ހޮނިހިރު ދުވަހުގެ ވިއްސާރަ އާ ގުޅިގެން 7 ގޭބިސީ އެއްގެ 44 މީހުންނަށް ވަގުތީ ބޯހިޔާވަހި ކަމާއި ކެއިން ބުއިމުގެ އިންތިޒާމު ނޭޝަނަލް ޑިޒާސްޓަރ މެނޭޖްމަންޓް އޮތޯރިޓީ (އެންޑީއެމްއޭ) އިން ހަމަ ޖައްސައިދީފި ކަމަށް ބުނެފިއެވެ.
އެންޑީއެމްއޭ އިން ބުނީ މިފަރާތްތައް ވަގުތީ ބޯހިޔާވަހިކަމަށް ބަދަލު ކުރެވުނީ މިގެތަކުގެ ފާޚާނާތަކުން ނަޖިސް ލީކުވުމާއި ކައްކާ ކައިބޮއެ ހެދުމަށް ބުރޫ އަރާ އާންމު ދިރިއުޅުމަށް ހުރަސްއެޅިފައިވާ ހާލަތަށް ގޮސްފައިވާތީ ކަމަށެވެ.
ބޯކޮށް ވާރޭވެހި މާލޭގައި ފެންބޮޑުވެގެން ވެލިބަސްތާ ޖެއްސުމާއި ފެން ހިއްކުމުގެ މަސައްކަތް ދިވެހި ސިފައިންނާއި ފުލުހުން އަދި ސިޓީ ކައުންސިލް ގުޅިގެން ވަނީ ކުރިއަށް ގެންގޮސްފައެވެ.
ރާއްޖެއަށް މިހާރު ކުރަމުންދާ ވިއްސާރައިގައި ކުރިއަށް އޮތް 24 ގަޑއިރު ގެ ތެރޭ ބައެއް ސަރަޙައްދުތަކަށް ކެރީގެ އަސަރުކުރާނެ ކަމަށް މޫސުމާ ބެހޭ ޤައުމީ އިދާރާއިން ވަނީ ލަފާކޮށްފައެވެ. އަދި އަންނަ ހޯމަ ދުވަހުން ފެށިގެން ރާއްޖޭގެ މޫސުން އިތުރަށް ގޯސްވާނެކަމަށް ލަފާކުރެވޭ ކަމަށް ވެސް މެޓް އިން ވަނީ ބުނެފައެވެ.
ހޮނިހިރު ދުވަހުގެ ވިއްސާރަ އާ ގުޅިގެން އެމްއެންޑީއެފް މާލޭ އޭރިއާ ކޮމާންޑުން ކުރިއަށްގެންދިޔަ އޮޕަރޭޝަންގައި 104 ގެއަކަށް އެހީތެރިކަން ފޯރުކޮށްދީ، 528 ވެލި ބަސްތާ ޖަހައިދިން ކަމަށް ވަނީ ބުނެފައެވެ.
ފެން ހިންދުމަށް، މާލޭގެ އެކި ސަރަހައްދެއްގައި ޕަންޕު ބަހައްޓައިގެން އެމްއެންޑީއެފް އިން ވަނީ މަސައްކަތްކޮށްފައެވެ. އެމްއެންޑީއެފް އިން ބުނެފައިވާ ގޮތުގައި އެ މަސައްކަތުގައި 18،201 ޓަނުގެ ފެން ވަނީ ހިންދާފައެވެ.
