ރަތް ކަނޑުގައި ހަފުތާތަކެއް ވަންދެން އަނދަމުން ދިޔަ އަދި ތެޔޮ ލީކުވުމުގެ ބޮޑު ނުރައްކަލެއް ކުރިމަތިވެފައިވާ ތެޔޮ ޓޭންކަރެއް "ކާމިޔާބުކަމާއެކު" ސަލާމަތްކުރެވިއްޖެ ކަމަށް ސެކިއުރިޓީ ކުންފުންޏަކުން ހުކުރު ދުވަހު ބުނެފިއެވެ.

ސައުނިއަން ނަމަކަށް ކިޔާ މި އުޅަނދު ސަލާމަތް ކުރި އިރު އެއުޅަނދުގެ ސަބަބުން ނުރައްކާތެރި ހާދިސާ އެއް ހިނގާފާނެ ކަމަށް އޮތީ ބެލެވިފައެވެ. މި އުޅަނދުގައި އެއް މިލިއަން ފީފާ ތެޔޮ ހުރިއިރު، ޔަމަނުގެ ހޫތީން ދުރުން ހަމަލާ ދިނުމަށްފަހު ބޯޓަށް އަރާ ގޮވާތަކެތި ބޭނުންކޮށްގެން ބޯޓު ވަނީ ގޮއްވާލާފައެވެ.

މި އުޅަނދު ކަފުޖަހައިގެން ގެންދިއުމަށާއި، އަލިފާން ނިއްވުމަށާއި، އަދި ބާކީ ހުރި ތެޔޮ ބޭލުމަށް އެތައް މަސްތަކެއް ހޭދަވެފައިވެއެވެ.

ކުދި ހަތިޔާރުތަކާއި، ޕްރޮޖެކްޓައިލްތަކާއި، އަދި ޑްރޯން ބޯޓެއް ބޭނުންކޮށްގެން ހޫތީން ގްރީކް ދިދަ ނަގާފައިވާ ސައުނިއަން ޓޭންކަރަށް ފުރަތަމަ ހަމަލާދިނީ އޯގަސްޓް 21 ވަނަ ދުވަހުއެވެ.

އޮޕަރޭޝަން އެސްޕީޑެސް ނަމުގައި ކުރިއަށް ގެންދިޔަ އޮޕަރޭޝަނެއްގައި ފްރާންސްގެ ޑިސްޓްރޯޔަރަކުން، އުޅަނދު ދޫކޮށްލުމަށްފަހު އޭގައި ތިބި ފިލިޕީންސް އަދި ރަޝިޔާގެ 25 ފަޅުވެރިންނާއި އަދި 4 ސެކިއުރިޓީ މުވައްޒަފުން ސަލާމަތްކޮށް، ކައިރީގައިވާ ޖިބޫތީ އަށް ވަނީ ގެންގޮސްފައެވެ.

ހޫތީން ފަހުން ދައްކާލި މަންޒަރުތަކުގައި، އެމީހުން ސައުނިއަން އަށް އަރާ ގޮވާތަކެތި ބޭނުން ކޮށްގެން ބޯޓުގެ ތަންތަން ގޮއްވާލާފައި ވެއެވެ.

އޮކްޓޯބަރު 2023 ގައި އިސްރާއީލުން ޣައްޒާ ގައި ފެށި ހަނގުރާމައާ ގުޅިގެން، ހޫތީން 100 އަށްވުރެ ގިނަ ވިޔަފާރި އުޅަނދަށް މިސައިލްތަކާއި ޑްރޯންތަކުން ހަމަލާދީފައިވެއެވެ. އެމީހުން އެއް އުޅަނދު ހިފައި، ދެ އުޅަނދު ފައްތާލާފައިވެއެވެ. ހޫތީންގެ ހަމަލާތަކުގައި ބޯޓުދަތުރުކުރާ 4 މީހުން މަރުވެފައިވެއެވެ.                 

ހޫތީން ބުނާ ގޮތުގައި އެމީހުން އަމާޒުކުރަނީ އިސްރާއީލާއި، އެމެރިކާ އާއި އިނގިރޭސިވިލާތާ ގުޅުން ހުރި އުޅަނދުތަކަށެވެ. އޭގެ މަގްސަދަކީ ޣައްޒާ އަށް އިސްރާއީލުން ދެމުންދާ ހަމަލާތައް ހުއްޓުވުމަށް މަޖުބޫރުކުރުވުމަށް ކަމަށްވެސް ބުނެފައިވެއެވެ.