އިސްރާއީލް އިން ޣައްޒާގައި ހިންގަމުން އަންނަ ހަނގުރާމައާ ގުޅިގެން، އެމެރިކާ އިން ހުށަހަޅަމުން އަންނަ އެހީގެ ޕްލޭނަކީ ވަސީލަތްތައް އިސްރާފު ކުރުމުގެ ކަމެއް ކަމަށް، އދ ގެ ފަލަސްޠީނު ރެފިއުޖީ އެޖެންސީގެ އިސްވެރިޔާ ފިލިޕް ލަޒަރީނީ ވިދާޅުވެއްޖެ އެވެ. 

ލަޒަރީނީ ވިދާޅުވީ ޣައްޒާ އަށް އެހީ ފޯރުކޮށްދިނުމަށް އެމެރިކާ އިން ތައާރަފު ކޮށްފައިވާ އައު ނިޒާމަކީ، ވަސީލަތްތައް އިސްރާފު ކުރުމުގެ ނިޒާމެއް ކަމަށެވެ. އަދި އެއީ އަނިޔާވެރިކަމުގެ ސަމާލުކަން އެހެން ދިމާލަކަށް ބަދަލު ކުރުމަށް ކުރެވޭ މަސައްކަތެއް ކަމަށް ވެސް އޭނާ ވިދާޅުވި އެވެ. 

ބުދަ ދުވަހު ޖަޕާންގައި ހުންނަވާ ވާހަކަ ދައްކަވަމުން ލަޒަރީނީ ވިދާޅުވި ގޮތުގައި، ޣައްޒާގައި މިހާރު ވެސް އެހީ ފޯރުކޮށްދިނުމާއި، އެހީ ބެހުމުގެ ޚަރުދަނާ ނިޒާމެއް ޤާއިމު ކުރެވިފައިވާ ކަމަށް ޤަބޫލު ކުރައްވާ ކަމަށެވެ. 

އެގޮތުން އޭނާ ފާހަގަ ކުރެއްވި ގޮތުގައި، އެ މަސައްކަތް ކުރަމުން އަންނަ އދ ގެ އެޖެންސީ ތަކަށް އެންމެ އެކަށީގެންވާ ތަޖުރިބާ ލިބިފައިވާ ކަމަށެވެ. 

އެމެރިކާގެ އެހީތެރިކަމާ އެކު ޤާއިމު ކުރެވުނު ޣައްޒާ ހިމުމެނިޓޭރިއަން ފައުންޑޭޝަން (ޖީއެޗްއެފް) އިން އެންމެ ފުރަތަމަ އެހީ ބެެހުމުގެ މަސައްކަތް ފެށީ އަންގާރަ ދުވަހު އެވެ. އެއީ ދެކުނު ޣައްޒާގެ އެހީ ބެހުމުގެ މަރުކަޒެއްގަ އެވެ. 

އެހެން ނަމަވެސް، އެހީ ބެހުމުގެ މަރުކަޒު ދޮަށަށް އެއް ފަހަރާ އެތައް ހާސް ބަޔަކު ޖަމާވުމުގެ ސަބަބުން، ނުރައްކާތެރި ހާދިސާތަކެއް ހިނގާފައިވާ ކަމަށް ވަނީ ރިޕޯޓުކޮށްފަ އެވެ. 

ޣައްޒާ އަށް ބޭނުންވާ އިންސާނީ އެހީ އެތެރެ ކުރުމަށް އިސްރާއީލް އިން ދަތި ކުރަން ފަށާފައި ވަނީ މިއަހަރުގެ މާޗު މަހުގެ ތެރޭގަ އެވެ. އެއީ ދެ ވަނަ ފަހަރަށް އަލުން ޣައްޒާ އަށް ހަމަލާތައް ދޭން ފެށުމުގެ ކުރިންނެވެ. އެހެން ނަމަވެސް މިހާރު އަންނަނީ ޣައްޒާގެ ރައްޔިތުންނަށް ބޭނުންވާ އިންސާނީ އެހީ ފޯރުކޮށްދިނުމުގެ މަސައްކަތް ކުރަމުންނެވެ. 

އައު ޖަމިއްޔާއެއް މެދުވެރިކޮށް އަންގާރަ ދުވަހު އެހީ ބެހުމުގެ މަސައްކަތް ފަށާފައިވާއިރު، އެކަމާ ގުޅިގެން އިސްރާއީލް އިން ބުނެފައި ވަނީ އެކަމުގެ އެންމެ ބޮޑު ބޭނުމަކީ ހަމާސް އަށް އެހީގެ ސާމާނު ނުލިބުން ކަށަވަރު ކުރުން ކަމަށެވެ. 

ނަމަވެސް، އިސްރާއީލް މެދުވެރިގެން އެހީ ބެހުމުގެ މަސައްކަތް ކުރިއަށްދާ ގޮތާ މެދު ވެސް ލަޒަރީނީ ފާޑު ވިދާޅުވެފައިެ އެވެ. ލަޒަރީނީ ވިދާޅުވީ އެ ނިޒާމުގެ ސަބަބުން، ޣައްޒާގެ ރައްޔިތުންނަށް ބޭނުންވާ އެހީ ނުލިބި ހިނގައިދާނެ ކަމށެވެ. އަދި އެ ނިޒާމަކީ އިންސާނީ އެހީގެ އަސާސީ މިންގަނޑުތަކާ ޚިލާފު ކަމެއް ކަމަށް އޭނާ ވިދާޅުވި އެވެ. 

މިވަގުތު ވެސް ޣައްޒާ އަށް ފޯރުކޮށްދެވެމުން އަންނަނީ، އެ ޤައުމުގެ ދެ މިލިއަން ރައްޔިތުންނަށް ބޭނުންވާ އެހީގެ މިންވަރަށް ވުރެ މަދު އަދަދެއް ކަމަށް ވެސް އެހީގެ ޖަމިއްޔާތަކުން ވަަނީ ބުނެފަ އެވެ.