ވެރިކަމަށް ހޮވުމާއެކު ޑރ މުޙައްމަދު މުއިއްޒު ވިދާޅުވަމުން ގެންދެވީ ކެބިނެޓަށް ގެންނަވާނީ ތައުލީމީ ޤާބިލް މީހުން ކަމަށެވެ. ތެދެކެވެ. ނަމުގެ ކުރިއަށް ޑރ. ހުރި ބޭފުޅުން އެ ކެބިނެޓުގައި ވަރަށް ގިނަ އެވެ. ކެބިނެޓްގައި ހިމެނިވަޑައިގަންނަވާ އެކި އެކި ބޭބޭފުޅުންގެ ނަމުގެ ކުރިއަށް ޑރ އައި ނަމަވެސް އެބޭބޭފުޅުންގެ ފެންވަރާމެދު ރައްޔިތުންދަނީ ސުވާލު އުފައްދަމުންނެވެ.

ހެލްތް މިނިސްޓަރު ކަމުގައި ހުންނަވަނިކޮށް ފޮރިން މިނިސްޓަރު ކަމަށް ބަދަލު ކުރެއްވި ޑރ. އަބްދުﷲ ޚަލީލު މަގާމާ ހަވާލުވެވަޑައިގަތުމަށް ފަހު އަވައްޓެރި އިންޑިއާށް ކުރެއްވި ފުރަތަމަ ރަސް،މީ ދަތުރުފުޅު ނިމިއްޖެއެވެ. އިންޑިއާ އަކީ ޒަމާނުއްސުރެ ރާއްޖެއާ އެންމެ އަވައްޓެރި އެންމެ އެކުވެރި އެންމެ އެހީތެރި ގައުމު ނަމަވެސް އިންޑިއާ ވެގެން ގޮސްފައިވަނީ ޚާރިޖީ ވަޒީރު ޚަލީލުގެ އަދާވާތްތެރިއަކަށެވެ. މިހެން ނުބުނެވެންވީ ސަބަބެއް ނެތެވެ. ޚަލީލަކީ އޮޕޮޒިޝަންގައި ހުންނަވައިގެން އިންޑިއާ އައުޓް ކެމްޕެއިންގައި އެންމެ އިސްކޮށް ހަރަކާތްތެރިވި އެކަކެވެ. އަތޮޅުތެރޭގައި އިންޑިއާ އާ ދެކޮޅު ހަރަކާތްތައް ހިންގެވުމުގައި އަރުވައި ޖަހައިގެން އުޅުނު އެކަކެވެ. އެހާވަރަކުން އަދި ނުނިމެއެވެ. އިންޑިއާ ދެކޮޅަށް އެކްސްގައި އެކި އެކި ޕޯސްޓް ކުރެއްވުމުގައި ވެސް ޚަލީލު ހުންނެވީ އެހެން މީހުންނަށްވުރެ މާ ކުރީގައެވެ. އިންޑިއާ އަށް ބަރޯސާވުން ނިމުމަކަށް ގެންނަން ޖެހޭ ކަމަށާއި، ދިވެހި ސަރުކާރުން އިންޑިއާ ބުނާ ހުރިހާ ގޮތަކަށް އަމަލު ކުރުން ހުއްޓާލުމަށް ގޮވާލަމުން ދިއައެވެ. އިންޑިއާގެ ބޮޑު ވަޒީރު ނަރެންދްރަ މޯދީ ރާއްޖެއަށް ބަޣާވާތެއް ގެންނަން އުޅޭ ކަމަށް ވިދާޅުވެ، ހުތުރު ބަހުން ޕޯސްޓްތައް ކުރައްވަމުން ގެންދެވިއެވެ.

