ހަ ވަނަ ކެރަމް ވާރލްޑް ޗެމްޕިއަންޝިޕުގެ ޓީމު އިވެންޓުގައި ރާއްޖޭގެ ޤައުމީ ފިރިހެން ޓީމު އަދި އަންހެން ޓީމުން ލޯ މެޑަލް ހޯދައިފި އެވެ.
އެމެރިކާގެ ކެލަފޯނިއާގައި މިހާރު ކުރިއަށްދާ ކެރަމް ވާރލްޑް ޗެމްޕިއަންޝިޕުގައި ވާދަކުރާ ރާއްޖޭގެ ޤައުމީ ފިރިހެން ޓީމުގައި ހިމެނެނީ ޙަސަން ނާޒިމް، އިބްރާހީމް ހުޖާން އަލީ، އިސްމާއީލް އަޒްމީން އަދި މުޙައްމަދު މުންތަސިރު އެވެ. އަދި ރާއްޖޭގެ ޤައުމީ އަންހެން ޓީމުގައި ހިމެނެނީ އާމިނަތު ވިދާދު، އައިޝަތު ނައުފާ، އައިޝަތު ފައިނާޒް އަދި ފާތިމަތު ރަޔާނާ އެވެ.
މުބާރާތުގެ ޓީމު އިވެންޓުގެ ސެމީ ފައިނަލްގައި ރާއްޖޭގެ ދެ ޓީމު ވެސް ވާދަކޮށްފައި ވަނީ ސްރީ ލަންކާއާ އެވެ. ސެމީ ފައިނަލްގައި ލަންކާ އަތުން ބަލިވުމާއެކު، ރާއްޖޭގެ ދެ ޓީމަށް ވެސް ޖެހުނީ ތިން ވަަނަ ހޮވާ މެޗުގައި ވާދަކުރުމަށެވެ. އެގޮތުން ތިން ވަަނަ ހޮވަން ކުޅުނު މެޗުން މޮޅުވެ، ފިރިހެން ޓީމާއި، އަންހެން ޓީމު ވެސް ވަނީ ލޯ މެޑަލް ކާމިޔާބު ކޮށްފަ އެވެ.
ތިން ވަަނަ ހޮވަން ކުޅުނު މެޗުގައި އަންހެން ޓީމު ވާދަކޮށްފައި ވަނީ މުބާރާތް ބާއްވާ ޤައުމު އެމެރިކާއާ އެވެ. އެ މެޗު ރާއްޖޭގެ ޓީމުން ކާމިޔާބު ކޮށްފައި ވަނީ ސީދާ ތިން ގޭމުންނެވެ. މެޗުގެ ފުރަތަމަ ގޭމުގައި ސިންގަލްސް މެޗުގައި ރާއްޖޭގެ އާމިނަތު ވިދާދު ވަނީ ސީދާ ދެ ސެޓުން ގޭމު ކާމިޔާބު ކޮށްފަ އެވެ. ދެ ވަނަ ގޭމުގައި ސިންގަލްސް މެޗުގައި ރާއްޖޭގެ ފާތިމަތު ރަޔާނާ ވެސް ވަނީ ސީދާ ދެ ސެޓުން މޮޅުވެފަ އެވެ. ފަހު ގޭމުގައި ޑަބަލްސް މެޗުގައި ރާއްޖޭގެ އާމިނަތު ނައުފާ އަދި ފާތިމަތު ފައިނާޒް ވެސް ވަނީ ސީދާ ދެ ސެޓުން މޮޅުވެފަ އެވެ.
މިއަހަރު ރާއްޖޭގައި ބޭއްވި އޭޝިއަން ކެރަމް ޗެމްޕިއަންޝިޕްގައި ވެސް ރާއްޖެއިން ވަނީ ރަނގަޅު ނަތީޖާތަކެއް ހޯދައިފައެވެ. އެގޮތުން ޑަބަލްސް އިވެންޓުގައި ރާއްޖޭގެ އިސްމާއީލް އަޒްމީން އަދި ޙަސަން ނާޒިމް (ނާނަ) ރިހި މެޑަލް ހޯދި އެވެ. ޓީމު އިވެންޓުގައި ރާއްޖޭގެ ފިރިހެން ޓީމު ރިހި މެޑަލް ހޯދިއިރު، އަންހެން ޓީމުން ލޯ މެޑަލް ހޯދި އެވެ. މުބާރާތުގައި ރާއްޖޭގެ ކުޅުންތެރިން ވަނީ ސިންގަލްސް އިވެންޓުގެ ކުއާޓަރ ފައިނަލްގައި ވެސް ވާދަކޮށްފަ އެވެ.
