ރަމަޟާން މަހުގެ ފަހު 10 އަކަށް ރައްޔިތުން މަޖިލީހުގެ ޖަލްސާތައް މެދުކަނޑާލައިފިއެވެ.

ބުދަ ދުވަހުގެ މަޖިލީހުގެ ޖަލްސާ ނިންމާލައްވަމުން މަޖިލީހުގެ ރިޔާސަތުގައި އިންނެވި މަޖިލީހުގެ ރައީސް އަބްދުއްރަހީމް އަބްދުﷲ ވިދާޅުވީ ކުރިމަތިލަމުން މިދަނީ ބަރަކާތްތެރި ރަމަޟާން މަހުގެ ފަހު 10 އަކާ ކަމަށާއި، މަޖިލީހުގެ އިއްޒަތްތެރި މެންބަރުން ރަމަޟާން މަހުގެ ފަހު 10ގައި ރައްޔިތުންނަށް ނަމޫނާ ދެއްކެވުމަށް އެދޭ ކަމަށެވެ.

އަބްދުއްރަހީމް ވިދާޅުވީ ދެން މަޖިލީހުގެ ޖަލްސާއެއް އޮންނާނީ 7 އޭޕްރީލް 2025 ވާ ހޯމަ ދުވަހުގެ ހެނދުނު 9:00 ގައި ކަމަށެވެ.

ރައްޔިތުން މަޖިލީހުގެ ޖަލްސާތައް މެދުކަނޑާލާފައި މިވަނީ ރައްޔިތުންގެ ކަންބޮޑުވުން އޮތް ބައެއް ބިލުތަކުގެ މަސައްކަތް ނުނިމި އޮއްވައެވެ. ރަމަޟާން މަހުގެ ތެރޭގައި ވެސް ޖަލްސާތައް ކުރިއަށް ގެންގޮސްފައިވަނީ 30 މިނެޓަށްވުރެ ކުރުކޮށެވެ. އަދި ގިނަ ކޮމެޓީތަކުގެ މަސައްކަތްތައް ވެސް ކުރިއަށް ނުގެންދާ ކަމަށް ބައެއް މަޖިލިސް މެންބަރުން ވިދާޅުވެ، ކަންބޮޑުވުން ފާޅުކޮށްފައިވެއެވެ.

ރަމަޟާން މަހުގެ ފަހު 10އަކާއި ގުޅިގެން 20 މާރިޗުން ފެށިގެން ސަރުކާރު ބަންދުވާއިރު، އީދު ބަންދަށްފަހު ސަރުކާރު އަލުން ހުޅުވާނީ 5 އޭޕްރީލް 2025 ގައެވެ.

ރަމަޟާން މަހުގެ ފަހު 10 ގައި ސަރުކާރު ބަންދުކުރުމަކީ ރައީސް ޑރ. މުހައްމަދު މުއިއްޒުގެ ރިޔާސީ ވައުދެކެވެ. އަދި ސަރުކާރުގެ މުވައްޒަފުންނަށް ބަންދު ދުވަސްތަކެއްގެ ގޮތުގައި ކަނޑައަޅާފައިވީ ނަމަވެސް އެ ދުވަސްތަކުގައި ކޮންމެހެން ދޭންޖެހޭ ޚިދުމަތްތައް ދިނުމަށް މަސައްކަތަށް ނުކުންނަން ބައެއް މުވައްޒަފުންނަށް ޖެހެއެވެ. އެހެންކަމުން އެ މުވައްޒަފުންނަށް އިނާޔާތެއް ދިނުމަށް ސަރުކާރުން ވަނީ ނިންމާފައެވެ.