މަސްތުވާތަކެތި ގެންގުޅެ އޭގެ ވިޔަފާރިކުރި މީހަކު 30 ދުވަހަށް ބަންދުކޮށްފިއެވެ.

މި މައްސަލައިގައި ހައްޔަރުކޮށް ބަންދުކޮށްފައިވަނީ ޅ. ނައިފަރު، މައިޒާންދޮށުގެ، ޔޫސުފް މާޒިން (35އ) އެވެ. އޭނާ ބަންދުކުރުމަށް އަމުރުކޮށްފައިވަނީ ކަސްޓޯޑިއަލް ޖަލެއްގައެވެ.

ކްރިމިނަލް ކޯޓުން ނެރުނު އަމުރުގައި ބުނެފައިވަނީ އޭނާގެ މައްޗަށް ތުހުމަތުކުރެވޭ މިންވަރަށް ހެކި ހުށަހަޅާފައިވެއެވެ. އަދި މަސްތުވާތަކެތި ފެނިފައިވަނީ މީނާ ހުރި ތަނުން ކަމުގައިވެފައި އެތަކެތި ބަރުދަން ޓްރެފިކިންގ މިންގަނޑަށް އަރާކަން ފާހަގަ ކުރެވޭ ކަމަށެވެ. އަދި އެތަކެތި ހުރީ އޭނާގެ މައުނަވީ ހިޔާޒަތުގައި ކަމަށް ބަލަންޖެހޭ ކަމަށް ބުނެފައިވެެއެވެ.

ބަންދުގައި ބަހައްޓަންޖެހޭ ހާލަތެއްގައި ގޮތުގައި ބުނެފައިވަނީ ޖިނާއީ އިޖްރާއަތުގެ ގާނޫނުގެ ދަށުން މުޖްތަމައުގެ ސަލާމަތާއި ރައްކާތެރިކަމަށްޓަކައެވެ.

އަމުރުގައި ބުނެފައިވަނީ މި މައްސަލައަކީ މަސްތުވާތަކެތި ޓްރެފިކް ކުރުމުގެ ކުށުގެ ތުހުމަތުކުރެވޭ މައްސަލައެއްކަމާއި، މަސްތުވާތަކެތި ފެނިފައިވާ ތަނަކީ ރާވައިގެން އިންތިޒާމްވެގެން އިތުރު ފަރާތެއް ހިމެނިގެން މަސްތުވާތަކެތި ރައްކާކޮށް، ބަންދުކޮށް، ވިޔަފާރިކުރުމަށް ބޭނުންކުރާ ތަނެއްކަމުގައި ބެލެވޭއިރު އަދި، އެތަނުން މަސްތުވާތަކެތި ކިރާ ބަންދުކުރުމަށް ބޭނުންކުރާ އާލަތްތައް ފެނިފައިވެއެވެ. އެހެންކަމުން، މި ގެއަކީ މަސްތުވާތަކެތި ފުޅާ ދާއިރާއެއްގައި ވިޔަފާރިކުރުމުގެ ބޭނުމުގައި ބޭނުންކުރާ ތަނެއްކަމަށް ބުރަވާ ކަމަށެވެ.

އަދި ފުލުހުން ހުށަހަޅާފައިވާ ހެކިތަކުން މީނާއަކީ ވެސް މިކަމުގައި ބައިވެރިވާ ފަރާތެއްކަމަށް ބުރަވާ ކަމަށެވެ.