ޔުއެފާ ޗެމްޕިއަންސް ލީގުގައި އެޓަލަންޓާއާ ދެކޮޅަށް ނިކުންނައިރު، އެ ޓީމާ މެދު ވަރަށް ބޮޑަަށް ސަމާލުވާން ޖެހޭނެ ކަމަށް، ބާސެލޯނާގެ ކޯޗު ހަންސީލ ފްލިކް ބުނެފި އެވެ.
އޭނާ މިހެން ބުނީ އެޓަލަންޓާއާ ދެކޮޅަށް ބާސެލޯނާ ކުޅޭ މެޗުގެ ކުރިން އޮތް ނޫސްވެރިންގެ ބައްދަލުވުމުގައި ވާހަކަ ދައްކަމުންނެވެ. އެ މެޗާ ކުރިމަތިލާއިރު ވެސް ބާސެލޯނާ އަށް ވަނީ މުބާރާތުގެ ގަދަ 16 ވަނަ ބުރުން ޖާގަ ލިބިފަ އެވެ. އަނެއްކޮޅުން މި ސީޒަންގައި އެޓަލަންޓާ އިން ވެސް އަންނަނީ ރަނގަޅު ކުޅުމެއް ދައްކަމުންނެވެ.
ފްލިކް ބުނީ އެޓަލަންޓާ މެޗު ވާނީ ވަރަށް ޝައުޤުވެރި މެޗަކަށް ކަމަށެވެ. ޚާއްސަކޮށް އެޓަލަންޓާގެ ކޯޗަށް ވަރަށް ބޮޑު އިޙުތިރާމެއް އޮންނަކަން ފާހަގަކޮށް ފްލިކް ބުނީ، އެޓަލަންޓާގެ ކޯޗު ޖިއާން ޕިއޭރޯ ގަސްޕިރީނީ އަންނަނީ ޔޫރަޕުގައި ވެސް އެ ޓީމުގެ ފެންވަރު ދައްކައިދެމުން ކަމަށާއި، އެ ޓީމަށް ބޮޑެތި ބަދަލުތަކެއް އައިސްފައިވާ ކަމަށެވެ.
ޚާއްސަކޮށް މިހާރު އެޓަލަންޓާ އިން ވަރަށް ރަނގަޅަށް ކުޅެމުން އަންނަ ކަމަށާއި، އެ ޓީމަކީ ގޯލާ ރައްޓެހި އަދި ގިނަ ލަނޑުތަކެއް ޖަހާ ޓީމެއް ކަމަށް ފްލިކް ބުންޏެވެ. އެހެންކަމުން އެޓަލަންޓާއާ ދެކޮޅަށް ކުޅޭއިރު، ބާސެލޯނާ އިން ވެސް ވަރަށް ގިނަ ކަންކަމަށް ސަމާލުކަން ދޭން ޖެހޭނެ ކަމުގައި ވެސް ފްލިކް ވަނީ ބުނެފަ އެވެ.
މީގެ އިތުރުން ފްލިކް ބުނީ، އަބަދު ވެސް އިޓަލީ އަށް ނިސްބަތްވާ ޓީމުތަކާ ދެކޮޅަށް ކުޅުމަކީ އުނދަގޫކަމެއް ކަމަށެވެ. ސަބަބަކީ އެ ޓީމުތަކަކީ ވަރަށް މޮޅަށް ޑިފެންސް ކުރާ ޓީމުތަކެއް ކަމަށާއި، އެޓަލަންޓާ އަކީ ވެސް އިދިކޮޅަށް ކުޅެން އުނދަގޫ ޓީމެއްގެ ގޮތުގައި ފްލިކް ސިފަ ކުރި އެވެ. ޚާއްސަކޮށް އެޓަލަންޓާ އަކީ އިދިކޮޅަށް ކުޅޭ ޓީމަކަށް ވަރަށް ބޮޑު ޕްރެޝަރެއް ދޭނެ ޓީމެއް ކަމަށް ވެސް ފްލިކް ބުނެފައިވެ އެވެ.
މި ސީޒަނާ ދިމާކޮށް ބާސެލޯނާގެ ކޯޗުކަމާ ހަވާލުވި ޖަރުމަނުގެ ފްލިކްގެ އިރުޝާދުގެ ދަށުން ޗެމްޕިއަންސް ލީގުގައި ބާސެލޯނާ އިން އަންނަނީ ރަނގަޅު ނަތީޖާތަކެއް ނެރެމުންނެވެ. ބުދަ ދުވަހުގެ ރޭ އެޓަލަންޓާއާ ދެކޮޅަށް ބާސެލޯނާ ނިކުންނާނީ ދަންވަރު ރާއްޖެ ގަޑިން އެކެއް ޖަހާއިރު އެވެ.
