ޣައްޒާ ހަނގުރާމަ ހުއްޓާލުމަށް ހަމާސް އިން އެއްބަސް ނުވަނީ ގައިދީން ދޫކޮށްލުމުން ދެން ވާނެ ގޮތަކަށް ބިރު ގަންނާތީ ކަމަށް އެމެރިކާގެ ރައީސް ޑޮނަލްޑް ޓްރަމްޕް ވިދާޅުވެއްޖެ އެވެ.

ހުކުރު ދުވަހު ވައިޓް ހައުސް ގައި ޓްރަމްޕް ދެއްކެވި ވާހަކަތަކުން ދޭހަ ވަނީ އެމެރިކާ އާއި އިސްރާއީލުން ހަނގުރާމަ އަށް ދާއިމީ ނިމުމެއް ގެންނަން ގެރެންޓީ އެއް ދޭން ތައްޔާރަށް ނެތްކަމާއި، އޭގެ ބަދަލުގައި އިސްރާއީލުގެ ރަހީނުން ޣައްޒާ އިން ނެރުމަށް ކުރު މުއްދަތެއްގެ ހަނގުރާމަ ހުއްޓުމަކަށް ގެނައުމަށް ރާވާފައިވާ ކަމުގައެވެ.

"އަޅުގަނޑުމެން މިހާރު މިތިބީ އެންމެ ފަހު ގައިދީންގެ މައްސަލައިގައި. އަދި އެންމެ ފަހު ގައިދީން ދޫކޮށްލުމަށްފަހު ވާނެ ގޮތް އެމީހުންނަށް އެނގޭ،" އެމެރިކާގެ ރައީސް ނޫސްވެރިންނަށް ވިދާޅުވިއެވެ. "އަދި މައިގަނޑު ގޮތެއްގައި އެކަމުގެ ސަބަބުން، އެމީހުން އެއްބަސްވުމަކަށް އާދެވޭތޯ މަސައްކަތް ނުކުރާކަން ފާހަގަކުރެވޭ."

ޓްރަމްޕް ވަނީ އެއްބަސްވުމަކަށް ނާދެވުމުގެ ޒިންމާ ހަމައެކަނި ފަލަސްތީނުގެ ހަމާސް ގެ ބޮލުގައި އަޅުވައި، "ދަނޑިވަޑިވަޅު ބަލައިގެން" އެ ޖަމާއަތުގެ ފަހަތުން ދާނެ ކަމަށް ވިދާޅުވެފައެވެ.

"ޙަމާސް އިން އެއްބަސްވުމަކަށް އާދެވޭތޯ މަސައްކަތް ނުކުރާކަން ފާހަގަކުރެވޭ. އަޅުގަނޑަށް ހީވަނީ އެމީހުން މަރުވާން ބޭނުންވަނީ ކަމަށް، އަދި އެއީ ވަރަށް ދެރަ ކަމެއް،" އޭނާ ވިދާޅުވިއެވެ.

ބުރާސްފަތި ދުވަހު، ޓްރަމްޕްގެ މެދުއިރުމަތީގެ ޚާއްސަ ސަފީރު ސްޓީވް ވިޓްކޮފް ވިދާޅުވީ ވޮޝިންގްޓަނުން މަޝްވަރާތަކުގައި ބައިވެރިވުން ކުރުކޮށްލަނީ ކަމަށާއި، ޙަމާސް އިން "ހަނގުރާމަ ހުއްޓާލުމަށް އެއްބަސްވުމުގެ ޝައުޤުވެރިކަމެއް ނެތްކަން" ފާހަގަކުރެވޭ ކަމަށެވެ.

އިސްރާއީލުންވެސް ބުނެފައިވަނީ ހަނގުރާމަ ހުއްޓާލުމުގެ މަޝްވަރާތައް ކުރިއަށްދިޔަ ޤަޠަރުން އެ ޤައުމުގެ މަންދޫބުން އަނބުރާ ގެނެސްފައިވާ ކަމަށެވެ.

ހަމާސް އިން އެމެރިކާގެ ނިންމުމާ މެދު ހައިރާން ވެފައިވާކަން ހާމަ ކޮށް، އެއްބަސްވުމަކަށް އާދެވޭތޯ "އިޚްލާޞްތެރިކަމާއެކު މެދުވެރިންގެ މަސައްކަތްތައް ކާމިޔާބުކުރުމަށް" މަސައްކަތްކޮށްފައިވާ ކަމަށް ބުނެފައިވެއެވެ.

އަދި އެ ޖަމާޢަތުން ބުނެފައިވަނީ މެދުވެރިން - ޤަޠަރު އަދި މިޞްރު - އެ ޖަމާޢަތުގެ "ބިނާކުރަނިވި އަދި އިޖާބީ" މަސައްކަތައް މަރުޙަބާ ކިޔާފައިވާ ކަމަށެވެ.

60 ދުވަހުގެ މުއްދަތަކަށް ހަނގުރާމަ ހުއްޓުމަކަށް ގެނައުމަށާއި، އިސްރާއީލުގެ 10 ގައިދީން ދޫކޮށްލުމަށާއި، ޣައްޒާގައި ތިބި ފަލަސްތީނު ރައްޔިތުންނަށް އިސްރާއީލުން ދޭ ހަމަލާތައް ހުއްޓާލުމަށް އެއްބަސްވުމަކަށް އާދެވޭތޯ އެތައް މަސްތަކެއްގެ މަޝްވަރާތައް ކުރިއަށް ގެންގޮސްފައި ވެއެވެ.

ހަމާސް އިން ދެމެހެއްޓެނިވި ގޮތެއްގައި ހަނގުރާމަ ހުއްޓާލުމަށް މަސައްކަތް ކުރާ ކަމަށް ބުނެފައިވެއެވެ.

ނަމަވެސް، އިސްރާއީލުގެ އިސްވެރިން ތަކުރާރު ކޮށް ބުނެފައި ވަނީ ގައިދީން ދޫކޮށްލުމަށް ފަހު އަލުން ހަނގުރާމައަށް އެނބުރި ދާނެ ކަމަށާއި ޣައްޒާ އިން ފަލަސްތީނުގެ ހުރިހާ ރައްޔިތުން ނެރެ ސާފު ކުރުމުގެ ޕްލޭންތަކެއް އޮތް ކަމަށެވެ.

އިސްރާއީލުގެ ދިފާޢީ ވަޒީރު އިސްރާއީލް ކަޓްޒް ވިދާޅުވެފައިވަނީ އެ ޤައުމުން ހަނގ ހަނގުރާމަ ހުއްޓާލުމުގެ މުއްދަތު ބޭނުން ކުރާނީ އެތައް ސަތޭކަ ހާސް ފަލަސްތީނު ރައްޔިތުން ޣައްޒާގެ ދެކުނުގައި ގާއިމު ކުރާ ބަންދު ކޭމްޕަކަށް ބަދަލުކުރުމަށް ކަމަށާއި، އަދި އެ ސަރަޙައްދުން އެމީހުން އެއްކޮށް ނެރުމުގެ ތައްޔާރީތައް ވަމުންދާ ކަމަށެވެ.