އެެމެރިކާގެ ރައީސް ޑޮނަލްޑް ޓްރަމްޕްގެ ޑިމާންޑަށް އީރާނުން އިޖާބަ ނުދޭނެ ކަމަށް ލަފާކުރެވ ކަމަށާއި އެއާއެކު މުޅި ސަރަޙައްދު މިހާރު ނުރައްކަލުގައ އޮތް ކަމަށް ތަޖުރިބާކާރަކު ހާމަ ކޮށްފިއެވެ.

އިންޓަނޭޝަނަލް ކްރައިސިސް ގްރޫޕްގެ އީރާން ޕްރޮޖެކްޓްގެ ޑައިރެކްޓަރ އަލީ ވާއެޒް އަލް ޖަޒީރާ އާ ވާހަކަ ދައްކަމުން ވިދާޅުވީ، އީރާނުން "އެމެރިކާގެ ޝަރުތުތަކަށް ދޫދޭނެ ކަމަކަށް ނުބެލެވޭ" ކަމަށާއި، އީރާނާ ދެކޮޅަށް ހިންގާ ހަނގުރާމައިން "މުޅި ސަރަޙައްދު ނުރައްކަލަށް ވެއްޓުމުގެ ބިރު އޮތް ކަމަށެވެ.

އޭނާ އިތުރަށް ވިދާޅުވީ އެމެރިކާގެ ރައީސް ޓްރަމްޕް "އިސްރާއީލަށް އީރާނަށް ހަމަލާދިނުމުގެ ހުއްދަ ދީފައިވަނީ ރައީސްގެ ޚާއްޞަ މަންދޫބު، ސްޓީވް ވިޓްކޮފް، އީރާނުގެ ސަރުކާރާ އެކު މަސްކަޓުގައި ބައްދަލު ކުރަން ހަމަޖެހިފައި އޮތް ތާރީޚުގެ ދެ ދުވަސް ކުރިން" ކަމަށެވެ.

އީރާނުގެ ނަޒަރުން ބަލާއިރު، ޓްރަމްޕް ހަމަލާ ދިނުމަށް އިސްރާއީލަށް ހުއްދަ ދެއްވުމުން، އެއާއެކު ތެހެރާނާ އެކު ވާހަކަތައް ކުރިއަށް ގެންދިއުމަށް ފުރުސަތު އޮތް ކަމަށް އެމެރިކާ އިން ބުނަމުންދާ ބުނުމާ މެދު ވިސްނާލުން ރަނގަޅު ކަން އޭނާ ފާހަގަ ކުރެއްވިއެވެ.

މިހާރު ޓްރަމްޕް ވިދާޅުވަނީ އެއްވެސް ޝަރުތެއް ނެތި އީރާނުން ހަމަލާތައް ހުއްޓާލުމަށެވެ.

"އަޅުގަނޑު ދެކޭގޮތުގައި އިސްރާއީލާއި އެމެރިކާގެ ބޮންތަކުން ލިބޭ ގެއްލުންތައް ތަހައްމަލު ކުރުމަށް ވުރެ ނުރައްކާތެރި އެއްޗަކީ އެމެރިކާގެ ޝަރުތުތަކަށް ދޫކޮށްލުމެވެ. އެއީ އީރާނުން ނިއުކްލިއަރ މައްސަލައިގައާއި ރައީސް ޓްރަމްޕްގެ ޑިމާންޑްތަކަށް ދޫކޮށްލައިފިނަމަ، އެއީ ނިމުމެއް ނެތް ގޮތެއް ގައި ހުޅުވާލެވިގެންދާނެ މަގެއް ކަމަށް ވާތީ އެވެ. އެކަމުގެ ނަތީޖާއަކަށްވާނީ ވެރިކަން ވެއްޓި، އެންމެ ފަހުން ބަލިވެ ދޫކޮށްލަން ޖެހުމެވެ."

"އެހެންކަމުން ނުރައްކަލަކީ އިސްލާމިކް ރިޕަބްލިކް ވެއްޓެމުން ދާއިރު، މުޅި ސަރަޙައްދު އެއާއެކު ވައްޓާލަން މަސައްކަތްކޮށްފާނެ ކަމުގެ ނުރައްކަލެވެ. އެހެންވީމާ، މުޅި ސަރަޙައްދުގައި ހަނގުރާމަ އެއް ފެށުމުގެ ނުރައްކާ މިހާރު ވަނީ ކުރިއަށްވުރެ ވެސް ބޮޑުވެފައެވެ." އޭނާ ވިދާޅުވިއެވެ.