ރަސްމާދޫގައި ހައުސިންގ ޔުނިޓް މަޝްރޫއެއް ކުރިއަށް ގެންދާނެ ކަމަށް ރައީސުލްޖުމްހޫރިއްޔާ ޑރ.މުހައްމަދު މުއިއްޒު ވިދާޅުވެއްޖެއެވެ.
ރައީސް މުއިއްޒު މިހެން ވިދާޅުވީ، ރަސްމާދޫ ރައްޔިތުންނާ ބައްދަލުކުރައްވައި ދެއްކެވި ވާހަކަފުޅުގައެވެ.
މިއަހަރުގެ ބަޖެޓުގައި އިސްކަންދޭ ތަރުތީބުގައި އެއްވަނައިގައި އޮތީ ބޯހިޔާވަހިކަމުގެ މަޝްރޫއުތައްކަން ފާހަގަކުރައްވައި ރައީސް މުއިއްޒު ވިދާޅުވީ ގެދޮރުގެ ދަތިކަމާއި ތޮއްޖެހުމަކީ، އިޖުތިމާއީ މައްސަލަތަކުގެވެސް މައިގަނޑު ސަބަބުކަމަށެވެ. އެހެންކަމުން، ރަސްމާދޫއަށްވެސް ދިމާވެފައިވާ މި މައްސަލައަށް ހައްލެއް ހޯދުމުގެ ގޮތުން، ހައުސިންގ ޔުނިޓު މަޝްރޫއެއް ކުރިއަށް ގެންދާނެ ކަމަށް އެމަނިކުފާނު ވިދާޅުވިއެވެ.
މި އަހަރަށް މި ފާސްކޮށްގެން ތަންފީޒު މިކުރާ ބަޖެޓުގައިވެސް އެންމެ އިސްކަމެއް މިދެނީ، އާ މަޝްރޫޢުތަކުގައިވެސް، މި މައްސަލަ ޙައްލުކުރަން މަސައްކަތް ކުރަން. އެހެންވީމާ، އިރާދަކުރެއްވިއްޔާ އަޅުގަނޑުމެން ކުރިއަށްގެންދާ ގެދޮރުވެރިކަމުގެ މަޝްރޫޢުތަކުގެ ތެރެއިން، މި ރަށުގައި އަޅުގަނޑުމެން ހައުސިންގ ޔުނިޓް މަޝްރޫޢެއް، އިސްކަމެއް ދީގެން ކުރިއަށް ގެންގޮސްދޭނެކަން ތިޔަބޭފުޅުންނަށް ވަރަށް ސާފުކޮށް ޔަޤީންކަމާއެކު ދަންނަވާލަން.ރައީސުލްޖުމްހޫރިއްޔާ ޑރ.މުހައްމަދު މުއިއްޒު
ރަސްމާދޫގައި ހައުސިންގ ޔުނިޓް މަޝްރޫއެއް ހިންގަވައިދެއްވާނެ ކަމަށް ރައީސް މުއިއްޒު ވިދާޅުވެފައިވާއިރު، އެމަނިކުފާނުގެ ވެރިކަމުގައި މިހާތަނަށް އެއްވެސް ހައުސިންގ ޔުނިޓެއްގެ މަޝްރޫއެއް ހިންގާފައިނުވެއެވެ. އަދި އެރަށުގައި ހައުޝިންގ ޔުނިޓްގެ މިމަޝްރޫއު ހިންގާނެ ވަކި އަހަރެއް ނުވަތަ ދުވަހެއް ވެސް އެމަނިކުފާނު ހާމަކުރައްވާފައެއްނުވެއެވެ. އަދި ކުރީގެ ރައީސް އިބްރާހިމް މުހައްމަދު ސާލިހުގެ ސަރުކާރުގައި މާލެސިޓީން ދޫކޮށްފައިވާ ގޯއްޗާއި، ފްލެޓުތައް ވެސް ވަނީ ދޫނުކޮށް ހިފަހައްޓާފައެވެ. އަދި ރަށްރަށުގެ ތަރައްގީއަށް ހިންގާ މަޝްރޫއުތަކުގެ ތަފްސީލު ވެސް ވަނީ ބަޖެޓުން ސިއްރު ވެސް ކޮށްފައެވެ.
މީގެ އިތުރުން ވެސް ރަސްމާދޫގެ ތަރައްގީއަށް ރައީސް މުއިއްޒު ވަނީ ގިނަ ވައުދުތަކެއް ވެވަޑައިގެންފައެވެ.
އެގޮތުން ހުއްޓިފައިވާ ފެނުގެ ނިޒާމުގެ މައްސަލައަށް އިޝާރާތްކުރައްވައި ރައީސް މުއިއްޒު ވިދާޅުވީ، އެ މަސައްކަތް ހަވާލުކުރި ފަރާތުން ރަސްމާދޫ ނޫން ރަށްރަށުގައިވެސް މަސައްކަތް ހުރީ ހުއްޓާލާފައިކަމަށެވެ. ނަމަވެސް އަލުން އެ މަސައްކަތްތައް ފަށައި، މަސައްކަތް އެއްކޮށް ނިންމަވައިދެއްވާނޭކަމުގައި އެމަނިކުފާނު ވިދާޅުވިއެވެ. ސްކޫލްގެ މަސައްކަތްވެސް، ގޮސްފައިވާ ހިސާބު ދެނެގަނެ، ދެން ނިންމަން ހުރި މަސައްކަތްތައް، ސަރުކާރުން ކުރައްވާނޭ ކަމަށް ރައީސް މުއިއްޒު ވިދާޅުވިއެވެ. އަދި ކުޅިވަރާއި ހަށިހެޔޮކަމުގެ ދާއިރާއިންވެސް ބޭނުންވާ ކަންކަން ފުރިހަމަކޮށްދެއްވައި، ލެބޯޓްރީއެއް ހިމެނޭ ގޮތަށް ރަށު ސިއްޙީ މަރުކަޒުގެ ޖާގަ އިތުރުކޮށްދެއްވާނެ ކަމަށްވެސް ރައީސް މުއިއްޒު ވިދާޅުވިއެވެ.
ރަސްމާދޫ އަކީ، އެރަށުގައި ފުލުހުން ގާއިމުވެ ތިބޭ، އަދި ފުލުހުންގެ ޚިދުމަތްދޭ ރަށަކަށް، ވީހާވެސް އަވަހަށް ހެއްދެވުމަށް ނިންމަވާފައިވާ ކަމަށް އެމަނިކުފާނު ވިދާޅުވިއެވެ. އަދި ރަސްމާދޫ އެންޓަނާ މިހާރު ހުރި ތަނުން ބަދަލުކުރުމާއި، އެކަމުގައި ދޭންޖެހޭ ފައިސާއާ ގުޅޭގޮތުން، އުރީދޫއާ ވާހަކަދައްކައިގެން، ކަމާބެހޭ ވުޒާރާތަކުގެ ތެރެއިން ހައްލު ހޯއްދަވައިދެއްވާނެކަމަށް ރައީސް މުއިއްޒު ވިދާޅުވިއެވެ.
މި ރަސްމިއްޔާތުގައި، ރަސްމާދޫގައި އޭ.ޓީ.އެމް ބެހެއްޓުމުގެ މަސައްކަތާ ގުޅޭގޮތުން ބޭންކް އޮފް މޯލްޑިވްސް އާއި އެ ރަށު ކައުންސިލާ ދެމެދު ވަނީ އެއްބަސްވުމެއްގައި ސޮއިކުރައްވާފައެވެ.
