ރަޝިޔާ އާއި ޔުކްރެއިން އާއި ދެމެދު ކުރިއަށްދާ ހަނގުރާމަ ނިންމުމަށް، އެމެރިކާ އިން ހުށަހަޅާފައިވާ ހުށަހެޅުން ބަލައި ނުގަންނާނެ ކަމަށް، ރަޝިޔާގެ އިސް ޑިޕްލޮމެޓެއް ވިދާޅުވެއްޖެ އެވެ.

ރަޝިޔާގެ ފޮރިން މިނިސްޓްރީގެ ޑެޕިއުޓީ ސާގޭ ރިޔަބޮކޮވް ވިދާޅުވެފައި ވަނީ، ޔުކްރެއިންގެ ހަނގުރާމަ ނިންމުމަށް އެމެރިކާ އިން ހުށަހަޅާފައިވާ ހުށަހެޅުންތަކުގައި ހަނގުރާމައިގެ އަސްލު ސަބަބުތަކާ މެދު ރަޝިޔާގެ ކަންބޮޑުވުންތަކަށް އެކަށީގެންވާ ޙައްލެއް ހިމަނާފައި ނުވެ އެވެ.

އެހެންކަމުން، މިހާރު އެ ހުށަހެޅުން އޮތް ސިފައިގައި އޮއްވައި، ރަޝިޔާ އިން އެ ހުށަހެޅުން ބަލައި ނުގަންނާނެ ކަމަަށް ވެސް އޭނާ ވިދާޅުވި އެވެ. 

އިތުރަށް ވާހަކަ ދައްކަވަމުން އޭނާ ވިދާޅުވެފައި ވަނީ އެމެރިކާ އިން ހުށަހަޅާފައިވާ ހައްލުތަކަށް ރަޝިޔާ އިން ވަރަށް ސީރިއަސްކޮށް ރިޢާޔަތްކުރާ ކަމަށާއި، ނަމަވެސް މިހާރުގެ ސިފައިގައި އެ ހުށަހެޅުންތަކުގައި ހަނގުރާމައިގެ އަސްލު ސަބަބުތަކާ ގުޅޭ އެއްވެސް ހައްލެއް ހިމެނިފައި ނުވާ ކަމަށެވެ.

މިކަމާ ގުޅިގެން އެމެރިކާގެ ރައީސް ޑޮނަލްޑް ޓްރަމްޕް ވަނީ ރަޝިޔާގެ ރައީސް ޕުޓިންއާ މެދު ނުރުހުން ފާޅުކުރައްވާފައި އެވެ. އަދި ރަޝިޔާ އިން ހައްލަކަށް ހުރަސް އަޅާ ކަމަށް ފެނިއްޖެ ނަމަ، ރަޝިޔާގެ ތެޔޮ ގަންނަ ގައުމުތަކާ ދެކޮޅަށް ފިޔަވަޅު އަޅާނެ ކަމަށް ވެސް ވިދާޅުވެފައިވެ އެވެ.

ރަޝިޔާ އިން ބޭނުން ވަނީ ޔުކްރެއިން ނޭޓޯއާ ގުޅުމުގެ ވިސްނުން ދޫކޮށްލުމާއި، ރަޝިޔާ އިން އަމިއްލަ އަށް ކަނޑައަޅާފައިވާ ހަތަރު ސަރަހައްދެއްގެ މައްޗަށް ފުރިހަމަ ބާރު ލިބުމާއި، ޔުކްރެއިންގެ އަސްކަރިއްޔާގެ އަދަދު މަދުކުރުމެވެ.

ނަމަވެސް، ޔުކްރެއިން އިން ބުނަނީ މިއީ އެ ގައުމު ދަށްކޮށްލުމުގެ މަގުސަދުގައި ރަޝިޔާ އިން އެދޭ އެދުމެއް ކަމަށެވެ. މި ހަފުތާގެ ކުރީކޮޅު، ރަޝިޔާާޣެ ޑިމިޓްރީ ޕެސްކޮވް ވިދާޅުވެފައި ވަނީ އެމެރިކާއާ އެކު މަޝްވަރާތައް ކުރިއަށްދާ ކަމަށާއި، ނަމަވެސް މިއީ ވަރަށް އުނދަގޫ މައްސަލައެއް ކަމަށެވެ.