ދުނިޔެ ހޫނުވުމާ ދެކޮޅަށް ބައިނަލްއަގްވާމީ ފެންވަރުގައި ކުރެވޭ އެންމެ މުހިންމު މަސައްކަތްތައް ބިނާވެފައިވާ ޕެރިސް މޫސުމީ އެއްބަސްވުމުން އެމެރިކާ ވަކިވާނެ ކަމަށް ރައީސް ޑޮނަލްޑް ޓްރަމްޕް އަނެއްކާވެސް ވައުދުވެވަޑައިގެންފިއެވެ.

2017 ވަނަ އަހަރު ޓްރަމްޕްގެ ފުރަތަމަ ދައުރުގައިވެސް މިފަދަ ފިޔަވަޅެއް އަޅުއްވާފައިވީ ނަމަވެސް، 2021 ވަނަ އަހަރު ރައީސް ޖޯ ބައިޑަންގެ ރައީސް ކަމުގެ ފުރަތަމަ ދުވަހު ޓްރަމްޕްގެ އެ ނިންމުން ވަނީ ބަދަލުކުރައްވާފައެވެ.

އެމެރިކާ އަށް މި އެއްބަސްވުމުން ރަސްމީކޮށް ވަކިވުމަށް ގާތްގަނޑަކަށް އަހަރެއްހާ ދުވަހުގެ މުއްދަތު ބޭނުންވާނެއެވެ.

ވެރިކަމަށް ވަޑައިގެންނެވި ޓްރަމްޕްގެ އައު ސިޔާސަތުތަކުގެ ދަށުން ވައިޓް ހައުސް އިން ވަނީ "ޤައުމީ ހަކަތައިގެ ކުއްލި ނުރައްކަލުގެ ހާލަތު" އިޢުލާނުކޮށް، އެމެރިކާގެ މޫސުމާބެހޭ ގަވާއިދުތައް ބަދަލުކޮށް، ތެލާއި ގޭސް އުފެއްދުން އިތުރުކުރުމަށް ގިނަ ބަދަލުތަކެއް ގެނައުމަށް ރޭވިފައިވާކަން ހާމަކޮށްފައެވެ.

މޫސުމާ ބެހޭ ސިޔާސަތުތަކަށް އެމެރިކާ ސަރުކާރުން މިހާ ބޮޑު ބަދަލެއް ގެނައިރު، 2024 ވަނަ އަހަރު ފާހަގަ ވެގެން ދިޔައީ ދުނިޔޭގެ ފިނިހޫނުމިން ޞިނާއީ އިންގިލާބުގެ ކުރީގެ މިންވަރަށްވުރެ 1.5 ޑިގްރީ ސެލްސިއަސް އަށް މައްޗަށް ދިޔަ އަހަރުގެ ގޮތުގައެވެ. މިއީ ކަލަންޑަރު އަހަރެއްގައި މިފަދަ ސީރިއަސް އިތުރުވުމެއް އައި ފުރަތަމަ ފަހަރެވެ.

ޕެރިސް އެއްބަސްވުމަކީ ޤާނޫނީ ގޮތުން އަމަލު ކުރުން ލާޒިމްކުރާ މުޢާހަދާ އެއް ނޫން ނަމަވެސް، މިއީ ދުނިޔޭގެ ފިނިހޫނު މިން މައްޗަށް ދިއުން ކޮންޓްރޯލު ކުރުމަށް، ޖައްވަށް ބޭރުވާ ދުނިޔެ ހޫނު ކުރާ ގޭސްތައް މަދުކުރުމަށް ދުނިޔޭގެ އެއްބާރުލުން އިތުރުކުރުމަށް މަގުދައްކައިދޭ އެއްބަސްވުމެކެވެ.

މި އެއްބަސްވުމާ މެދު ރައީސް ޓްރަމްޕްގެ ނުރުހުން 2017 ވަނަ އަހަރު އޭނާ ދެއްވި ބަޔާނުގައި ވަނީ ފާހަގަ ވެގެން ގޮސްފައެވެ. އޭނާ ވިދާޅުވީ އޭނާ އިންތިޚާބުވެފައިވަނީ "ޕިޓްސްބާގްގެ ރައްޔިތުން ތަމްސީލު ކުރުމަށް ނުވަތަ ޕެރިހުގެ ރައްޔިތުން ތަމްސީލުކުރުމަކަށް ނޫން" ކަމަށެވެ.

ޕެރިސް އެއްބަސްވުމުން ވަކިވުމުން އެމެރިކާ ބައިވެރިވާނީ 10 އަހަރުކުރިން ފަރަންސޭސި ވިލާތުގެ ވެރިރަށުގައި ސޮއިކުރެވުނު މި އެއްބަސްވުމުން ބޭރުގައި ތިބި ހަމައެކަނި ޤައުމުތަކުގެ ގޮތުގައި ހިމެނޭ އީރާން، ޔަމަން އަދި ލީބިޔާ އާ އެވެ.