އައްޑޫ ބިޔުރޯ

ކުދި އަދި މެދު ފަންތީގެ ވިޔަފާރިތަކަށް އަމާޒުކޮށްގެން ދޫކުރާ ވިޔަފާރި އެހީ ލޯނުގެ ފުރުސަތު މާރިޗު 16 ވަނަ ދުވަހު ހުޅުވާލާނެ ކަމަށް އެސް.ޑީ.އެފް.ސީ އިން އިއުލާނުކޮށްފިއެވެ. 

މި ލޯނަކީ ދުވަހުން ދުވަހަށް ހިންގުމުގެ ދަތިތަކާ ކުރިމަތިލާންޖެހޭ ވިޔަފާރިތަކަށް އެހީތެރިވުމަށް ޚާއްޞަކޮށްގެން ތަޢާރަފުކުރާ ލޯނެކެވެ. 

އެސް.ޑީ.އެފް.ސީ އިން ބުނާ ގޮތުގައި މި ލޯނަށް އެދި ހުށަހެޅޭނީ މެދުކެނޑުމެއްނެތި އެއް އަހަރު ދުވަހު ވިޔަފާރި ހިންގާފައިވާ ފަރާތްތަކަށެވެ. މުދާ ގަތުމާއި އެހެނިހެން މުހިންމު ހިންގުމުގެ ޚަރަދުތައް ހިމެނޭ ގޮތަށް ދުވަހުން ދުވަހަށް ކުރަންޖެހޭ ޚަރަދުތައް ކުރުމަށް މި ލޯނު ބޭނުންކުރެވޭނެއެވެ. 

މި ސްކީމުގެ ދަށުން 1.5 މިލިއަން ރުފިޔާއާ ހަމައަށް ލޯނަށް އެދެވޭނެއެވެ. 700,000 ރުފިޔާއަށްވުރެ ބޮޑު އަދަދެއްގެ ލޯނަށް އެދޭނަމަ ރަހުނެއް ބަހައްޓަން ޖެހޭނެއެވެ. މި ލޯނު ދޫކުރާނީ އަހަރަކު 9.5 އިންސައްތައިގެ އިންޓަރެސްޓް ރޭޓެއްގައި ކަމަށް އެސް.ޑީ.އެފް.ސީ އިން ވަނީ ބުނެފައެވެ. 

ލޯނު ނަގާ ފަރާތްތަކަށް 6 މަސްދުވަހުގެ ގްރޭސް ޕީރިއަޑެއް ލިބޭނެއެވެ. އަދި ލޯނު އަނބުރާ ދެއްކުމަށް 5 އަހަރު ދުވަހުގެ މުއްދަތެއް ދެވޭނެއެވެ. 

2019 ވަނަ އަހަރު އުފެއްދި އެސް.ޑީ.އެފް.ސީ އިން ދިވެހި ވިޔަފާރިވެރިންނާއި ކުދި އަދި މެދު ފަންތީގެ ވިޔަފާރިތަކަށް އެހީތެރިވުމުގައި މުހިންމު ދައުރެއް އަދާކުރެއެވެ. ރާއްޖެ އަށް ދިމާވި ކޮވިޑް ގެ ކާރިސާ ގައި ކުދި ވިޔަފާރި ތަކުގައި ދަތިތަކާ ކުރިމަތިވި ފަރާތްތަކަށް ވެސް އެހީތެރިކަން ފޯރުކޮށް ދީފައި ވެއެވެ. އޭރު ލޯން ދޫކުރީ 6 އާއި 9 އިން ސައްތައި ގެ އިންޓްރަސްޓް ރޭޓް ގައި ކަމުގައި މައުލޫމަތް ލިބެއެވެ .  

ވިޔަފާރިތައް ފެށުމަށާއި، ދެމެހެއްޓުމަށާއި، ފުޅާކުރުމަށް ބޭނުންވާ މާލީ އެހީތެރިކަން ފޯރުކޮށްދިނުމުގައި މި އެސް.ޑީ.އެފް.ސީ އިން އިސްދައުރެއް އަދާކުރެއެވެ.