މިހާރު އިލެކްޝަންސް ކޮމިޝަން (އީސީ) އަށް އެތަނުގެ ޤާނޫނީ ޒިންމާ އަދާ ނުކުރެވޭ ކަމަށް އާއްމުން ޤަބޫލުކުރާ ކަމަށާއި ސަރުކާރު ހިންގާ ޕީއެންސީ އަށް މީހުން ވެއްދުމަށް ވަގު ފޯމް ހުށަހެޅެނީ އީސީން އެކަން ފަހިކޮށްދޭތީ ކަމަށް ކުރީގެ ރައީސް އަބްދުﷲ ޔާމީން އަބްދުލް ޤައްޔޫމް ވިދާޅުވެއްޖެއެވެ.
އެ މަނިކުފާނު އެފަދައިން ވިދާޅުވީ ބުރާސްފަތި ދުވަހުގެ ރޭ (ޕީޕަލްސް ނޭޝަނަލް ފްރަންޓް) ޕީއެންއެފްގެ ޖަގަހަ ޖަލްސާގައި ވާހަކަދައްކަވަމުންނެވެ.
ވަގު ފޯމް ފުރައިގެން ޕީއެންސީ އަށް މީހުން ވެއްދުމަށް ފުރުސަތު ދޭތީ ރައީސް ޔާމީން ވަނީ އިލެކްޝަންސް ކޮމިޝަނަށް ވަރަށް ބޮޑަށް ފާޑު ވިދާޅުވެފައެވެ.
އެ މަނިކުފާނު އިތުރަށް ވިދާޅުވީ ސިޔާސީ ޕާޓީތަކަކީ ވަކި ނިޒާމެއްގެ ދަށުން ހިންގާ ތަންތަން ކަމަށާއި، އެއީ ފޮރުވިގެން ސިޔާސީ މަސައްކަތްކުރާ ތަންތަނެއް ނޫން ކަމަށެވެ.
ސިޔާސީ ޕާޓީތަކުގެ މަސައްކަތަކީ ވަރުގަދަ މަޤްޞަދެއްގައި ކުރެވޭ މަސައްކަތެއްކަން ފާހަގަކުރައްވައި، ޕާޓީތައް ރެގިއުލޭޓްކުރުމުގެ މުހިންމުކަމަށް ރައީސް ޔާމީން ވަނީ އަލިއަޅުވާލައްވާފައެވެ.
އެގޮތުން ޕާޓީތައް މޮނިޓަރކުރުމަކީ އިލެކްޝަންސް ކޮމިޝަންގެ ޒިންމާއަކަށް ވީ ހިނދު ގާނޫނީ ހުވައެއް ކޮށްގެން ތިބެ އިލެކްޝަންސް ކޮމިޝަނަށް އެ މަސްއޫލިއްޔަތު ނުއުފުލޭ ކަމަށް ރައީސް ޔާމީން ވިދާޅުވިއެވެ. އެކަން ރައްޔިތުން ގަބޫލު ކުރާތީ އިލެކްޝަންސް ކޮމިޝަން އެއްކޮށް އިސްތިއުފާ ދީފަ އެހެން ބަޔަކަށް ޖާގަ ދިނުމަކީ ކޮންކަހަލަ ކަމެއްތޯ އެ މަނިކުފާނު ސުވާލު އުފެއްދެވިއެވެ.
ރައީސް ޔާމީން ވަނީ އީސީން ސަރުކާރު ހިންގާ ޕާޓީ އަށް މީހުން ވެއްދުމަށް މަގުފަހިކޮށްދޭކަމަށް ފާހަގަކުރައްވާ އެކަމަށް ފާޑު ވިދާޅުވެފައެވެ. މަޖިލިސް އޮތީ މި ވަގުތު ރައީސް ޑރ.މުހައްމަދު މުއިއްޒުގެ ގެކޮޅު ދިމްޔާތުގައި ތަޅުއަޅުވާފައި ކަމަށާއި ޖަވާބުދާރީކުރުވުމުގެ ނިޒާމް ވަނީ ނަގާލާފައި ކަމަށް ރައީސް ޔާމީން ވިދާޅުވިއެވެ. އެކަމަކީ ޖަރީމާ އެއް ކަމަށާއި އެއީ ބައިއަޅައިގެން ރޭވިގެން ހިނގާ ކަމެއް ކަމަށް އެ މަނިކުފާނު ވިދާޅުވިއެވެ.
ވަގު ފޯމް މައްސަލަ ކުރިއަށް ދެވެނީ އީސީން މިކަން ފަހިކޮށްދޭތީ. ގާނޫނީ ފިޔަވަޅު އެޅޭނެ ގޮތެއް ނެތް. މަޖިލިސް މިވަގުތު މިއޮތީ ދިމްޔާތުގައި ތަޅު އަޅުވާފައި. އެމީހުން ބުނާ ގޮތަށް ކަން ކަން ނުކުރީމަ ވައިގަދަވީމަ ޓިނުތައްވެސް އުކާލާ އެބަ މިހާ. ވަރަށް ރަނގަޅު ސުޕްރީމްކޯޓުގަ މިކަން ތާވަލްކުރިކަން. ދިމްޔާތުން ބުނާގޮތަކަށް މިކަން ކުރަނީ. އެ މީހުން ބުނާގޮތަކަށް ކަންކަން ނުކުރީމަ ޓިނުތައް ވެސް އުކާލާ އެބަ. މިކަން ކުރަނީ ބައި އެޅިގެންކަން އަޅުގަނޑުމެންނަށް އެބަ އެނގޭ.ކުރީގެ ރައީސް ޔާމީން
ވަގު ފޯމް ހުށަހަޅައިގެން މީހުން ޕީއެންސީ އަށް ވެއްދިކަން ފަޅާ އަރާފައިވާއިރު 4000 އަށް ވުރެ ގިނަ ފޯމްގެ މައްސަލަ މިހާތަނަށް އައި އިރު ވަނީ ފާހަގަކުރެވިފައެވެ. އެ މައްސަލަ ފުލުހުންނާއި އޭސީސީ އަށް ހުށަހެޅި ނަމަވެސް މައްސަލަ ނުބަލާތީ އިދިކޮޅު އެންމެ ބޮޑު ޕާޓީ އެމްޑީޕީން ވެސް ވަނީ ކަންބޮޑުވުން ފާޅުކޮށްފައެވެ. އަދި މިއީ ރޭވިގެން ހިންގާ ޖަރީމާއެއް ކަމަށް އިދިކޮޅު ފަރާތްތަކުން ދަނީ ތުހުމަތުކުރަމުންނެވެ.
