ރައީސުލްޖުމްހޫރިއްޔާ ޑޮކްޓަރު މުޙައްމަދު މުޢިއްޒު ދައްކަވާ ވާހަކަ އާއި، އެމަނިކުފާނު ކުރައްވާ ކަންކަން ދެކޮޅު ނުޖެހޭ ވާހަކަ އަކީ އައު ވާހަކައެއް ނޫނެވެ. އެއީ، އިއްޔެއަކު ނުވަތަ މިއަދަކު ދެކެވޭ ވާހަކައެއް ނޫނެވެ. އެއީ މީގެ އެތައް އަހަރެެއް ކުރިން ވެސް ދެކެވޭ ވާހަކަ އެކެވެ. އަނެއްހެން ބުނާނަމަ، ދިވެހިންނަަށް އައު ވާހަކައެއް ނޫނެވެ. އެއަށް ވުރެ ވެސް ތިލަކޮށް ބުނާނަމަ، އެއީ އެންމެނަށް ވެސް އިނގޭ ބޮޑު ސިއްރު ކަހަލަ ކަމެކެވެ.

އެހެންވިޔަސް، މިއަދާ ހަމައިން ފަށަން ގަސްތު ކުރާނަމެވެ. ބުދަ ދުވަހު ފެށުނު މީލާދީ އައު އަހަރުގެ ތަހުނިޔާ ފޮނުއްވުމަށް ރައީސް މުޢިއްޒު ވަރުގަދަ ޚިތާބެއް ދެއްވައިފި އެވެ. އަޅުގަނޑުމެންގެ މުއްސަނދި ދިވެހި ބަހުގެ މާނަ ފުން ލަފުޒުތަކާއި، ފަށުވި އިބާރާތްތައް ބޭނުން ކުރައްވައިގެން ދެއްވި އެ ޚިތާބު ލިޔެފައި އޮތީ ވެސް ވަރަށް މޮޅަށެވެ. އެކަމާ މައްސަލައެއް ޖައްސާކަށް ނޫނެވެ. އެހެން ނަމަވެސް، ރައީސް މުޢިއްޒު އެ ދައްކަވާ ވާހަކަތައް ދެކޮޅު ޖައްސާނެ ގޮތެއް އަޅުގަނޑަކަށް ނުވިސްނުނެވެ.

ރައީސް މުޢިއްޒު ވިދާލުވީ އައު އަހަރު ފެށިީ ތަރައްޤީގެ ތަސައްވަރުތަކާއި، ދިވެހި އިސްލާމީ އަޚުވަންތަކަމާ އެކު ކަމަށެވެ. ރައީސެވެ. އައު އަހަރުގެ ފެށުން ދިޔައީ ކިހިނެއްތޯ އެވެ؟ މީގެ ކުރިން އައު އަހަރު ފާހަގަ ކުރަން ބާއްވާ މިއުޒިކް ޝޯތަކަށް އިންތިހާ އަށް ފާޑު ވިދާޅުވީ މަނިކުފާނުމެން ނޫން ހެއްޔެވެ؟ އެކަންކަމާ ދެކޮޅަށް ވަކާލާތު ކުރެއްވި ބޭފުޅުން މިއަދު އެ ތިއްބެވީ ސަރުކާރުގެ މަތީ ފަޑީގައި ނޫންތޯ އެވެ؟ އެހެން ނަމަވެސް، މިއަހަރު ވެސް އައު އަހަރު ފާހަގަ ކުރަން، ހަވާ އެރުވުމާއި، މިއުޒިކް ޝޯ ވެސް ބާއްވައިފި ނޫންތޯ އެވެ؟ އާދޭހެވެ! ކުރިން ނުފެންނަ އެެހެން މަންޒަރެއް ވެސް ފެނިއްޖެ އެވެ. ޝައިޠާނާގެ ސިފަ ދައްކަން ބޭނުން ކުރާ ދަޅު ނުވަތަ އިނގިރޭސި ބަހުން ބުނާ ނަމަ "ޑެވިލް" އޭ ރަމްޒުކޮށްދޭން ބޭނުން ކުރާ ދަޅު ބޭނުން ކުރި މަންޒަރު ވެސް ފެނުނެވެ.

