އާޒަރުބައިޖާނުން ރަޝިޔާއަށް ދަތުރުކުރަމުން ދިޔަ އާޒަރުބައިޖާނުގެ ފަސިންޖަރުން އުފުލާ މަތިންދާބޯޓެއް ކަޒަކިސްތާނުގެ އަގްތައު ސިޓީ ކައިރީގައި ވެއްޓި، 4 މީހުން މަރުވެއްޖެކަމަށް ސިއްހީ އޮފިޝަލުންނާ ހަވާލާ ދީ މީޑީއާ ރިޕޯޓުތައް ބުނެފިއެވެ.

ބޯޓު ވެއްޓުނު އިރު އޭގައި 62 ފަސިންޖަރުންނާއި 5 ކުރޫ މެންބަރުން ތިއްބެވެ. ބޯޓަށް ދިމާވި ހާދިސާ އަކާ ގުޅިގެން، ބުދަ ދުވަހު އަގްތައު އިން ގާތްގަނޑަކަށް 3 ކިލޯމީޓަރު (1.8 މޭލު) ދުރު ހިސާބެއްގައި ބޯޓު އޮއްވާ އިމަޖެންސީކޮށް ޖައްސަން މަޖުބޫރުވިއެވެ.

ބޯޓު ވެެއްޓެމުން ދިޔަ މަންޒަރުތައް ސޯޝަމް މީޑިއާގައި އާންމުވެފައިވާއިރު އޭގައި އަލިފާން ރޯވެފައިވާ މަންޒަރު ފެނެއެވެ.

އާޒަރުބައިޖާންގެ ސަރުކާރުން ބުނާ ގޮތުގައި، މިހާތަނަށް 29 މީހުން ސަލާމަތްވި ކަން ވަނީ ކަށަވަރު ކުރެވިފައެވެ. އޭގެ ތެރޭގައި 2 ކުޑަކުދިން ހިމެނެއެވެ. އެންމެންވެސް ވަނީ ހޮސްޕިޓަލަށް ގެންގޮސްފައެވެ.

އާޒަރުބައިޖާނުގެ އިމަރޖެންސީ މިނިސްޓްރީން ފުރަތަމަ ބުނީ 25 މީހުން ސަލާމަތްވިކަމަށެވެ. ނަމަވެސް ފަހުން އެ އަދަދު 27 ން، ދެން 28 އަށް، އޭގެ ފަހުން 29 ކަމަށް ބުނެފައިވެއެވެ. ސަލާމަތްވި މީހުންގެ އަދަދުތަކަށް ބަދަލު އަންނަމުން ދިޔައީ ބޯޓު ވެއްޓުނު ސަރަހައްދުން މީހުން ހޯދުމުގެ މަސައްކަތް ކުރިއަށް ދިއުމާ އެކުގައެވެ.

ރަޝިޔާގެ ނިއުސް އޭޖެންސީ އިންޓަރފެކްސްއިން ބުނެފައިވަނީ އިތުރު މީހުން ސަލާމަތްވެފައި ތިބުން އެކަށީގެންވާ ކަމަށާއި، ހާދިސާ ހިނގި ތަނުން މަރުވެފައިވާ 4 މީހެއްގެ ހަށިގަނޑު ފެނިފައިވާ ކަމަށެވެ.

އާޒަރުބައިޖާނުގެ އިމަޖެންސީ މިނިސްޓްރީން ބުނާ ގޮތުގައި ފަޔަރ ސަރވިސްއިން ބޯޓުގައި ރޯވި އަލިފާން ވަނީ ނިއްވާލައިފިއެވެ. އަދި 150 އިމަޖެންސީ އޮފިޝަލުން ހާދިސާ ހިނގި ތަނުގައި މަސައްކަތްކުރަމުންދާ ކަމަށް ބުނެފައިވެއެވެ.

ފުރަތަމަ ލިބުނު މަޢުލޫމާތުތަކަށް ބަލާއިރު، ގްރޮޒްނީގައި ފޮގް ބޯވުމުގެ ސަބަބުން ބޯޓު އެހެން އެއަރޕޯޓަކަށް ޖައްސަން އެދުނު ކަމަށް މޮސްކޯގައި ހުންނަ އަލްޖަޒީރާގެ ރިޕޯޓަރު ބުނެފައިވެއެވެ.

މަތިންދާބޯޓުގައި ތިބި ފަސިންޖަރުންގެ ތެރޭގައި އަޒަރުބައިޖާނު، ރަޝިޔާ، ކަޒަކިސްތާނު އަދި ކިރުގިސްތާނުގެ ރައްޔިތުން ހިމެނޭ ކަމަށް ރިޕޯޓުތައް ބުނެއެވެ. 

ރަޝިޔާގެ އޭވިއޭޝަން ކަންތައްތަކާ ބެހޭ އިދާރާއިން ނެރުނު ބަޔާނެއްގައި ބުނެފައިވަނީ، ފުރަތަމަ ލިބުނު މަޢުލޫމާތުތަކަށް ބަލާއިރު، ބޯޓުގައި ދޫންޏެއް ޖެހުމުގެ ސަބަބުން ޕައިލެޓް ނިންމީ އިމަޖެންސީކޮށް ބޯޓު ޖެއްސުމަށެވެ. 

ކަޒަކިސްތާނުގެ އިސްވެރިން ބުނާ ގޮތުގައި މައްސަލަ ތަހުގީގު ކުރުމަށް ކޮމިޝަނެއް ވަނީ އެކުލަވާލާފައެވެ. އަދި އެ ކޮމިޝަނުގެ މެންބަރުންނަށް ވަނީ ހާދިސާ ހިނގި ތަނަށް ދަތުރުކޮށް، މަރުވި އަދި ޒަޚަމްވި މީހުންގެ ޢާއިލާތަކަށް ބޭނުންވާ އެހީތެރިކަން ލިބޭކަން ކަށަވަރުކުރުމަށް ސަރުކާރުން އަންގާފައެވެ.

އަޒަރުބައިޖާނުގެ ރައީސް އިލްހާމް އަލިޔެވް ވަނީ ރަޝިޔާއަށް ކުރައްވަމުން ގެންދެވި ދަތުރުފުޅު ކުރުކޮށްލައްވާފައެވެ. އޭނާ ރަޝިއާ އަށް ވަޑައިގަތީ ބުދަ ދުވަހު އޮންނަ ސަމިޓެއް ގައި ބައިވެރިވެ ވަޑައިގަތުމަށެވެ.