ޣައްޒާ ހަނގުރާމަ ހުއްޓާލުމުގެ އެއްބަސްވުމުގެ ދަށުން ޣައްޒާގައި ބަންދުކޮށްފައި ތިބި ރަހީނުންގެ ތެރެއިން 4 އަންހެނުން ދޫކޮށްލައިފިއެވެ.

ހޮނިހިރު ދުވަހު މި 4 މީހުން ހަމާސް އިން  ރެޑް ކްރޮސްގެ އޮފިޝަލުންނާ ހަވާލުކުރީ ޣައްޒާ ސިޓީގައިވާ ފަލަސްތީނު މައިދާނުގައެވެ.

މިއީ ހަމާސް އިން ރަހީނުން މިނިވަން ކުރި ދެވަނަ ބުރެވެ. ހޮނިހިރު ބަންދުން ދޫކޮށްލެވުނު މީހުންގެ ބަދަލުގައި، އިސްރާއީލުގެ ޖަލުތަކުގައި ބަންދުކޮށްފައި ތިބި 200 ފަލަސްތީނު މީހުން ދޫކޮށްލާނެކަމަށް ބެލެވެއެވެ. މީގެ ތެރޭގައި އުމުރު ދުވަހުގެ ޙުކުމް ތަންފީޒުކުރަމުންދާ 120 މީހުން ހިމެނޭ ކަމަށް ރިޕޯޓުތައް ބުނުއެވެ.

ބަންދުން ދޫކޮށްލުމުގެ މައިދާނަށް، މޫނު ނިވާކޮށްގެން ތިބި ގިނަ އަދަދެއްގެ ހަމާސް އަދި އިސްލާމިކް ޖިހާދުގެ ހަނގުރާމަވެރިން އެއްވެފައި ތިއްބެވެ. އަދި ގިނަ އަދަދެއްގެ ފަލަސްތީނު އާންމު ރައްޔިތުންވެސް އެތަނުގައި އެއްވެފައިވެއެވެ.

އެތައް ސަތޭކަ ހަމާސް މެންބަރުންގެ އިތުރުން، ފަލަސްތީނުގެ އިސްލާމިކް ޖިހާދު ހިމެނޭ ގޮތަށް އެހެނިހެން ފަލަސްތީނު ޖަމާޢަތްތަކުގެ މީހުންވެސް އެތަނުގައި ތިބިކަން ފާހަގަކުރެވެއެވެ.                

ހަތަރު ރަހީނުން ޣައްޒާ ގައި ރެޑް ކްރޮސްއާ ހަވާލުކުރެވުނު އިރު، ތެލް އަވީވްގެ މައިދާނެއްގައި ރަހީނުންގެ އާއިލާތަކާއި ގިނަ އަދަދެއްގެ ބަޔަކު މަންޒަރުތައް ބޮޑު ސްކްރީނުން ބަލަމުން ގެންދިޔައެވެ. ރަހީނުން ރެޑް ކްރޮސް އާ ހަވާލު ކުރުމާއެކު އެ މައިދާނުން އުފާވެރިކަން ފެތުރިގެން ދިޔަ މަންޒަރު ފެނިގެން ދިޔައެވެ. 

ހަތަރު ރަހީނުންވެސް ތިބީ އެމީހުންގެ ސިފައިންގެ ޔުނީފޯމު ގައެވެ. ހަމާސްއިން އެމީހުން މިނިވަން ކުރާ މައިދާނަށް ގެނައި އިރު، އެމީހުން ތިބީ ހިނިތުންވެފައެވެ. މައިދާނުގައި ތިބި މީހުންނަށް އަތުން އިޝާރާތް ކުރި މަންޒަރު ވެސް ފެނިގެން ދިޔައެވެ.

އެމެރިކާ، ޤަތަރު އަދި މިޞްރުގެ މެދުވެރިވެގެން ގިނަ މަރުޙަލާތަކެއް ހިމެނޭ ގޮތުން ކުރިއަށް ދިޔަ މަޝްވަރާ ތަކުން ހަނގުރާމަ ހުއްޓާލުމުގެ އެއްބަސްވުމަކަށް އާދެވުނު އިރު، މި ހަނގުރާމަ ވެފައިވަނީ އިސްރާއީލާއި ހަމާސް އާ ދެމެދު މިހާތަނަށް ހިނގި އެންމެ ގިނަ ފުރާނަ ގެއްލުނު އަދި އެންމެ ގެއްލުންބޮޑު ހަނގުރާމަ ކަމުގައި ވެފައެވެ. މި އެއްބަސްވުމުގެ ފުރަތަމަ 6 ހަފްތާގެ މަރުޙަލާގައި ހިމެނެނީ ހަމާސް އިން ބަންދު ކޮށްފައިވާ 94 ރަހީނުންގެ ތެރެއިން 33 މީހުން (އަންހެނުން، ކުޑަކުދިން، 50 އަހަރުން މަތީގެ ފިރިހެނުން، ބަލިމީހުން އަދި ޒަޚަމްވެފައިވާ މީހުން) ދޫކޮށްލުމާއި އަދި އޭގެ ބަދަލުގައި އިސްރާއީލުގެ ޖަލުތަކުގައި ތިބި ފަލަސްތީނު މީހުންގެ ތެރެއިން ގާތްގަނޑަކަށް 2،000 މީހުން ދޫކޮށްލުމެވެ.

2023 ވަނަ އަހަރުގެ އޮކްޓޯބަރު 7 ވަނަ ދުވަހު ހަމާސްއިން އިސްރާއީލަށް ދިން ކުއްލި ހަމަލާގެ ތެރޭގައި ރަހީނުންގެ ގޮތުގައި ގެންދިޔަ ގާތްގަނޑަކަށް 250 މީހުންގެ ތެރެއިން ބައެއް މީހުން ވަނީ ޣައްޒާގައި ބަންދުގައި ތިއްބައި މަރުވެފައެވެ. އަދި އަނެއްބައި މީހުން ވަނީ ދޫކޮށްލެވި ނުވަތަ ސަލާމަތްކުރެވިފައެވެ.

ހަނގުރާމަ ހުއްޓާލި ދުވަހު 3 ރަހީނުން ދޫކޮށްލާފައިވާއިރު އޭގެ ބަދަލުގައި 90 ފަލަސްޠީނު މީހުން އިސްރާއީލުގެ ޖަލު ބަންދުން ދޫކޮށްލާފައި ވެއެވެ. އޭގެ އިތުރުން ހަނގުރާމައިގެ ސަބަބުން ހަލާކުވެފައިވާ ސަރަޙައްދުތަކަށް އިންސާނީ އެހީ ފޯރުކޮށްދިނުން ވެސް މިހާރު ވަނީ ފެށިފައެވެ.

އިސްރާއީލުން 15 މަސް ދުވަހުގެ މުއްދަތައް ޣައްޒާ ސްޓްރިޕް އަށް ދިން އަނިޔާވެރި ހަމަލާތަކުގެ ސަބަބުން އެތަނުގެ އިމާރާތްތަކުގެ ތިންބައިކުޅަ ދެބައި ވަނީ ގެއްލުން ލިބި ނުވަތަ ފުނޑުފުނޑުވެފައެވެ.

ޣައްޒާގެ އިދާރާތަކުން ބުނާގޮތުގައި، އިސްރާއީލުގެ ހަމަލާތަކުގައި 47،000 އަށްވުރެ ގިނަ ފަލަސްޠީނު މީހުން ޝަހީދުވެފައިވެއެވެ.