ސޯޝަލް މީޑިއާ ގައި މީހަކު ލިޔެފައި އޮއްވާ ދުށީމެވެ. އެއީ ހިތާމަ ހުރި ކަމެއް ކަމަށެވެ. ލަދުވެތި ކަމެއް ކަމަށެވެ. ދިވެހި މި ފަސްގަނޑުން ފެނިގެން ނުވާނެ ފަދަ މަންޒަރެއް ކަމަށެވެ. އައު އަހަރު ފާހަގަ ކުރުމަށް ބޭއްވި ޙަރަކާތް ބެލުމަށް އެ ސަރަހައްދަށް ޒިޔާރަތް ކުރި މީހުންނަށް، މި ބުނާ ދަޅު ބެހީ އެ ޙަރަކާތް އިންތިޒާމު ކުރި މީހުން ކަމަށް ބުނެ އުޅެ އެވެ. މި ހުންނަނީ ދެރަވަރުގެ ކަންކަމެވެ.

ދެން ރައީސް މުޢިއްޒު ވިދާޅުވީ ދިވެހި ދައުލަތަކީ ކަނޑައެޅިފައިވާާ ވަކި އަމާޒުތަކަކަށް ދަތުރުކުރާ ދައުލަތެއް ކަމަށެވެ. އަދި އެއީ ރާއްޖޭގެ އަމިއްލަ މިނިވަންކަމުގެ އިތުރުން، ދިވެހި ޤައުމިއްޔަތު ދިފާއުކޮށް، ކަށަވަރު ކުރުމުގެ އަމާޒު ކަމަށް ވެސް ރައީސް ވިދާޅުވި އެވެ. ނުހޭން ހުއްޓަަސް ހިނި އަންނަނީ އެވެ! ރައީސް މުޢިއްޒު އެވެ! ދިވެހި ދައުލަތް ދަތުރު ކުރަނީ ކަނޑައެޅިފައިވާ ކޮން އަމާޒަކަށް ތޯއެވެ؟ މިހާތަނަށް އައިއިރު، މަނިކުފާނު ނިންމެވި ކިތައް ނިންމުން ބަދަލު ކުރަށްވައިފީމު ތޯއެވެ؟ ލިސްޓުގެ ދިގު ކަމުން ދެތިން ކަމެއް އަޅުގަނޑު ފާހަގަކޮށްލާނަމެވެ!

ވެރިކަަމަށް ވަޑައިގަންނަވަން އެންމެ ގަދައަށް ދެއްކެވީ ބޭރުގެ އަސްކަރިއްޔާ ނުވަތަ އިންޑިއާ ސިފައިންގެ ވާހަކަ އެވެ. މި ޤައުމުން އިންޑިއާ ސިފައިން ބާލާނެ ވާހަކަ އެވެ. އެކަން ވީ ގޮތް ހަނދާން ނެތޭހާ ދުވަހެއް ނުވެ އެވެ! މި ޤައުމުގައި މިއަދު ވެސް އިންޑިއާގެ އަސްކަރީ މީހުން ޙަރަކާތްތެރިވެ އެވެ. މަދަނީންގެ ގޮތުގައި ޔުނީފޯމު އަޅައިގެން ތިބި ނަމަވެސް، އެއީ އިންޑިއާގެ އަސްކަރިއްޔާގެ މީހުން ނޫން ތޯއެވެ؟ އިންޑިއާ އިން ރާއްޖޭގެ އުތުރު ތިލަފަޅުގައި އެ ޤައުމުގެ އަސްކަރީ މަރުކަޒެއް ޤާއިމު ކުރަނީ ކަމަަށް ބުނެ، މަނިކުފާނުގެ އެކްޓިވިސްޓުން ލައްވާ ބޮޑު ޑްރާމާއެއް ވެސް ކުޅުއްވި ނޫންތޯ އެވެ! އެކަން ބަދަލު ކުރާނެ ކަމަށް ވިދާޅުވެ އެތަނުގައި ދަނޑުވެރިކަމުގެ މަސައްކަތެއް ކުރަން ކަމަށް ވިދާޅުވެ ޗައިނާ އަށް އެތަން ދެއްވީ ނޫންތޯ އެވެ؟ އޭގެ ފަހުން މަނިކުފާނު އިންޑިއާ އަށް ކުރެއްވި ދަތުރުފުޅުގައި އިންޑިއާ ސަރުކާރާ މަޝްވަރާ ކުރެއްވުމަށް ފަހު، އެކަން ވެސް އުނބަށް ޖެއްސެވީމު ނޫންތޯ އެވެ؟ އަނެއްކާ ޗައިނާ އަތުން އެތަން އަތުލައްވައި، އިންޑިއާ އަށް ދެއްވީމު ނޫންތޯ އެވެ؟ މިއަދު ވެސް އުތުރުތިލަފަޅު ތަރައްޤީ ކުރަނީ އިންޑިއާގެ އެހީތެރިކަމާ އެކު ނޫންތޯ އެވެ؟

