މޫސުމީ ގޮތުން ކުޅުދުއްފުއްޓަށް ޒިޔާރާތް ކުރާ ގުޑުގުޑާ ދޫންޏަށް ބައެއް ފަރާތްތަކުން ގޯނާ ކުރަމުން ގެންދާ ކަމަށް ކުޅުދުއްފުށީ ސިޓީ ކައުންސިލުން ބުނެފިއެވެ.
އެ ކައުންސިލުން ބުނީ މި ގޮތައް ބައެއް ފަރާތްތަކުން ގޯނާ ކުރާތީ ދޫނި ކުޅީގައި ތިބޭ ވަގުތުތަކުގައި ކެނޯ ދުއްވުން ކައުންސިލުން މަނާ ކޮށްފައިވާ ކަމަށެވެ.
ކައުންސިލުން ބުނީ ކުޅުދުއްފުށީ ކުޅިއަށް އިރުވައި މޫސުމުގައި ޒިޔާރާތްކުރާ ގުޑުގުޑާ ދޫނިތަކާއި ބައެއް ފަރާތްތަކުން މާ ކައިރިއަށް ދިއުމާއި، ދޫނިތަކަށް ގޯނާވާގޮތަށް ކުޅީގައި ކެނޯ ދުއްވާކަމުގެ ޝަކުވާ ގިނަ ރައްޔިތުންގެ ފަރާތުން އެ އިދާރާ އަށް ހުށަހަޅަމުން އަންނަ ކަމަށެވެ.
ކުޅީގައި ކެނޯ ދުއްވާ ނަމަ ނުވަތަ ދޫނިތަކަށް އުނދަގޫވާ ފަދަ އަމަލުތައް ކުރާނަމަ 7328831 ނަންބަރަށް ގުޅާ ރިޕޯޓު ކުރުމަށް ވެސް ކައުންސިލުން ވަނީ އެދިފައެވެ.
ކުޅުދުއްފުށީ ސިޓީ ކައުންސިލުން ހާމަ ކޮށްފައިވާ ގޮތުގައި 2021 ވަނަ އަހަރުން ފެށިގެން ކޮންމެ އަހަރެއްގެ އިރުވާ މޫސުމުގައި ގުޑުގުޑާ ދޫނި އެރަށު ކުޅިއަށް ޒިޔާރާތް ކުރާ ކަމަށެވެ.
"ގުޑުގުޑާ ދޫނިތަކުން އަންނަނީ ރަށަށް އުފާވެރިކަމާއި އިތުރު ދިރުމެއް ގެނެސް ދެމުން،" ކަމަށް ކައުންސިލުން ބުނެއެވެ.
މި ފަދަ މޫސުމީ ދޫނި ރަށުގައި މަޑުކޮށްގެން ތިބުމަށް އެސޮރުމެންނަށް އަމާން ފަސޭހަ މާހައުލެއް ހޯދައިދިނުމަކީ އެންމެންގެ ޒިންމާއެއް ކަމަށް ކައުންސިލުން ދެކެއެވެ.
