ރައީސުލްޖުމްހޫރިއްޔާ ލައްވައި ކަންކަން ކުރުވަން ނޯޓު ކޮޅެއް އަރުވައިގެން އުޅެން ޖެހުމަކީ އެންމެ ކަމުދާ ގޮތް ހެއްޔެވެ؟ ރިޔާސީ އިންތިޚާބަށް ކުރިމަތިލައްވައި، ރާއްޖޭގެ ގިނަ ރަށް ރަށަށް ވަޑައިގެން، ބަރިބަރި އަށް، ފަތި ފައްޗަށް ވައުދުތައް ވެވަޑައިގެންނެވީ ރައްޔިތުން ނޯޓެއް އަރުވައިގެން ހެއްޔެވެ؟ ރައްޔިތުން އާދޭސް ދަންނަވައިގެން ހެއްޔެވެ؟ ނޫނެވެ! އަމިއްލަފުޅަަށް ވަޑައިގެން، ވެރިކަން ހޯއްދެެވުމުގެ މަޤުސަދުގައި ރައްޔިތުނަށް ލައްކަ ވައުދުތައް ވެވަޑައިގެންނެވީ އެވެ. ބަނދަރުހެދުމާއި، ފެނާއި ނަރުދަމާ އެޅުމާއި، ސްކޫލު އިމާރާތްތައް އެޅުމާއި، މަލްޓިޕާޕަސް ހޯލުތައް އެޅުމާއި، މަގުތަކުގައި ތާރު އެޅުމާއި، ރަނގަޅު ޞިއްހީ މަރުކަޒުތަކެއް ޤާއިމު ކުރުމުން ފެށިގެން ގޮސް، ލިސްޓު ހުސްވަންދެން ވައުދުވެ ވަޑައިގެންނެވި އެވެ.

މި ވައުދުތައް ފުއްދައިދިނުމަށް އެދި ރައްޔިތުން ރައީސުލްޖުމްހޫރިއްޔާ އަށް ނޯޓެއް އަރުވަން ޖެހޭ ހެއްޔެވެ؟ މިއީ ކޮން ކަހަލަ ކަމެއް ހެއްޔެވެ؟ މަދަރުސާތަކުގައި ކިޔަވާ ތުއްތު ކުދިން ލައްވައި، ސްކޫލުގެ މަލްޓީޕާޕަސް ހޯލު އަޅައި ދިނުމާއި، ސްކޫލުތަކުގެ އައު އިމާރާތް ނިންމައި ދިނުމަށް އެދި ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު އަށް ނޯޓު ކޮޅެއް އެރުވުމަކީ ލަދުވެތި އަދި ހުތުރު ނޫން ދެން ކޮން ކަމެއް ހެއްޔެވެ؟ ކުރުކޮށްލާނަމެވެ. ރައީސް މުޢިއްޒު އަށް ނޯޓު ކޮޅެއް އެރުވުމުން، އެމަނިކުފާނު ވަރަށް ފަސޭހަ އިން އެކަމެއް ކުރައްވަ އެވެ. އެހެންކަމުން އަޅުގަނޑު ވެސް މި ނިންމީ ރައީސް މުޢިއްޒު އަށް ނޯޓު ކޮޅެއް އަރުވާށެވެ.