އަޑަށް ބާރު ލައްވައި، ކަރުން ނާރު ހިލުވާލައްވަވައި، ޑޮލަރުގެ ޤަވާއިދު ބަދަލު ނުކުރާނެ ކަމަށް ވެސް ވިދާޅުވީމު ނޫން ތޯއެވެ؟ ޖެހޭނީ ބޮލަކަށް 500 ޑޮލަރު މާރު ކުރަން ކަމަށް ވިދާޅުވީމު ނޫން ތޯއެވެ؟ މަނިކުފާނު އެވެ! އާޚިރުގައި ކަންތައްވީ ކިހިނެއްތޯ އެވެ؟ އެންމެ ފަހުން ޤަވާއިދު ވެސް ބަދަލު ކުރެއްވީ ނޫން ހެއްޔެވެ! ބޮލަކަށް 500 ޑޮލަރު މާރު ކުރުން، ނުވަތަ ލިބޭ އާމްދަނީގެ ވިހި އިންސައްތަ މާރު ކުރަން ޖެހޭ ގޮތަށް ބަދަލު ގެންނެވި ނޫންތޯ އެވެ؟ ރައީސެވެ. ފަހަތަށް "ނުވަތަ" ޖައްސަވައިގެން ވިޔަސް، އެ ވާނީ ހަމަ ބަދަލު ކުރުން ނޫން ދެން ކޮން ކަމަކަށް ތޯއެވެ؟

ރައީސް ވިދާޅުވީ އެ އަމާޒަކީ ދިވެހި ކޮންމެ ރައްޔިތަކަށް ބޯހިޔާވަހިކަން ކަށަވަރު ކުރުމުގެ އަމާޒު ކަމަށެވެ. އަދި ބޭސްފަރުވާ އާއި އަސާސީ ޚިދުމަތްތައް ޒަމާނީ ފެންވަރަށް ތަރައްޤީ ކުރުމާއި، ރާއްޖޭގެ އެކި ކަންކޮޅު ތަކަކަށް ގެނެވޭ އުމުރާނީ ތަރައްޤީގެ އަމާޒު ކަމަށެވެ. މާތް ކަލާކޯ އެވެ! ރައީސެވެ1 ރައީސް މުޢިއްޒު އެވެ! ބޯހިޔާވަހިކަން ކަށަވަރު ކުރާ ވާހަކަ ދައްކަވާއިރު، ކުރީ ސަރުކާރުން ގޯއްޗާއި ފުލެޓު ދީފައިވާ އެތައް ހާސް ރައްޔިތުންތަކެއްގެ ޙައްޤުގައި މަނިކުފާނު ތިޔަ ހުންނަވަނީ އަތް އަޅުއްްވައިގެން ނޫން ހެއްޔެވެ؟ ޤާނޫނީ ގޮތުން ބާރު ލިބިފައިވާ ލިޔުންތަކެއްގައި އޮބި އަޅުއްވައިގެން ތިޔަ ހުންނަވަނީ ކޮން އަމާޒެއްގައި ހެއްޔެވެ؟

