މުޅި ދުނިޔެ އިން ކަންބޮޑުވުން ފާޅު ކުރަމުން ދަނިކޮށް ޣައްޒާ ސިޓީ ހިފުމަށް ނިންމި ނިންމުމާ އެއް ގޮތައް ކުރިއަށް ދާނެ ކަމަށް އިސްރާއީލުގެ ބޮޑު ވަޒީރު ބެންޖަމިން ނަތަންޔާހޫ ހާމަ ކޮށްފިއެވެ.

އިސްރާއީލުގެ ބޮޑުވަޒީރު ބެންޖަމިން ނަތަންޔާހޫ އާދީއްތަ ދުވަހު ހާމަ ކުރި ގޮތުގައި، އެ ޤައުމުގެ ސަލާމަތީ ކެބިނެޓުން އެންމެ ފަހުން ފާސްކުރި ޣައްޒާ ސިޓީއާ ގުޅޭ އައު ޕްލޭނަކީ "ހަނގުރާމަ ނިންމާލުމަށް އޮތް އެންމެ ރަނގަޅު ގޮތް" ކަމަށެވެ.

"މިއީ ހަނގުރާމަ ނިންމާލުމަށް އޮތް އެންމެ ރަނގަޅު ގޮތް، އަދި އެންމެ އަވަހަށް ނިންމާލުމަށް އޮތް އެންމެ ރަނގަޅު ގޮތް ވެސް މެއެވެ،" ބޮޑުވަޒީރު ވިދާޅުވިއެވެ.

ނޫސްވެރިންގެ ބައްދަލުވުމެއްގައި ނަތަންޔާހޫ ވިދާޅުވީ، ހަމާސް އިން އެ ޖަމާޢަތުގެ ހަތިޔާރު ބެހެއްޓުމަށް އިންކާރު ކުރުމާ ގުޅިގެން، އިސްރާއީލަށް "މަސައްކަތް ފުރިހަމަކުރުމާއި" ހަމާސް ބަލިކުރުން ނޫން އެހެން ގޮތެއް ނެތް ކަމަށެވެ.

އަދި ނަތަންޔާހޫ ވިދާޅުވީ، ޣައްޒާއާ ގުޅޭ އައު ހަމަލާގެ ޕްލޭންތަކުގެ މަޤްޞަދަކީ ހަމާސްގެ ބާރު ގަދަކޮށް އޮތް ދެ މައި މަރުކަޒު ހިފުން ކަމަށެވެ.

ނަތަންޔާހޫ ވިދާޅުވީ، ޣައްޒާގައި ސިފައިން ފަށަން ތައްޔާރު ވަމުންދާ އައު އޮޕަރޭޝަން ކުރިއަށް ދާނީ "ކުރު މުއްދަތެއްގެ ތާވަލެއްގެ" ތެރޭގައި ކަމަށެވެ.

"އަޅުގަނޑު ވަކި ޚާއްޞަ މުއްދަތުތަކެއްގެ ވާހަކަ ދައްކާކަށް ނެތިން، އެކަމަކު އަޅުގަނޑުމެން މި ވާހަކަ ދައްކަނީ ވަރަށް ކުރު މުއްދަތެއްގެ ތެރޭގައި މިކަން ފުރިހަމަ ކުރުމަށް ކަމަށް. އެއީ އަޅުގަނޑުމެން ބޭނުން ވަނީ ހަނގުރާމަ ނިންމާލަން،" ބޮޑުވަޒީރު ވިދާޅުވިއެވެ.

ޣައްޒާ ގައި ހަނގުރާމަ ފުޅާ ކުރުމަށް އޭނާގެ ކެބިނެޓުން ނިންމި ނިންމުމާ ދެކޮޅަށް އުފެދިފައިވާ ފާޑުކިޔުންތަކަށް ރައްދު ދެއްވަމުން ނަތަންޔާހޫ ވިދާޅުވީ، އެހެން ފަރާތްތަކުގެ އެހީތެރި ކަމެއް ނެތި ވެސް ހަނގުރާމަ ކުރުމަށް އެ ޤައުމު ތައްޔާރަށް އޮތް ކަމަށެވެ.

"އަޅުގަނޑުމެން ހަނގުރާމައިގައި ކާމިޔާބު ހޯދާނަން، އެހެން ފަރާތްތަކުގެ އެހީތެރިކަން ލިބުނަސް އަދި ނުލިބުނަސް،" ބޮޑުވަޒީރު ވިދާޅުވިއެވެ.