ލ. މާވަށުގައި ތޫނު އެއްޗަކުން ހަމަލާދީ ޒަހަމްކޮށްލުމުގެ ސަބަބުން ނިޔާވެފައިވާ ޒުވާނާގެ ހަށިގަނޑު އިތުރު ތަހުގީގަށް މާލެ ގެނެސްފިއެވެ.

އޭނާގެ ހަށިގަނޑު މާލެ ގެނެސްފައި ވަނީ ހޯމަ ދުވަހުގެ ރޭ ދަންވަރުގެ ވަގުތެއްގައެވެ.

ލ.މާވަށުގައި ވަޅި އަކުން ހަމަލާ ދީ މަރާލި މޫސާ އިބްރާހިމް އަށް ހަމަލާ ދޭން ބޭނުންކުރި ކަމަށް ބެލެވޭ ވަޅި ފުލުހުން މޫދަށް ފީނައިގެން ފުލުހުން ވަނީ ހޯދާފައެވެ. އެގޮތުން ފުލުހުންގެ ޓީމަކުން މޫދަށް ފީނައިގެން ވަޅި ހޯދާފައިވާ ކަމަށް ފުލުހުން ވަނީ ބުނެފައެވެ.

މި ހާދިސާގައި ނިޔާވީ ލ. މާވަށަށް ނިސްބަތްވާ ޢުމުރުން 29 އަހަރުގެ މޫސާ އިބްރާހިމްއެވެ. އޭނާ އަށް ހަމަލާ ދީފައިވަނީ ފަހަތުން ގޮސް ނޭނގި ހުއްޓާ ކަމަށް މައުލޫމާތު ލިބިފައިވެއެވެ. މީގެ އިތުރުން މި މައްސަލައިގައި ތުހުމަތުކުރެވޭ މީހާ ފުލުހުން މިހާރު ވަނީ ހައްޔަރުކޮށްފައެވެ.

ހައްޔަރުކޮށްފައިވަނީ ހދ.ނޮޅިވަރަންފަރު، އަސަރީ މަންޒިލް، އުމުރުން 29 އަހަރުގެ މުޙައްމަދު އިބްރާހިމް އެވެ. މީނާ އަކީ މަސްތުވާ ތަކެތީގެ ރެކޯޑް އޮންނަ މީހެއް ކަމަށް ފުލުހުން ބުނެފައިވެއެވެ.

ފުލުހުން ބުނީ މިހާތަނަށް ބެލި ބެލުމުން އެނގޭ ގޮތުން މިއީ ދެ މީހެއްގެ ދެމެދުގައި ހިނގާފައިވާ މާރާމާރީ އެއް ކަމަށެވެ. މި މާރާމާރީ ހިނގީ ހޯމަ ދުވަހު 10:00 ޖަހާކަންހާއިރު އެ ރަށު ވޮލީ ކޯޓް ސަރަހައްދުގައެވެ.

ދިވެހި ފުލުހުންގެ ޚިދުމަތުން ބުނީ މާވަށުގައި މީހަކަށް ތޫނު އެއްޗަކުން ޙަމާލާދީ ޒަޚަމުކޮށްލާފައިވާ ކަމުގެ މަޢުލޫމާތު ރިޕޯޓްކުރީ ހޯމަ ދުވަހު ހެނދުނުު 10:12 ގައެވެ. ޒަޚަމް ތަކާ އެކު މޫސަ މަރުކަޒަށް ގެންދިޔައީ 10:22 ހާ އިރުއެވެ. އޭނާ ޒަޚަމްތަކާ އެކު ޞިއްޙީ މަރުކަޒަށް ގެންދިޔަ އިރުވެސް ނިޔާވެފައިވާ ކަމަށް ޞިއްހީ މަރުކަޒުން މަޢުލޫމާތު ދީފައިވާ ކަމަށް ފުލުހުން ބުނެއެވެ.

ފުލުހުން ބުނެފައި ވަނީ ހައްޔަރުކޮށްފައިވާ މީހާއަކީ މަސްތުވާތަކެތީގެ ރެކޯޑް އޮންނަ މީހެއްކަމަށެވެ.