ކިލޯ އެއް ހާ ޑްރަގް އެތެރެކުރި ދުވަސްވީ މީހަކު ހައްޔަރުކޮށްފި އެވެ.

ބުރާސްފަތި ދުވަހު ކްރިމިނަލް ކޯޓުން ނެރެފައިވާ ބަންދު އަމުރުގައި ބުނެފައި ވަނީ އެ މައްސަަަލައިގައި ހައްޔަރުކޮށްފައި ވަނީ މ. ލައިޓްސިގްނަލް، އަހުމަދު ޝަފީއު (52އ.) ކަމަށެވެ.

އޭނާ ބަންދުކުރުމަށް ނެރުނު ކޯޓު އަމުރުން އެނގޭ ގޮތުގައި އޭނާގެ މައްޗަށް ކުރަމުން ދަނީ މަސްތުވާތަކެތި ޓްރެފިކް ކުރުމުގެ ތުހުމަތެވެ. އަދި އޭނާގެ ބަންދު އަމުރުގައި ބުނީ އޭނާ ބަލާ ދިޔަ ފޮށިގަނޑަކުން ގިނަ އަދަދެއްގެ މަސްތުވާތަކެތި ފެނިފައިވާ ކަމަށެވެ. އަދި އެ ތަކެތީގެ ބަރުދަނުގައި 800 ގްރާމް ހުރި ކަމަށް ފުލުހުން ވަނީ ބުނެފައެވެ.

އެހެން ނަމަވެސް އެ ފޮށިގަނޑުން ފެނުނީ ކޮން ބާވަތެއްގެ މަސްތުވާތަކެއްޗެއް ކަމެއް ފުލުހުން ހާމަކޮށްފައެއް ނުވެއެވެ.

އޭނާގެ ބަންދުގެ އަމުރުގައި ބުނެފައި ވަނީ އޭނާ ބަލައިދިޔަ ފޮށިގަނޑުގައި ޤާނޫނާއި ހިލާފު އެއްޗެއް ހުރިކަން އޭނާ އަށް އެނގޭކަމަށް ބާރުދޭ ހެކި ކޮންމެވެސް މިންވަރަކަށް ހުށަހަޅާފައިވާ ކަމަށެވެ. އެ އަމުރުގައި ވާގޮތުން އެ ކަމަށް ބާރު ލިބޭ މެސެޖްތަކެއްގެ ސްކްރީންޝޮޓްތަކެއް ފުލުހުން ވަނީ ހުށަހަޅާފައެވެ.

ކްރިމިނަލް ކޯޓުން އަމުރުކޮށްފައި ވަނީ މި މައްސަލަ އާއި ގުޅިގެން ޝަފީއު 20 ދުވަސް ވަންދެން ކަސްޓޯޑިއަލް ޖަލެއްގައި ބަންދުކުރުމަށެވެ.