހައްދަވާފައިވާ އެކައުންޓެވެ. މި އެކައުންޓުގައި ހޮނިހިރު ދުވަހުގެ އިރު އޮއްސެނިކޮށް ނައިބު ރައީސް ވަނީ ސްޓޯރީއެއް ޕޯސްޓު ކުރައްވައިފަ އެވެ.

އިނގިރޭސި ބަހުން ލިޔެފައިވާ އެ ސްޓޯރީ ޕޯސްޓުގައި ބުނެފައި ވަނީ، "ވަންސް ޔޫ ފީލް އަންއެޕްްރިޝިއޭޓެޑް، ލީވް" މިހެންނެވެ. އޭގެ މާނައަކީ، ތިމާގެ އަގު ވަޒަން ނުކުރެވޭ ނަމަ، ދާށެވެ.

ނައިބު ރައީސްގެ މި ޕޯސްޓާ ގުޅިގެން ސޯޝަލް މީޑިއާގައި އެކި ފަރާތްތަކުން އަންނަނީ އެކި ޝުއޫރުތައް ފާޅު ކުރަމުންނެވެ. އެގޮތުން ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒުގެ ސަރުކާރުގައި ނައިބު ރައީސްގެ މާ ބޮޑު ދައުރެއް ނޯންނަ ކަމަށް ވަނީ ފާހަގަ ކޮށްފަ އެވެ.

މީގެ އިތުރުން ރައީސް މުޢިއްޒު އާއި، ނައިބު ރައީސްގެ ގުޅުން ގޯސްވެފައިވާ ކަމަށް ވެސް ގިނަ ބަޔަކު އަންނަނީ ސިފަ ކުރަމުންނެވެ. އެގޮތުން ސަރުކާރުގެ ގިނަ ކަންކަމުން ނައިބު ރައީސް ވަރަށް ބޮޑަށް އެއް ފަރާތް ކޮށްފައި ހުންނަވާ ވާހަކަ ވެސް އެކި ފަރާތްތަކުން އަންނަނީ ދައްކަމުންނެވެ.

ހަމަ އެހެންމެ، ނައިބު ރައީސް ސެމްބެ އާއި ކުރީގެ ރައީސް ޢަބްދުﷲ ޔާމީން ޢަބްދުލް ޤައްޔޫމް އާ ގާތް ގުޅުމެއް އޮންނާތީ، އެކަމާ ރައީސް މުއިއްޒުއާ ނައިބު ރައީސްއާ ދެމެދު މައްސަލަ ޖެހޭ ކަމަށް ވެސް ގިނަ ބަޔަކު އަންނަނީ ފާހަގަ ކުރަމުންނެވެ.

މީގެ ކުރިން ރައީސް ޔާމީން، އަދި ޕީޕީއެމް-ޕީއެންސީ އެކުގައި މަސައްކަތް ކުރިއިރު، ނައިބު ރައީސް ސެމްބެ އަކީ ވަރަށް ބޮޑަށް ރައީސް ޔާމީންގެ ދިފާއުގައި ވާހަކަ ދެއްކެވި ބޭފުޅެކެވެ. އަދި ރައީސް ޔާމީން އާއި ނައިބު ރައީސް ސެމްބެއާ ދެެމެދު އޭރު ވަރަަށް ގާތް ގުޅުމެއް ވެސް އޮތެވެ.

އެކި އެކި ޖަލްސާ ތަކުގައި އަދި އިންޓަވިޔުތަކުގައި ވެސް ރައީސް ޔާމީން ވަނީ އެކަން ފާހަގަ ކުރައްވައިފަ އެވެ. ރައީސް ޔާމީން އާއި ރައީސް މުޢިއްޒުއާ މައްސަލަ ޖެހުނު ފަހުން، ސަރުކާރުގެ އެކި ބޭބޭފުޅުން ރައީސް ޔާމީން އަށް ސީދާ ގޮތުން، އަދި ނުސީދާ ގޮތުން ވެސް ބަހުގެ ހަަމަލާތައް އަމާޒު ކުރި ނަމަވެސް، ނައިބު ރައީސް ސެމްބެގެ ފަރާތުން އެފަދަ ކަމެއް ފެނިފައި ނުވެ އެވެ.

މުއިއްޒު ގެ ރަނިންގމޭޓަކަށް ސެމްބެ ހަމަ ޖެއްސެވީ ވެސް އެމަނިކުފާނު ކަމަށް ޔާމީން ވަނީ ވިދާޅުވެފައެވެ.