އިންޑިއާ އާ ދެކޮޅަށް ރާއްޖޭގައި ހިންގި "އިންޑިއާ އައުޓް" ހަރަކާތަކީ ރައީސް ޔާމީން ހިންގެވި ހަރަކާތެއް ކަމަށާއި، ރައީސް މުއިއްޒުގެ ސަރުކާރުން އެ ހަރަކާތާ މުޅިން ވަކިވެ ދުރައްޖެހިފައިވާ ކަމަށް ރާއްޖޭގެ ފޮރިން މިނިސްޓަރ އަބްދުﷲ ޚަލީލު ވިދާޅުވެއްޖެއެވެ.
އިންޑިއާ އަށް ކުރައްވަމުން ގެންދަވާ ރަސްމީ ދަތުރުފުޅުގައި އިންޑިއާގެ މީޑިއާ އެއް ކަމަށްވާ ވިއޯން އަށް ދެއްވި ބަސްދީގަތުމެއްގައި ޚަލީލު ވިދާޅުވީ، "އިންޑިއާ އައުޓް" ހަރަކާތް އިސްކޮށް ހިންގެވީ ކުރީގެ ރައީސް ޔާމީން ކަމަށާއި، އެމަނިކުފާނާއި މިހާރުގެ ސަރުކާރާ އެއްވެސް ގުޅުމެއް ނެތް ކަމަށެވެ.
"އެމަނިކުފާނުގެ އަމިއްލަ ޕާޓީއެއް އޮވޭ، އަދިވެސް އެ ޕާޓީގައި ހުންނެވީ. އަޅުގަނޑުމެން ވަނީ އެކަމުން ދުރަށް ޖެހިފައި." "އިންޑިއާ އައުޓް" ހަރަކާތުގައި އަމަލީ ގޮތުން ބައިވެރިވެވަޑައިގެންނެވި ޚަލީލު ވިދާޅުވިއެވެ.
ޚަލީލު ވިދާޅުވީ ރައީސް މުއިއްޒު ގެންދަވަނީ އިންޑިއާ އާއި އިންޑިއާގެ ރައްޔިތުންނާއެކު ވަރުގަދަ ގުޅުމެއް ބިނާކުރައްވަމުން ކަމަށެވެ.
"އަޅުގަނޑުމެންގެ ރައީސް ވަނީ ގިނަ ފަހަރު މަތިން ސާފުކޮށް ވިދާޅުވެފައި އެމަނިކުފާނު އިންޑިއާ އާއި އިންޑިއާގެ ރައްޔިތުންނާ އެކު ވަރުގަދަ ގުޅުމެއް ބިނާކުރައްވަމުން ގެންދަވާ ކަމަށް."
ޑރ. މުއިއްޒުގެ ފޮޓޯފުޅަށް ވުރެ ބޮޑުކޮށް ރައީސް ޔާމީންގެ ފޮޓޯފުޅު ބޭނުންކޮށް، އަދި ރައީސް ޔާމީން އަށް ޚާއްސަ ހުސް ގޮނޑިކޮޅެއް ކެމްޕޭން ޖަލްސާތަކުގައި ބަހައްޓައިގެން، ކުރިއަށް ގެންދިޔަ ޑރ. މުއިއްޒުގެ ރިޔާސީ ކެމްޕޭންގައި އިސްކޮށް އުޅުއްވި ފަރާތްތަކުގެ ތެރޭގައި ހިމެނޭ ޚަލީލު ވިދާޅުވީ، ކުރީގެ ރައީސް ޔާމީން އާ މިހާރު ރައީސް މުއިއްޒުގެ ސަރުކާރާ އެއްވެސް ގުޅުމެއް ނެތް ކަމަށާއި މިހާރު އެމަނިކުފާނު ވަނީ މުޅިން ސަރުކާރުން ބޭރުވެފައި ކަމުގައެވެ.
"ކުރީގެ ރައީސްއާ އެކުގައި އޮތް އަޅުގަނޑުމެންގެ ގުޅުން ވަނީ މުޅިން ތަފާތުވެފައި. އެމަނިކުފާނު ވަނީ މުޅިން ބޭރުވެ، މިވަގުތު ގެންދަވަނީ އަޅުގަނޑުމެންނާ ދެކޮޅަށް މަސައްކަތް ކުރައްވަމުން." ޚަލީލު ވިދާޅުވިއެވެ.
"މިހާރު ގެންދަވަނީ އިދިކޮޅު ފަރާތްތަކާއެކު އަޅުގަނޑުމެންނާ ދެކޮޅަށް މަސައްކަތް ކުރައްވަމުން. އެހެންކަމުން، މިވަގުތު އަޅުގަނޑު ޤަބޫލުކުރާ ގޮތުގައި، އަޅުގަނޑުމެން މި ވަގުތު ވަރަށް ގާތް އަދި ވަރުގަދަ ގުޅުމެއް އެކުވެރިކަމާއި އިތުބާރުގެ މައްޗަށް ބިނާކޮށް އަދި ތާރީޚީ ހެކިތަކުގެ މައްޗަށް ބިނާކޮށް ބާއްވަމުން ގެންދާތީ، މިފަދަ ގުޅުމަށް ހުރަސްއެޅޭނެ ޖާގައެއް ނޯންނާނެ، އަދި އެފަދަ ކަމެއް ނުވެސް ވާނެ." ޚަލީލު ވިދާޅުވިއެވެ.
