ދަ ޑިމޮކްރަޓްސްގެ ނައިބު ރައީސްކަމުގެ މަގާމުން މުޙައްމަދު ޝިފާޒު (ޝިއްޕެ) އިސްތިއުފާ ދެއްވައިފި އެވެ.
ޑިމޮކްރަޓްސްގެ ނައިބު ރައީސްކަމުން ޝިފާޒު އިސްތިއުފާ ދެއްވާފައި ވަނީ ހޮނިހިރު ދުވަހުގެ މެންދުރު ފަހުގެ ވަގުތެއްގަ އެވެ. އެކަން ކަށަވަރުކޮށްދެއްވަމުން ޝިފާޒް ވިދާޅުވީ ޑިމޮކްރަޓްސްގެ ނައިބު ރައީސްކަމުގެ މަގާމުން އިސްތިއުފާ ދެއްވުމަށް ނިންމެވީ، އެ ޕާޓީގައި ހުންނަވައިގެން ކުރައްވަމުން ގެންދަވާ ސިޔާސީ މަސައްކަތަށްވުރެ ފުޅާ ދާއިރާއެއްގައި ސިޔާސީ ޙަރަކާތް ހިންގެވުމަށް ބޭނުންފުޅުވާތީ އެ މަގުން ކުރިއަށް ވަޑައިގެންނެވުމުގެ ބޭނުންފުޅުގައި ކަމަށެވެ.
ޝިފާޒު އިދިކޮޅު ދިވެހި ރައްޔިތުންގެ ޑިމޮކްރަޓިކް ޕާޓީ (އެމްޑީޕީ) އަށް ސޮއި ކުރެއްވި ކަމުގެ ޚަބަރުތަކެއް ފެތުރިފައިވާ މި ދަނޑިވަޅުގައި، ޝިފާޒު އެމްޑީޕީ އަށް ސޮއި ކުރެއްވިންތޯ ރާއްޖެ އެމްވީ އިން ސުވާލު ކުރުމުން އޭނާ ވިދާޅުވީ، އަދި ސޮއި ނުކުރައްވާ ކަމަށެވެ.
ޑިމޮކްރަޓްސްގެ ނައިބު ރައީސްކަމުން ޝިފާޒު އިސްތިއުފާ ދެއްވާފައިވާއިރު، ޝިފާޒް ވަނީ މީގެ ކުރިން އިދިކޮޅު މައި ޕާޓީ، އެމްޑީޕީގައި ވެސް ވަރަށް އިސްކޮށް މަސައްކަތް ކުރައްވައިފަ އެވެ. އެގޮތުން އެމްޑީޕީގެ ނައިބު ރައީސްކަމުގެ މަގާމު ޝިފާޒު އަދާކުރެއްވި އެވެ.
މީގެ އިތުރުން ރައްޔިތުންގެ މަޖިލީހުގެ ބާރަށު ދާއިރާގެ މެމްބަރުކަން ވެސް ޝިފާޒު ވަނީ ކުރައްވައިފަ އެވެ. ނިމިދިޔަ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ޝިފާޒު ވަނީ، ރައީސުލްޖުމްހޫރިއްޔާގެ އެޮފީހުގެ މިނިސްޓަރު ކަމުގެ މަގާމު ވެސް އަދާކުރައްވައިފަ އެވެ. އެ މަގާމުން އޭރު ޝިފާޒު ވަކި ކޮށްފައި ވަނީ، އެމްޑީޕީ ދެ ބައިވެގެން ދިޔަ ދަނޑިވަޅުގަ އެވެ.
އޭގެ ފަހުން ޝިފާޒު ވަނީ ދަ ޑިމޮކްރަޓްސް އުފެއްދެވުމުގައި ވެސް ވަރަށް އިސްކޮށް މަސައްކަތް ކުރައްވައިފަ އެވެ.
