ހޯމްލޭންޑް ސެކިއުރިޓީ މިނިސްޓަރު އަލީ އިހުސާނުގެ ބަހުން އޭނާ އެހުރީ ދައުލަތުގެ ވަސީލަތްތައް ޕީއެންސީގެ ފޯމްފުރަން ބޭނުންކުރިކަމަށް އެއްބަސްވެގެން ކަމަށާއި، އޭނާގެ މައްޗަށް ޖިނާއީ ތަހުގީގެއް ހިންގަންޖެހޭނެކަމަށް ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު ވިދާޅުވެއްޖެއެވެ.
ޕީއެންއެފް ފްރަންޓް އޮފީސް ޖަލްސާގައި ވާހަކަ ދައްކަވަމުން ޖަމީލް ވިދާޅުވީ ރާއްޖޭގެ ގާނޫނުއަސާސީ މާނަކުރުމުގައި އޮންނަނީ ކުރިއަރާފައިވާ ގައުމުތަކަށް ބެލުން ކަމަށެވެ. އެހެންކަމުގައިވާނަމަ ހައްގުތައް ހިމާޔަތްކުރެވެން ޖެހޭ ކަމަށާއި، ނަމަވެސް އެކަން ހިނގަނީ އެގޮތަށް ނޫން ކަމަށެވެ. ހޯމް މިނިސްޓަރު އިހުސާން ވިދާޅުވަނީ ޑީއެންއާރަށް ދެފަހަރަކަށް ދިޔައީ އެތަނުގައި ކުރި މަސައްކަތް ބަލާލުމަށް ކަމަށް ޖަމީލް ވިދާޅުވިއެވެ. ޖަމީލް ވިދާޅުވީ ގާނޫނުއަސާސީގައި ބުނަނީ ސަރުކާރުގެ އެއްވެސްތަނެއްގައި ސަރުކާރުގެ އެއްވެސް ވަސީލަތެއް އަމިއްލަ ބޭނުމަކަށް ބޭނުންކޮށްގެން ނުވާނެ ކަމަށެވެ.
ޕީޕީއެމްއަށް ލިބުނު 5 އަހަރުގެ ތެރޭގައި ވެސް ކުރީގެ ރައީސް އިބްރާހިމް މުހައްމަދު ޞާލިހު މަޖިލިސް އިންތިހާބާ ދިމާކޮށް ރައީސުލްޖުމްހޫރިއްޔާގެ ރަސްމީ ލޯންޗްކޮޅުގައި ނިޝާން ޖައްސަވައިގެން އަމިއްލަ ކެމްޕޭންގައި ބޭނުންކުރެއްވުމުން އެ މައްސަލަ އެއިރު ޖެެއްސެވި ކަމަަށެވެ. އަދި އެ ވާހަކަ ދެއްކުމަށްފަހުގައި މިއަދު މި ދައްކަނީ ހޯމް މިނިސްޓްރީ ތެރޭގައި ކުރި މަސައްކަތަކީ ޕީއެންސީ ކިޔާ ޖަމާއަތެއްގެ ފޯމް ސަރުކާރުގެ އިދާރާއެއްގެ ތެރޭގައި ސަރުކާރުގެ ވަސީލަތްތައް ބޭނުންކޮށްގެން އެކަންކަން ކުރިކަމަށް އިހުސާން އިއުތިރާޒުވާ ކަމަށެވެ.
ތިމަންނަ ދިޔާމޭ ތިމަންނަ ދިޔައީ ދެފަހަރު ޕިއްޒާ ކާންށޭ. އެކަން އެކަނި ނުފުދޭތޯ އާންމު ސަބަބުވެރި އިންސާނެއްގެ ވިސްނުމުން އެހިސާބުން އިހުސާން ގެއަށް ވަޑައިގަންނަވަން ނޫނިއްޔާ އިހުސާން އެއްކިބާވާން. އިހުސާނުގެ ދިފާއުގައި ނުކުމެ ލައްކަ ވާހަކަ އެބަދައްކާ. ވަރަށް މަސައްކަތްތެރި އެވެނި މިވެނި ކަންތައްތަކެއް ކުރައްވާ މީހެކޭ. މިހާރު އެމްޑީޕީއޭ އޭނާގެ ފަހަތުން އަޅުވާލައިގެން އުޅެނީ. ބަލަގަ މިއުޅެނީ އެމްޑީޕީ އަޅުވައިގެނެއް ނޫނޭ. މިތާގަ ބަޔަކު އެއްވެސް ކަމެއް ނުކުރޭ.ކުރީގެ ނައިބް ރައީސް ޑރ. މުހައްމަދު ޖަމީލް އަހުމަދު
ޖަމީލް ވިދާޅުވީ ސަރުކާރުގެ އިދާރާއެއްގެ ތެރޭގައި ހުރެގެން އިދާރާއެއްގެ ވަސީލަތްތައް ބޭނުންކުރުން އެކަނިވެސް އިހުސާނުގެ މައްޗަށް ޝަރިއަތެއް ހިންގާ، ޖިނާއީ މައްސަލައެއް ބަލާ ތަހުގީގުކުރެވި އެކަންކުރެވެންދެން އިހުސާން އެއްފަރާތްވާންޖެހޭނެ ކަމަށެވެ.
ޖަމީލް ވިދާޅުވީ އިހުސާން އެހުރީ ކުށެއްކޮށްގެން ކަމަށާއި، މަގާމުގެ ނާޖާއިޒް ފައިދާ ނަގައި ކޮރަޕްޝަން ހިންގާފައިވާ ކަމަށެވެ. އަދި އެކަމުން އެކަނިވެސް އިހުސާން އެއްފަރާތްވާންޖެހޭނެ ކަމަށް ޖަމީލް ވިދާޅުވިއެވެ.