ކޮންމެ އަކަސް ޚަލީލުގެ މި ދަތުރުފުޅުގައި އިންޑިއާގެ ނޫހަކުން ޚަލީލު އާ އިންޓަރވިއު އެއް ކޮށްފިއެވެ. އިންޑިއާ އާ ރާއްޖޭގެ ގުޅުމާ ގުޅޭ ގޮތުންނެވެ. ޚަލީލު ވާހަކަފުޅު ދެއްކެވީ ޚަލީލުގެ އަމަލާ ދިމާ އިދިކޮޅަށެވެ. އިންޑިއާ އައުޓް ކަނޑުއްވާލެއްވީ ކުރީގެ ރައީސް ޔާމީންގެ ބޮލަށެވެ. ވިދާޅުވީ އެއީ ޔާމީން ކުރެއްވި ކަމެއް ކަމަށެވެ. ޔާމިން އަކާ މިހާރު ގުޅުމެއް ނެތެވެ. ޔާމީން އާ މިހާރު ރުޅިއެވެ. ވަކިވެއްޖައީމެވެ. ބެހޭ ވެސް ކަމަކަށް ނުހެއްދެވިއެވެ. ދެން ފެއްޓެވީ އިންޑިއާއި ރާއްޖޭގެ ގާތްކަމުގެ ވާހަކައެވެ. ގުޅުމުގެ ވާހަކަ އެވެ. އިންޑިއާ އަށް ޝުކުރު އަދާކުރައްވަން ފެއްޓެވީ ދުވަހަކު ދިވެއްސަކު އިންޑިއާ އަށް ތައުރީފް ކުރާނެ އެންމެ މަތީ ފެންވަރަށެވެ. އިންޑިއާއިން ފައިސާ ދޭ ވާހަކައެވެ. އެހީ ދޭ ވާހަކައެވެ. ލޯނު ދޭ ވާހަކަ އާއި ލޯނު ފަސްކޮށްދޭ ވާހަކަ އެވެ. ބޮޑު ކޮންމެ ކަމެއް ދިމާވާ ވަގުތު ރާއްޖެ އަށް އެހީވާން އިންޑިއާ އޮންނަ ވާހަކަ އެވެ. އިންޑިއާގެ އެހީގައި ހަނިމާދޫ އެއަރޕޯޓާ އައްޑޫ ގަން އެއަރޕޯޓާއި ކޯސްޓްގާޑް ބިލްޑިންގ ހަދަމުންދާ ވާހަކަ އެވެ. ފަތުރުވެރިކަމުގައި ވެސް އިންޑިއާ އެއްވަނަ އަށް އޮންނަ މަންޒަރު ދެކެން ބޭނުންވާ ވާހަކަ އެވެ. މޯދީ ރާއްޖެއަށް ވަޑައިގަތުމުގެ އިންތިޒާރުގައި ދިވެހިން ތިބި ކަމަށްވެސް ވިދާޅުވިއެވެ. މިއީ އިންޑިއާ އަށް ބަރޯސާވުން ނިމުމަކަށް ގެންނަންޖެހޭ ކަމަށް ވިދާޅުވެ އެތައް އަނގައެއް ތެޅުއްވި ޚަލީލުގެ މިހާރުގެ ބަސްމަގެވެ. މިހާ ހިސާބުން އުފެދުނު ސުވާލަކީ ޚަލީލު މިއަދު މި ދައްކަވާ ވަހަކަ އަކީ ކާކު ބުނެގެން ކާކު ޚަލީލު ލައްވާ ގަދަކުން ދައްކަވާ ވާހަކައެއް ބާވައެވެ. މާދަމާ އަނެއްކާ އޮޔާ ވައި ބަދަލު ވާއިރު މިދެއްކެވި ވާހަކަ ކަނޑާލާނީ ކާކުގެ ބޮލަށް ބާވައެވެ.

ޚަލީލަކީ ރާއްޖޭގެ އެންމެ އިސް ޑިޕްލޮމެޓެވެ. އަޅުގަނޑު ޑިޕްލޮމެސީއެއް ނުދަންނަމެވެ. ޑިޕްލޮމެޓިކް ލެންގުއޭޖެއް ވެސް ނުދަންނަމެވެ. އެކަމަކު އަޅުގަނޑު ކަހަލަ އާދައިގެ މީހަކަށް ވެސް އެނގޭ އެއްޗަކީ ރާއްޖޭގެ އެންމެ މަތީ ޑިޕްލޮމެޓަށް ޑިޕްލޮމެސީ އެގެން ވާނެ ކަމަވެ. ޑިޕޮލޮމެޓިކް ބަހުރުވަ ވެސް ދަންނަން ވާނެ ކަމެވެ. އިއްޔެ މެންދުރާ ހަމައަށް އިންޑިއާ އަށާއި އަރަބި ދުނިޔެ އަށް ހިތު ހުރިހާ އެއްޗެއް ގޮވާ ކުރު ދޮށިން ދިނުމަށްފަހު، މިއަދު ޚަރިޖީ ވަޒީރުގެ ތޮފި އަޅުއްވައިގެން އެ ގައުމުތަކަށް ވަޑައިގެން އިއްޔެ ދެއްކެވި ވާހަކަ އާއި ދިމާ އިދިކޮޅަށް ވާހަކަ ދެއްކުމަކީ ޑިޕްލޮމަސީއެއް ނޫން ކަމެވެ. އެއީ އެންމެ އާދައިގެ ބަހުރުވައިން ބުނާ ނަމަ ލަދެއް ހަޔާތެއް ނެތި ތިމާވަރެއް ނެތިގެން އުޅޭ އުޅުމެކެވެ.