ރައީސް މުޢިއްޒު އެވެ! ވެރިކަމަށް ވަޑައިގަންނަވަން މަނިކުފާނު ވީ އެއްވެސް ވައުދެއް މިހާތަނަށް ނުފުދެ އެވެ. ފުރަ މާލެ ދޫކޮށް، އަޅުގަނޑު ނިސްބަތްވާ އަތޮޅު ތެރެއަށް ޖެހިލާނަމެވެ. ރަށް ރަށުގެ ރައްްޔިތުންނަށް މަނިކުފާނު ދެއްކެވި ހުވަފެންތަކާއި، ވެވަޑައިގެންނެވި ވައުދުތައް ހަނދާން ކުރައްވާށެވެ. ވެރިކަަމަށް އެއް އަހަރުވީއިރު، ތަރައްޤީގެ މަޝްރޫއެއް ހިނގާ ހަމަ އެންމެ ރަށެއް ވެސް މި އުޑު ދަށުގައި ނެތެއް ނޫންތޯ އެވެ؟ ހަދަހަަދައި ހުރި ބަނދަރުތައް ހުއްޓިއްޖެ އެވެ! އަޅައަޅައި ހުރި ފެން ހޮޅި އާއި، ގުޅަ ގުޅައި ހުރި ނަރުދަމާ ހޮޅިތައް ވެސް ހުއްޓިއްޖެ އެވެ! ޤާއިމު ކުރަމުން ދިޔަ ޞިއްޙީ މަރުކަޒުތަކާއި، މަދަރުސާ ހޯލުތަކާއި، ކުޅިވަރު ކުޅޭ ކޯޓުތައް ވެސް މުޅިން ސުމަކަށް ވެއްޓި، ހުއްޓިއްޖެ އެވެ!

ލޮބުވެތި ރައީސް މުޢިއްޒު އެވެ! އެއް އަހަރު ދުވަހުގެ ތެރޭގައި އެއްވެސް މަޝްރޫއެއް ކުރިއަށް ނުދިޔަ އެވެ! އަޅުގަނޑުމެންނަށްޓަކައި މަނިކުފާނު އިސްތިއުފާ ދެއްވާށެވެ! އާދޭހެވެ!

ރައީސް މުޢިއްޒު އެވެ! މަނިކުފާނު ވެރިކަމާ ހަވާލުވީއިރު މިއީ ހިނގަ ހިނގައި އޮތް ދައުލަތެކެވެ. ބަރާ ބަރަށް ދައްކަން ޖެހޭ ބިލުތަކަަށް ފައިސާ ދައްކަމުން އައި ދައުލަތެކެވެ. ވިޔަފާރިތަކަށް ފަހި ދުވަސްތަކެއް ފެންނަމުން ދިޔަ ޤައުމެކެވެ. ވިޔަފާރިވެރިން ހޭބޯނާރައި އުޅުނީ، އަވަސް އަވަހަށް މުދާ ގެނައުމުގަ އެވެ. މިގެނައީ، އެ ހުސްވީ އެވެ. ޤައުމުގެ ކުދި ވިޔަފާރިތަކުން ފެށިގެން ގޮސް، ބޮޑެތި ވިޔަފާރިތައް ދުށީ ފާގަތި ދުވަސްތަކެވެ. ރައީސް މުޢިއްޒު އެވެ! މަނިކުފާނުގެ ވެރިކަމަށް އެއް އަހަރަށް ވުރެ ގިނަ ދުވަސް ވެގެން ދިޔައިރު، ވިޔަފާރިތަކަށް ވެފައިވާ ގޮތް ދުށީމު ހެއްޔެވެ؟ ފިހާރަތަކަށާއި، ބާޒާރުތަކުގައި ހުރި މުދާ ކޮޅު ހުސްވަނީ ވިކިގެނެއް ނޫނެވެ. ހަލާކުވެގެންނެވެ. ވިޔަފާރިތައް އިންތިހާ އަށް ދަށްވެއްޖެ އެވެ. ކުދި ވިޔަފާރިތައް އެދަނީ ފުނޑެމުންނެވެ. އެކަމުގެ ކަންބޮޑުވުން ވިޔަފާރިވެރިން އެ ދަނީ އިންތިހާ އަށް ފާޅު ކުރަމުންނެވެ.

ހަހުރަވެތި ރައީސް މުޢިއްޒު އެވެ! އެއް އަހަރު ދުވަހުގެ ތެރޭގައި ކުދި އަދި ބޮޑެތި ވިޔަފާރިތައް ފުނޑެން ފަށައި، ފުނޑިއްޖެ އެވެ! ބަނގުރޫޓުވެއްޖެ އެވެ! އިޤްތިޞާދު އިނދަ ޖެހިއްޖެ އެވެ! އަޅުގަނޑުމެންނަށްޓަކައި މަނިކުފާނު އިސްތިއުފާ ދެއްވާށެވެ! އާދޭހެވެ!

