ޖެނުއަރީ 30 ވާ ބުރާސްފަތި ދުވަހުގެ ނިޔަލަށް، ޖެރޫސަލަމްގައި ހިންގަމުންދާ ފަލަސްޠީނުގެ ރެފިއުޖީންނަށް އެހީތެރިވާ އދ ގެ އޭޖެންސީ (އަންރުވާ) ގެ މަސައްކަތްތައް ހުއްޓާލުމަށް އިސްރާއީލުން ރަސްމީކޮށް އދ އަށް އަންގައިފިއެވެ.
އިސްރާއީލުން އދ އަށް ކަނޑައަޅާފައިވާ ސަފީރު ޑެނީ ޑެނޮން އދ ގެ ސެކްރެޓަރީ ޖެނެރަލް އެންޓޯނިއޯ ގުޓެރެސް އަށް ފޮނުވި ސިޓީގައި ވަނީ އެ ތާރީޚަށް އަންރުވާގެ ހުރިހާ މަރުކަޒުތަކެއް ބަންދު ކުރުމަށް އެދިފައެވެ.
މި ފިޔަވަޅު އަޅަނީ އިސްރާއީލުގެ ޕާލަމެންޓުން ފާސްކޮށްފައިވާ އައު ޤާނޫނެއް ތަންފީޒުކުރުމުގެ ގޮތުން ކަމަށް އިސްރާއީލުން ބުނެފައިވެއެވެ.
މި ޤާނޫނުގެ ދަށުން އިސްރާއީލުގެ އިޚްތިޞާޞްގެ ދަށުގައިވާ ސަރަޙައްދުތަކުގައި އަންރުވާ އިން މަސައްކަތްކުރުން މަނާކުރެއެވެ. މި ޤާނޫނުގެ ސަބަބުން އަންރުވާ އަށް އޮފީސްތައް ގާއިމް ކުރުމާއި، ޚިދުމަތް ދިނުމާއި، އަދި ސީދާ ނުވަތަ ނުސީދާކޮށް ވެސް އެއްވެސް ޙަރަކާތެއް އިސްރާއީލުގައި ހިންގުން މަނާވެގެންދާނެއެވެ. އެހެންކަމުން، އިރުމަތީ ޖެރޫސަލަމްގައި އަންރުވާއިން ހިންގާ ހުރިހާ ޙަރަކާތްތަކެއް ހުއްޓޭނެއެވެ.
ތިން މަސް ކުރިން އިސްރާއީލުގެ ޕާލަމެންޓުން ފާސްކުރި މި ޤާނޫނުގެ ސަބަބުން ފަލަސްޠީނުގެ އެކި ސަރަޙައްދުތަކުގައި އަންރުވާ އިން ހިންގާ މަސައްކަތްތަކަށް ބޮޑު އަސަރެއް ކުރާނެ ކަމަށް ބެލެވެއެވެ.
ޖެނުއަރީ 17 ގައި ބޭއްވުނު އދ ގެ ސަލާމަތީ މަޖިލީހުގެ ސިއްރު ޖަލްސާއެއްގައި އަންރުވާގެ ކޮމިޝަނަރ ޖެނެރަލް ފިލިޕް ލަޒަރީނީ ވަނީ މި ޤާނޫނުގެ ސަބަބުން ކުރިމަތިވާނެ އަސަރުތަކާ މެދު އިންޒާރު ދެއްވާފައެވެ.
