އެންޓި ކޮރަޕްޝަން ކޮމިޝަން (އޭސީސީ) އިން ބަލަމުންދާ މައްސަލައަކާއި ގުޅިގެން ސްޓެލްކޯގެ ކުރީގެ މެނޭޖިންގް ޑިރެކްޓަރ އަހުމަދު ޝަރީފްގެ ޕާސްޕޯޓު ހިފަހެއްޓުމާ ގުޅިގެން އޭނާ އަކީ ފިލަން ޖެހޭ މީހެއް ނޫން ކަމަށް ވިދާޅުވެއްޖެއެވެ.
ޝަރީފް ވިދާޅުވީ އޭނާގެ ޕާސްޕޯޓް ހިފެހެއްޓިކަން އެންގީ އަންގާރަވިލޭރޭގެ ގަޑިއެއްގައި ކަމަށާއި އެކަމުން ހައިރާން ކަމެއް ލިބުނު ކަމަށެވެ.
ބަލަމުންދާ މައްސަލައެއްގައި ކަމަށް ބުނެ އެއް ފަހަރު ސުވާލު ކޮށްފައިވާ ކަމަށާއި އަދި ބަޔާނެއްވެސް ނަގާފައި ނުވާ ކަމަށް ޝަރީފް ވިދާޅުވިއެވެ.
އިލެކްޝަންސް ކޮމިޝަންގެ ރައީސްކަންވެސް ކުރިން އަދާކުރެއްވި ޝަރީފް ވިދާޅުވީ، އޭނާ އަށް ޖަވާބުދާރީ ނުވެވޭވަރުގެ ކަމެއް ނޯންނާނެ ކަމަށާއި، ޕާސްޕޯޓު ހިފެހެއްޓުމަށް ކޯޓުން ނެރުނު އަމުރު އިސްތިއުނާފު ކުރެވޭނެ ޖާގަ އޮތް ނަމަވެސް އެކަންވެސް ކުރައްވަން ބޭނުން ނުވާ ކަމަށެވެ.
"ދައުލަތުގެ މުއައްސަސާ އަކަށް ލިބިގެންވާ ގާނޫނީ ބާރު އެކްސަސައިޒް ކުރުމަކީ ކަންބޮޑުވާން ޖެހޭ ކަމެއް ނޫން. އިންސާފުވެރި ކަމާއެކު މުއާމަލާތް ކުރުން މުހިންމީ." ޝަރީފް ބުދަ ދުވަހު އެކްސް ގައި ކުރެއްވި ޕޯސްޓެއްގައި ވިދާޅުވިއެވެ.
ޝަރީފް ވިދާޅުވެފައިވަނީ ދިފާއު ނުވެވޭ ވަރުގެ އަމަލެއް އޭނާ އަދާކުރެއްވި އެއްވެސް ވަޒީފާއެއް އަދާ ކުރުމުގައި ކުރައްވާފައި ނުވާނެ ކަމަށެވެ.
ޝަރީފް ވިދާޅުވީ، ކޮންމެ ތަހުގީގެއް ހިންގިޔަސް އެ ތަހުގީގަށް އޭނާ ހުންނެވީ އެއްބާރުލުން ދެއްވަން ތައްޔާރަށް ކަމަށެވެ.
ޝަރީފް ޕާސްޕޯޓު ހިފަހައްޓާފައިވަނީ ސީދާ ކޮން މައްސަލައަކާއި ގުޅިގެން ކަމެއް އޭސީސީ އިން ހާމަކޮށްފައެއް ނުވެއެވެ.
ޝަރީފް އަކީ އިދިކޮޅު އެމްޑީޕީ ގެ ހަރަކާތްތަކުގައި އިސް ސަފުގައި މަސައްކަތް ކުރައްވާ ފަރާތެކެވެ.
ޑރ. މުއިއްޒުގެ ސަރުކާރުގެ ތެރޭގައި ޚިޔާނާތާއި ކަރަޕްޝަންގެ ގިނަ މައްސަލަތަކެއް ފެންމަތިވެފައިވާ ދަނޑިވަޅެއްގައި އިދިކޮޅަށް ނިސްބަތްވާ ފަރާތްތަކުގެ މައްޗަށް އެކި ތުހުމަތުތައް ކޮށް މައްސަލަތައް ބަލަމުންދާކަން ފާހަގަ ކުރެވެއެވެ.