ރައީސް މުޢިއްޒު އެވެ! މި ޤައުމަކީ ބޭސްފަރުވާގެ ނިޒާމަށް ސަލާން ޖަހަން ޖެހޭ ޤައުމެއް ނޫންކަން މަނިކުފާނަށް ވެސް އިނގިލައްވާނެ ނޫންތޯ އެވެ! މަނިކުފާނު ވެރިކަމާ ހަވާލުވީއިރު ވެސް، އާދައިގެ ބަލިތަކަށް ބޭނުންވާ ބޭސްކޮޅު ރަށް ރަށުގައި ހުންނަ ފާމަސީތަކުން ލިބެން ހުއްޓެވެ. ހަކުރު ބޭހާއި، ތައިރޮޑު ބޭހާއި، ދެން ވެސް ހުރި އެކި ކަހަލަ ބޭސްތަކެވެ. ނަމަވެސް، މަނިކުފާނުގެ ވެރިކަމަށް އެއް އަހަރުވީއިރު، ރަށް ރަށުން ލިބެމުން އައި ބޭސްކޮޅު މިހާރު ނުލިބެ އެވެ. ކުރިން ރަށު ފާމަސީން އާސަންދައިގެ ދަށުން ލިބޭ ބޭސްކޮޅު، މިހާރު ޖެހެނީ ބޮޑު އަގުގައި ގަންނާށެވެ. ކުރިން ރަށު ފާމަސީން ލިބެން ހުރި ހަކުރު ބޭހާއި، ތައިރޮޑު ބޭސް ހޯދަން ޖެހެނީ މިހާރު މުޅި މާލޭގައި އަތްފުނާ އަޅައިގެންނެވެ. މާލެ އިން ލިބުން ތަދު ތަނުގައި، އަވަށްޓެރި ޤައުމުތަކުން ވެސް ގަނެގެން ގެންނަން ޖެހިއްޖެ އެވެ! މި އެއް އަހަރު ތެރޭގައި ރައްޔިތުންގެ ބޭސްފަރުވާ އަށް އޮތް އެންސްޕާ ކުންފުނި މެދުވެރިކޮށް ކުރެވުނު ހަމައެކަނި ކަމަކީ، ކޮރަޕްޝަން ހިންގާލައިގެން ޓީވީ ޗެނަލެއް ހެދުން ނޫން ދެ ވަނަ ދެން ކޮން ކަމެއް ހެއްޔެވެ؟

ހިތްތިރި، ހިތްހެޔޮ ރައީސް މުޢިއްޒު އެވެ! އެއް އަހަރު ދުވަހުގެ ތެރޭގައި އާސަންދަ ނިޒާމު ގަޑުބަޑުކޮށްލައި، އެންސްޕާ އިން ބަލި މީހުންގެ ބައްޔަށް ފަރުވާ ކުރަން އެހީ ނުލިބި، ފަރުވާގެ އެހީ ލިބުނީ ބޮޑު ޓީވީ ޗެނަލަކަށެެވެ. އަޅުގަނޑުމެންނަށްޓަކައި މަނިކުފާނު އިސްތިއުފާ ދެއްވާށެވެ! އާދޭހެވެ!

ރައްޔިތުންގެ ފަޅީގައި ހުންނެވި ރައީސް މުޢިއްޒު އެވެ. އަޅުގަނޑުމެންނަށްޓަކައި މަނިކުފާނު އިސްތިއުފާ ދެއްވާށެވެ. "ވީއާރ ވެރީ ސޭޑް" އެވެ. މަނިކުފާނާމެދު އެއްވެސް އުންމީދެއް ނެތެވެ. މި ނޯޓު ކޮޅު ރަނގަޅަށް ކިޔާލައްޗެވެ. އަދި އަޅުގަނޑުމެން މި އެދޭ ކަންތައް ފުރިހަމަ ކޮށްދެއްވުމަށް ވަރަށް އިޙުތިރާމާ އެކު އެދެމެވެ.