ޕީއެންސީއަށް މީހުން ވެއްދުމަށް ވަގު ފޯމް ހުށަހެޅި މައްސަލަ ފުލުހުން ތަހުގީގު ކުރަމުން ނުދާ ކަމަށް އެމްޑީޕީގެ ޗެއާޕާސަންގެ ނައިބު، އިބްރާހީމް ވަހީދު ވިދާޅުވެއްޖެއެވެ.
ވަގު ފޯމް ހުށަހަޅައި ޕީއެންސީއަށް އެމްޑީޕީގެ މެންބަރުން ހިމެނޭ ގޮތަށް ގިނަ އަދަދެއްގެ އާއްމު ރައްޔިތުން އެޕާޓީއަށް ވައްދާފައިވާ މައްސަލައާ ގުޅިގެން ބުރާސްފަތި ދުވަހު ހެނދުނު އެމްޑީޕީގެ މެންބަރުން ވަނީ އިލެކްޝަން ކޮމިޝަނަށް ހާޒިރުވެ، މިކަންބޮޑުވުން އިލެކްޝަން ކޮމިޝަންގެ މެންބަރުންނާ ހިއްސާކުރައްވާފައެވެ. މިއީ އެ ޕާޓީން މިމައްސަލާގައި އެ ކޮމިޝަނާ ބަދަލުކުރި 3 ވަނަ ފަހަރެވެ.
މިމައްސަލައާ ގުޅިގެން ރާއްޖެއެމްވީއަށް ވަހީދު ވިދާޅުވީ އޮޅުވާލައިގެން ވަގަށް ޕީއެންސީއަށް ގިނަ ބަޔަކު ވައްދާފައިވާ ކަމަށާއި، މިމައްސަލަ ސަމާލު ކަމަށް ގެނެސްފައިވަނިކޮށް، ޕާޓީގެ ދަފްތަރު ލިސްޓް އިލެކްޝަން ކޮމިޝަން (އީސީ)އިން އާއްމު ކުރުމަކީ ވަރަށް ބޮޑު ކަންބޮޑުވުމެއް ކަމަށެވެ. ޕީއެންސީން ވެސް ވަގު ފޯމް ހުށަހެޅި ކަމަށް އެއްބަސްވެފައިވާކަން ފާހަގަކުރައްވައި ވަހީދު ވިދާޅުވީ އެމައްސަލަތައް ބަލަންޖެހޭނީ އީސީން ކަމަށް ޕީއެންސީން ވެސް ބުނެފައިވާ ކަމަށެވެ.
މީގެ އިތުރުން ވަހީދު ވިދާޅުވީ ވަގު ފޯމްގެ 300ށް ވުރެ ގިނަ މައްސަލަ ފުލުހުންނަށް ހުށަހަޅާފައިވާ ކަމަށެވެ. ނަމަވެސް މިހާތަނަށް އެއްވެސް މީހަކާއި ސުވާލުކޮށްފައިނުވާ ކަމަށާއި، މިތަހުގީގު ކުރިއަށް ނުދާ ކަމަށް އޭނާ ވިދާޅުވިއެވެ.
މިހާތަނަށް އިލެކްޝަން ކޮމިޝަނުން އަޅުގަނޑުމެންނަށް ޕީއެންސީން ހުށަހަޅާފައި ހުރި ފޯމްތަކުގެ ތެރެއިން ކޮޕީ ލިބުނު 10 ގައުމީ މަޖިލިސް މެންބަރުންގެ ފޯމް މައިގަނޑު ގޮތެއްގައި. އެއްވެސް ފޯމެއް ނެތް ފުރިހަމަ ވެފައި. ފުރިހަމަ ނުވާ ފޯމްތަކަކަށް ޕީއެންސީއަށް މީހުން ވައްދާގެން މިއުޅެނީ. އަޅުގަނޑުމެން މީގައި އަނެއްކާ ފާހަގަކޮށްލަން އަޅުގަނޑުމެން މިމައްސަލަ ފުލުހުންނަށާއި، އެކި ތަންތަނަށް ހުށަހަޅާގެން އުޅޭތާ މިހާރު ވަރަށް ދުވަސްވެއްޖެ. މިކަމަކީ އަޅުގަނޑުމެން ދޫކޮށްލާނެ މައްސަލައެއް ނޫން. ފުލުހަށް 300ށް އެތައް މައްސަލައެއް ހުށަހަޅާގެން. އަދި ފުލުހުން އޭގެން އެއްވެސް މީހަކާ ސުވާލެއް ވެސް ކޮށްފައިނުވޭ. ފުލުހުން ނޫޅޭ މިމައްސަލަ ބާލަކަށް. އެމީހުންނަށް ބެލެންނެތީ އެމީހުންގެ މިނިސްޓަރު މިވައްކަން ކުރުމުގައި ރޭވުންތެރިއަކަށް ހުރީ.އެމްޑީޕީގެ ޗެއާޕާސަންގެ ނައިބު، އިބްރާހީމް ވަހީދު
ވަހީދު ވިދާޅުވީ ވަގު ފޯމްގެ މައްސަލާގައި މިހާތަނަށް 3000ށް ވުރެ ގިނަ ޝަކުވާ ލިބިފައިވާ ކަމަށެވެ. އަދި މިމައްސަލާގައި އެމްޑީޕީން ދޫނުދޭނެ ކަމަށާއި، އިންސާފުވެރިކަމާއެކު ތަހުގީގު ކުރިއަށް ގެންދިއުމަށް ކުރެވެން ހުރި ހުރިހާ މަސައްކަތެއް ކުރާނެ ކަމަށެވެ.
