ސިޔާސީ މުވައްޒަފުންގެ އަދަދު ނޭނގޭކަމަށް ފިނޭންސް މިނިސްޓްރީން ބުނަނީ ކެމްޕޭނުގައި ބުނި އަދަށްވުރެ ސިޔާސީ މުވައްޒފުންގެ އަދަދު ގިނަކަމުން ހާމަކުރަން ބޭނުން ނުވާތީ ކަމަށް ކުރީގެ ފިނޭންސް މިނިސްޓަރު އިބްރާހިމް އަމީރު ވިދާޅުވެއްޖެއެވެ.

ސިޔާސީ މުވައްޒަފުންގެ އަދަދުގެ ރެކޯޑެއް ނުގެންގުޅެން: ފިނޭންސް މިނިސްޓްރީން ނުގެންގުޅޭކަމަށް އެ މިނިސްޓްރީން ބުނެފައިވާތީ އެކަމާއި ގުޅިގެން ރާއްޖެޓީވީގެ ފަލަސުރުހީ ޕްރޮގްރާމުގައި ކުރި ސުވާލަށް ޖަވާބުދެއްވަމުން އަމީރު ވިދާޅުވީ ސަރުކާރުގެ ސިޔާސީ މުވައްޒަފުންގެ އަދަދު ފިނޭންސް މިނިސްޓްރީއަށް އެނގޭނެ ކަމަށެވެ. އަމީރު ވިދާޅުވީ ފެނިގެންދަނީ މައުލޫމާތުދޭން އެދުނަސް އެ މައުލޫމާތު ނުދީ ހިފަހައްޓާތަން ކަމަށާއި، މައުލޫމާތު ހާމަކުރާނެކަމަށް މި ސަރުކާރުން ބުނި ވާހަކައާއި ހިލާފުވެ ބަސްމަގާއި ހިލާފުވެފައިވާ ކަމަށެވެ.

އަމީރު ވިދާޅުވީ 2025 ވަނަ އަހަރަށް ބަޖެޓު ހުށަހެޅިއިރު ވެސް ބަޖެޓުގައި ވެސް ސިޔާސީ މުވައްޒަފުންގެ އަދަދު އޮންނަން ޖެހޭނެ ކަމަށާއި، މީގެ ކުރިން ބަޖެޓު ހުށަހެޅިގެން އަންނައިރު އޭގައި ސިޔާސީ މުވައްޒަފުންގެ އަދަދު ބަޖެޓު ފޮތުން ވެސް ފެންނަން އޮންނާނެ ކަމަށެވެ.

އަމީރު ވިދާޅުވީ އެމްޑީޕީގެ ސަރުކާރުގައި 700 ސިޔާސީ މަގާމުތަކުގައި މުވައްޒަފުން މަސައްކަތް ކުރި ވެސް އެ މައުލޫމާތުތައް ފިނޭންސް މިނިސްޓްރީއަށް އެނގޭނެ ކަމަށެވެ. އަދި މި ސަރުކާރުން 700ށް ވުރެ ސިޔާސީ މަގާމް އިތުރު ނުވާނަކަމަށް ވިދާޅުވެ ވެރިކަމަށް އައިސް މިހާތަނަށް 2000ށް ވުރެ ގިނަ ސިޔާސީ މުވައްޒަފުން ނަގާފައިވާ ކަމަށް އަމީރު ވިދާޅުވިއެވެ.

ކުރީގެ ފިނޭންސް މިނިސްޓަރު މުހައްމަދު ޝަފީގު ވެސް ވަނީ މީގެ ކުރިން ސިޔާސީ މުވައްޒަފުންގެ މައުލޫމާތު ފިނޭންސް މިނިސްޓްރީގައި ހުންނާނެކަމަށް ވިދާޅުވެފައެވެ. އަދި އެ މައުލޫމާތު ހޯދުމަށް މިހާރު ނޫހުން އެދުމުން، ފިނޭންސް މިނިސްޓްރީން ދީފައިވާ ޖަވާބަކީ ސިޔާސީ މަގާމުތަކަށް އައްޔަންކުރާ މުވައްޒަފުންގެ އަދަދާއި އެ މުވައްޒަފުންގެ ވަނަވަރާއި އަދި މުވައްޒަފުންނާ ގުޅޭ އެއްވެސް މައުލޫމާތެއް އެ މިނިސްޓްރީން ރެކޯޑްކޮށް، ބަލަހައްޓަމުން ނުދާ ކަމަށެވެ. ވަކިވަކި މިނިސްޓްރީތަކުގައި އަދި އިދާރާތަކުގައި ތިބި ސިޔާސީ މުވައްޒަފުންގެ މުސާރައިގެ ކަންކަމަކީ އެ މިނިސްޓްރީއަކުން ނުވަތަ އިދާރާއަކުން ބަލަހައްޓާ ކަންކަން ކަމަށެވެ.