ޣައްޒާގެ ހަނގުރާމަ ހުއްޓާލުމަށް ގޮވާލާ އދ ގެ ސެކިއުރިޓީ ކައުންސިލަށް އަލްޖީރިއާ އިން ހުށަހެޅި ގަރާރު އެމެރިކާ އިން ވީޓޯ ކޮށްފިއެވެ. 

އިޒްރޭލުގެ ބޮޑު ހިމާޔަތްތެރިޔާ އެމެރިކާ އިން ވީޓޯ ބާރު ބޭނުންކޮށް އެ ގަރާރަށް އަންގާރަ ދުވަހު ހުރަސް އެޅި އިރު މިއީ ހުސްވި އަހަރުގެ އޮކްޓޯބަރު މަހުގެ ކުރީކޮޅު އިޒްރޭލުން ޣައްޒާގައި ލޭއޮހޮރުވުމުގެ ހަނގުރާމައިގެ މެޝިން ހިންގި ފަހުން، ވޮޝިންގްޓަނުން ހުރަސް އަޅާ ހުއްޓުވި މިފަދަ ތިންވަނަ ގަރާރެވެ. 

15 މެންބަރުންގެ ސެކިއުރިޓީ ކައުންސިލުގެ 13 ޤައުމެއްގެ މަންދޫބުން މި ޤަރާރަށް ތާއީދުކޮށް ވޯޓު ދިނެވެ. އިނގިރޭސިވިލާތުން ވަކި ކޮޅަކަށް ވޯޓެއް ނުދެއެވެ. 

އދ. ގައި ހުންނަވާ ފަލަސްޠީނުގެ މަންދޫބު ރިޔާޟް މަންސޫރު، ވޯޓު ނިމުމާއެކު، ސެކިއުރިޓީ ކައުންސިލުގައި އެމެރިކާގެ ވީޓޯ ކުށްވެރިކުރައްވައި ވާހަކަފުޅު ދެއްކެވިއެވެ.

"މިއަދު މި ވީޓޯއާއެކު އިޒްރޭލަށް ދެވުނު މެސެޖަކީ މީހުން މެރުން ކުރިއަށް ގެންގޮސް، އެކަމުން ރެކުންވެސް ކުރިއަށް ގެންދެވިދާނެ" ކަމަށް އޭނާ ސެކިއުރިޓީ ކައުންސިލަށް ދެއްވި ބަޔާނެއްގައި ވިދާޅުވިއެވެ.

އެމެރިކާއިން ވަނީ އަލްޖީރިއާއިން ހުށަހެޅި މި ޤަރާރު ހުއްޓުވާނެކަމަށް ވޯޓުގެ ކުރިންވެސް ބުނެފައެވެ. 

2023 ވަނަ އަހަރުގެ އޮކްޓޯބަރު 7 އިޒްރޭލުގެ އަނިޔާވެރިކަން ޣައްޒާގައި ހުއްޓުމެއްނެތި ކުރިއަށް ދާއިރު، މިހާތަނަށް، އިޒްރޭލުން ވަނީ ޣައްޒާގައި 43،985 އަށްވުރެ ގިނަ މީހުން ޝަހީދުކޮށްލާފައެވެ. އޭގެ ތެރެއިން ގިނައީ އަންހެނުންނާއި ކުޑަކުދިންވެ. އޭގެ އިތުރުން 104،092 ފަލަސްތީނު މީހުން ވަނީ ޒަޚަމްވެފައެވެ. 

ޣައްޒާ ގައި އިޒްރޭލުން ހިންގާ ނަސްލު ނައްތާލުމުގެ ހަނގުރާމައިގައި، ވޮޝިންގްޓަނުން ވަނީ އިޒްރޭލަށް 10،000 ޓަނަށްވުރެ ގިނަ ހަނގުރާމައިގެ އާލާތްތައް ފޯރުކޮށްދީފައިވެއެވެ. 

އެމެރިކާއިން ވަނީ އޮކްޓޯބަރު އަދި ޑިސެމްބަރު މަހުވެސް ހަނގުރާމަ ހުއްޓާލުމަށް ގޮވާލާ މިފަދަ އދ. ގެ ޤަރާރުތަކެއް ވީޓޯ ކޮށްފައެވެ.