ދެން ބޭސްފަރުވާގެ އަމާޒުގެ ވާހަކަ އެވެ. ރައީސެވެ. ބޭސްފަރުވާގެ އަމާޒުގެ ވާހަކަ ދައްކަވާނީ ކިހިނެއް ހެއްޔެވެ؟ ކުރިން އަތޮޅު ތެރޭގެ ރަށްތަކުގައި ހުންނަ ފާމަސީން ލިބެން ހުރި ކަރު ބޭސްފުޅި ވެސް މިހާރު ގެންނަން ޖެހެނީ މާލެ އިންނެވެ. ނުވަތަ އަަވަށްޓެރި ކޮންމެ ވެސް ޤައުމަކުންނެވެ. ރައީސެވެ. ކުރިން އާސަންދައިގެ ދަށުން އުމުރު ދުވަހު ތައިރޮޑް ބޭސް ކަމުން އައި ރައްޔިތުން، މިއަދު އެ އުޅެނީ އެ ބޭސްކޮޅު ވެސް އާސަންދައިން ކަވަރު ނުކޮށްގެންނެވެ. ރައީސެވެ. މާލޭގެ ބޭސް ފިހާރަތަކުން ބޭސް ހުސްވެގެން، މިދިޔަ ހަފުތާގައި ވެސް ބޭސް ގެނައީ ހއ.ހޯރަފުށިންނެވެ. މިއީ ކޮން ކަހަލަ އަމާޒެއް ހެއްޔެވެ؟

ދެން ދެއްކެވީ އަސާސީ ޚިދުމަތާއި، ރާއްޖޭގެ އެކި ކަންކޮޅުތަކަށް ގެނެވޭ އުމުރާނީ ތަރައްޤީގެ އަމާޒުގެ ވާހަކަ އެވެ. ރަށް ރަށުގައި އަސާސީ ޚިދުމަތް ފުރިހަމަ ކުރުމަށް ކުރީގެ ރައީސް އިބްރާހީމް މުޙައްމަދު ޞާލިޙުގެ ސަރުކާރުގައި ފެއްޓެވި މަޝްރޫއުގެ ދަށުން، ބައެއް ރަށްތަކުގައި ހުރީ ފެނާއި، ނަރުދަމާގެ މަސައްކަތުގެ 99 އިންސައްތަ ނިމިފަ އެވެ. ހަމައެކަނި ކަނެކްޝަން ގުޅާލުމަށްފަހު، ރަސްމީކޮށް ޚިދުމަތް ދޭ ހިސާބުގަ އެވެ. އެހެން ނަމަވެސް، އެއް އަހަރު ދުވަސްވީއިރު މަނިކުފާނުގެ ސަރުކާރަށް އެވަރު ކޮށްނުލެވުނުއިރު، އަސާސީ ޚިދުމަތުގެ ކޮން އަމާޒެއްގެ ވާހަކައެއް ދައްކަވާކަށް ހެއްޔެވެ؟

ރައީސެވެ. އެކި ކަންކޮޅުތަކުގައި އުމުރާނީ ތަރައްޤީގެ އަމާޒޭ ކިޔައިގެން މަނިކުފާނު ވާހަކަ ނުދައްކަވާށެވެ. މިދިޔަ އެއް އަހަރު ދުވަހުގެ ތެރޭގައި ތަރައްޤީގެ މަޝްރޫއެއް ހިންގި ރަށަކާ ނުވަތަ ރަށެއްގެ މީހަކާ ދިމާނުވެ އެވެ. މުޅިން ވެސް އޮތީ މާޔޫސްކަމެވެ. ކުރިން ފަށާފައިވާ މަޝްރޫއުތައް ހުއްޓި، ހައިމާކުތައް ބިމަށް ދަތްގަނޑު ޖެހި ގޮތަށް، އެވެރީން އެ ތިބީ އެގޮތުގަ އެވެ. ރަށްރަށަށް ގެންގޮސްފައި ހުރި ސާމާނުތައް ވީރާނަވެ ހަލާކުވާން ކައިރިވެފައިވާއިރު، އެކަމުގެ ޝަކުވާ ކުރާ ރައްޔިތުން މަދެއް ނޫނެވެ.

މިހެން ގޮސް ލައްކަ ވާހަކަ ދެއްކިދާނެ އެވެ. ކުރިއަށް އޮތް ހަފުތާ ނިމޭއިރު ވެސް މި ވާހަކަތައް ދައްކާ ހުސް ނުވާނެ އެވެ. ރައީސް މި ދައްކަވާ ވާހަކަތައް ދެކޮޅު ޖައްސާނީ ކިހިނެއް ހެއްޔެވެ؟ މިހެން ބުނީތީ، އެ ވާހަކަތައް ދެކޮޅު ޖައްސަން ވެސް ވަޒީރު ފެންވަރުގައި ބޭފުޅަކު އައްޔަންކޮށްފާނެ އެވެ!