ދެން އޮތީ ޚަލީލުގެ އިނގިރޭސީ ބަހުގެ ފެންވަރުގެ ވާހަކަ އެވެ. އަޅުގަނޑަކީ އިނގިރޭސި ދަންނަ މީހެއް ނޫނެވެ. ތައުލީމީ ފާހެއް އޮތް މީހެއް ވެސް ނޫނެވެ. އެކަމަކު އަޅުގަނޑަށް ވެސް ޚަލީލު އިނގިރޭސި ބަހުން އިންޓަރވިއު ދެއްވަމުން ގެންދެވީ ރަނގަޅަށް ނޫންކަން އެގޭހާ އިންޓަރވިއުގެ ފެންވަރު ދަށެވެ. ރާއްޖެއަކީ ތައުލީމީ ޖީލެއް އޮތް ގައުމެކެވެ. ޚާއްސަކޮށް އަދުގެ ތުއްތު ކުދިންނާ ސްކޫލްތަކުގައި ކިޔަވަމުންދާ ދަރިވަރުންނަކީ އިނގިރޭސީއަށް ފަރިތަ މޮޅު ބައެކެވެ. ޚަލީލު އިނގިރޭސި ބަހުން ދެއްވި އިންޓަރވިއު އަޑު އެހި ކުޑަކުދިންވެސް ބުނަނީ އެ ބޭބެ ވާހަކަ އެ ދައްކަނީ ނުބައިކޮށް ކަމަށެވެ. އިންޓަރވިއުގެ ކޮންމެ ޖުމްލައަކަށް ވަކި ވަކިން ބެލުމުގެ މާނައައެއް ނެތެވެ. ޑިޕްލޮމަސީގެ އެންމެ މުހިންމު ކަމަކީ ސާފުކޮށް ރީތިކޮށް މޮޅަށް ވާޙަކަ ދެއްކުން ނޫން ދެން ކޮންއެއްޗެއްތޯއެވެ. ރާއްޖޭގެ ޓޮޕް ޑިޕްލޮމެޓްގެ މަގާމަށް ރައީސުލް ޖުމްހޫރިއްޔާ ބޭނުން ކޮށްމެ މީހަކު އިސްކުރެވިދާނެ އެވެ. އެކަމަކު އެއީ ޓޮޕް ޑިޕްލޮމެޓް މެޓީރިއަލް ކަން ނުވަތަ ނޫންކަން ކޮންމެ މީހަކަށްވެސް ދެނެގަނެވިދާނެއެވެ. ޚަލީލު އާ އިންޓަވިއު ކުރަން އިން ޕްރެޒެންޓަރު ވެސް ހީވަނީ މަލާމާތް ކުރާހެންނެވެ. "ހޫމް، ހޫމް" ކިޔުން ނޫން ކަމެއް އޭނާ ވެސް ނުކުރެއެވެ.

ޑރ އަބްދުﷲ ޚަލީލު ކޮންމެ ގޮތަކަށް ވާހަކަ ދެއްކެވިއަސް މައްސަލައެއް ނެތެވެ. އިނގިރޭސީ އެނގިވަޑައިގަތަސް ނުގަތަސް މައްސަލައެއް ނެތެވެ. ޚަލީލަށް ޑިޕްލޮމަސީ އެނގިވަޑައިގަތަސް ނުގަތަސް ފަރުވާލެއް ނެތެވެ. އެކަމަކު ދިވެހި ޚާރިޖީ ވަޒީރު ގެ ތާކިހަލުގައި އޭނާ ދެއްވި އިންޓަރވިއު އެއްގެ ފެންވަރު މިހާ ދައްވުމަކީ މައްސަލައެކެވެ. ދިވެހިރާއްޖޭގެ ޚާރިޖީ ވަޒީރު ޑރ އަބްދުﷲ ޚަލީލަށް ޑިޕްލޮމެޓިކް ލެންގުއޭޖް އެނގިވަޑައިނުގަތުމަކީ އަދި މާބޮޑު މައްސަލައެކެވެ. މައްސަލައަކަށް ވަނީ އަޅުގަނޑަކީ ވެސް ދިވެއްސަކަށް ވާތީއެވެ. ދިވެހިރާއްޖެ އެއީ އަޅުގަނޑުގެ ވެސް ގައުމަށް ވާތީއެވެ. ޚަލީލު ތަމްސީލު ކުރައްވަނީ ދިވެހިރާއްޖެ ކަމަށް ވާތީއެވެ. ދިވެހި ރާއްޖެއަށް ބަޔަކު މަލާމާތް ކުރިއަސް އެއްޗެހި ގޮވިޔަސް ބަދުނާމު ކުރިއަސް އެ ހުތުރު، ކޮންމެ ދިވެއްސެކޭ އެއްގޮތަށް އަޅުގަނޑަށް ވެސް ރައްދުވާތީއެވެ.

ގަބޫލުފުޅު ކުރައްވާށެވެ. ޚާރިޖީ ވަޒީރު ކަމުގެ މަގާމަށް ޚަލީލު ކުފޫ ހަމަ ނުވާކަން ސާބިތުކޮށް ތިޔަ ދެއްވީ އަމިއްލަ ފުޅަށެވެ.