ދަ ހޭގްގައި ހުންނަ އިންޓަނޭޝަނަލް ކޯޓު އޮފް ޖަސްޓިސްގެ ރިޔާސަތު ބަލަހައްޓަވާ ފަނޑިޔާރު ނަވާފް ސަލާމް ލުބުނާނުގެ ބޮޑު ވަޒީރު ކަމަށް އައްޔަން ކުރައްވައިފިއެވެ. މިކަން ލުބުނާނުގެ ރިޔާސީ ގަނޑުވަރުން ވަނީ ހާމަކޮށްފައެވެ.

"ޤައުމުގެ ރައީސް ވަނީ ފަނޑިޔާރު ނަވާފް ސަލާމް އަށް ސަރުކާރު އެކުލަވާލުމުގެ މަސްއޫލިއްޔަތު ހަވާލުކުރައްވާފަ. އޭނާ މިވަގުތު ހުންނެވީ ގައުމުން ބޭރުގައި، މާދަމާ ވަޑައިގަންނަވާ ގޮތައް ވަނީ ނިންމަވާފައި" ރިޔާސީ ގަނޑުވަރުން ބުނެފައިވެއެވެ.

ސަލާމް އަށް ވަނީ ލުބުނާނުގެ ބޮޑުވަޒީރު ކަމަށް ވަޑައިގެންނެވޭ ވަރަށް ތާއީދު ލިބިވަޑައިގެންފައެވެ. ހޯމަ ދުވަހު މަޖިލިސް މެންބަރުންގެ އަޣުލަބިއްޔަތުން އޭނާ އަށް ތާއީދު ކުރުމާއެކު، ހިޒްބުﷲ އަށް ވަނީ ބޮޑު ސިހުމެއް ލިބިފައެވެ. ހިޒްބުﷲ ވަނީ ވާދަވެރި ފަރާތްތަކުން އެމީހުން އެކަހެރިކުރަން މަސައްކަތްކުރާކަމުގެ ތުހުމަތު ކޮށްފައެވެ.

ސަލާމް އަށް ލިބުނު ތާއީދުން ދައްކައިދެނީ، ޝީޢާ ޖަމާޢަތް ކަމުގައިވާ ހިޒްބުﷲ އަށް ފާއިތުވި އަހަރު އިސްރާއީލާއެކު ހިނގި ހަނގުރާމައިގައި ބޮޑު ގެއްލުމެއް ލިބި، އަދި އޭގެ ފަހުން ސޫރިއާގެ އެކުވެރި ބައްޝާރު އަލް-އަސަދު ވެރިކަމުން ވައްޓާލުމާއެކު، ލުބުނާނުގެ މަޛްހަބީ ޖަމާޢަތްތަކުގެ މެދުގައި ބާރުތައް ބެހިފައިވާ ގޮތައް އައިސްފައިވާ ބޮޑު ބަދަލެވެ.

ހިޒްބުﷲ އަށް ނިސްބަތްވާ މަޖިލިސް މެންބަރު މުޙައްމަދު ރަޢުދު ބުނެފައިވަނީ، މިހާރުގެ ބޮޑުވަޒީރު ނަޖީބް މީކާތީ އެ މަޤާމުގައި ދެމިހުރުމަށް އެ ޖަމާޢަތުން ބޭނުން ކަމަށާއި، އިދިކޮޅު ފަރާތްތަކުން މަސައްކަތްކުރަމުން ދަނީ ބައިބައިކުރުމަށާއި އެކަހެރިކުރުމަށް ކަމަށެވެ. އޭނާ ބުނެފައިވަނީ، ފާއިތުވި ހަފުތާގައި ޢައޫން ރައީސް ކަމަށް އިންތިޚާބު ކުރުމަށް އެ ޖަމާޢަތުން "އަތް ދިއްކޮށްލި" ނަމަވެސް، "އަތް ކެނޑިފައިވާ" ކަމަށެވެ.

ފާއިތުވި ހަފުތާގައި އެމެރިކާ އަދި ގަލްފު ޤައުމުތަކުގެ ތާއީދު ލިބިފައިވާ ސިފައިންގެ ވެރިޔާ ޖެނެރަލް ޢައޫން ރައީސް ކަމަށް އިންތިޚާބު ވުމަކީވެސް، ކުރިން ހިޒްބުﷲ އަށް ނިންމުންތަކުގައި ނުފޫޒު ފޯރުވޭ މިންވަރަށް ސިޔާސީ މަޝްރަޙުގައި އައިސްފައިވާ ބަދަލުތަކުގެ އިތުރު ހެއްކެއް ކަމަށް ދިރާސާ ކުރާ ފަރާތްތަކުން ބުނެފައިވެއެވެ.

ރައީސް ޢައޫން ވަނީ ހޯމަ ދުވަހު މަޖިލީހުގެ 128 މެންބަރުންނާއެކު ބޮޑުވަޒީރު ޢައްޔަންކުރުމާ ގުޅޭގޮތުން މަޝްވަރާ ކުރައްވާފައެވެ. އެންމެ ގިނަ ވޯޓު ލިބިވަޑައިގަންނަވާ ފަރާތެއް ބޮޑު ވަޒީރު ކަމަށް ޢައްޔަންކުރެއްވުމަކީ އޭނާގެ މައްޗަށް ލާޒިމު ކަމެކެވެ.

ހޯމަ ދުވަހުގެ މެންދުރުފަހުގެ ވަގުތެއްގައި ސަލާމް އަށް ވަނީ 85 މެންބަރުންގެ ތާއީދު ލިބިވަޑައިގެންފައެވެ.

ލުބުނާނުގެ މަޛްހަބީ ބާރު ހިއްސާކުރުމުގެ ނިޒާމުގެ ދަށުން، ދައުލަތުގެ މަޤާމުތައް ދީނީ ނިސްބަތުގެ މައްޗަށް ބިނާކޮށް ބަހާލެވިފައިވާއިރު، ބޮޑު ވަޒީރަކީ ކޮންމެހެން ސުންނީ މުސްލިމަކަށް ވާންޖެހެއެވެ. ރައީސްކަމުގެ މަޤާމު ދެވެނީ މެރޮނައިޓް ކްރިސްޓިއަނަކަށެވެ. އަދި މަޖިލީހުގެ ރައީސަކަށް ވާންޖެހެނީ ޝީޢާ މުސްލިމަކަށެވެ.